ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດ ແຂວງຄຳມ່ວນ ມອບເຄື່ອງຊ່ວຍເຫຼືອໃຫ້ຄະນະສະເພາະກິດຂັ້ນແຂວງ

ເພື່ອເປັນການສືບຕໍ່ສ້າງຂະບວນການຂໍ່ານັບຊົມເຊີຍ ວັນສ້າງຕັ້ງແນວລາວສ້າງຊາດ ຄົບຮອບ 71 ປີ ແລະ ເປັນການປະກອບສ່ວນຊ່ວຍເຫລືອສັງຄົມ ກໍ່ຄືການຊ່ວຍເຫຼືອແຮງງານລາວທີກັບມາຈາກຕ່າງປະເທດ. ໃນວັນທີ 16 ສິງຫາ 2021 ນີ້ ແນວລາວສ້າງຊາດແຂວງຄຳມ່ວນ ໄດ້ຈັດພິທີມອບ-ຮັບເຄື່ອງຊ່ວຍເຫຼືອ ໃຫ້ຄະນະສະເພາະກິດຂັ້ນແຂວງ ເພື່ອເປັນການປະກອບສ່ວນເຂົ້າໃນວຽກງານຄວບຄຸມ, ປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ 19 ໃນແຂວງຄຳມ່ວນ, ເປັນກຽດຮັບໂດຍທ່ານ ປອ ສົມສະອາດ ອຸ່ນສີດາ ຮອງເຈົ້າແຂວງໆຄຳມ່ວນ ທັງເປັນຮອງຄະນະສະເພາະກິດຂັ້ນແຂວງ, ມີຫົວໜ້າກອງເລຂາສະເພາະກິດແຂວງ, ກໍາມະການສູນກາງແນວລາວສ້າງຊາດ, ກໍາມະການແນວລາວສ້າງຊາດແຂວງ ພ້ອມດ້ວຍພະນັກງານແນວລາວສ້າງຊາດແຂວງເຂົ້າຮ່ວມ.

ເຄື່ອງທີ່ນໍາມາມອບ ແມ່ນເປັນການປະກອບສ່ວນຈາກສູນກາງແນວລາວສ້າງຊາດ ມີຕຽງນອນລຸ້ນພັບ ແລະ ໝອນ 50 ຊຸດ ມູນຄ່າ 28.000.000 ກີບ ແລະ ທັງເປັນການປຸກລະດົມ ຂອງແນວລາວສ້າງຊາດແຂວງ ຈາກຫຼາຍພາກສ່ວນມີ: ຄະນະ ອພສ ເມືອງຍົມມະລາດ ປະເພດ ຕຽງນອນໄມ້, ຜ້າຫົ່ມ, ໝອນ, ມຸ້ງ, ສາດ ແລະ ເສື່ອນອນ ມູນຄ່າ 5.350.000 ກີບ, ວັດກາໂທລິກບ້ານປົ່ງກິ້ວ ປະເພດ ຕຽງໄມ້ ມູນຄ່າ 1.600.000 ກີບ, ລວມມູນຄ່າທັງໝົດ 34,950,000 ກີບ. ເຊິ່ງຈຳນວນເຄື່ອງດັ່ງກ່າວແມ່ນຈະໄດ້ນຳໄປມອບຕໍ່ໃຫ້ແຮງງານທີ່ເຂົ້າຈຳກັດບໍລິເວນຢູ່ສູນກັກກັນ ເພື່ອກວດຫາເຊື້ອພະຍາດໂຄວິດ-19 ຢູ່ສູນຕ່າງໆຂອງແຂວງ.

ການມອບເຄືີ່ອງຊ່ວຍເຫລືອໃນຄັ້ງນີ້ ສະແດງໃຫ້ເຫັນເຖິງຄວາມເອົາໃຈໃສ່, ຄວາມເປັນຫ່ວງເປັນໃຍ ຂອງການນຳພັກ-ລັດທຸກຂັ້ນ ແລະ ທຸກພາກສ່ວນ ທີ່ມີຕໍ່ພໍ່ແມ່ປະຊາຊົນ ທີ່ເດີນທາງກັບຄືນສູ່ບ້ານເກີດເມືອງນອນຂອງຕົນ ໂດຍໃຫ້ຄວາມຊ່ວຍເຫຼືອດ້ານຕ່າງໆ ບໍ່ວ່າຜູ້ທີໄປຖືກກົດໝາຍ ຫຼື ຜິດກົດໝາຍ ກໍ່ລ້ວນແຕ່ໄດ້ຮັບການຊ່ວຍເຫຼືອເທົ່າທຽມກັນ. ເຊິ່ງໃນໄລຍະຜ່ານມາ ໂດຍການຊຸກຍູ້ ປຸກລະດົມຈາກ ແນວລາວສ້າງຊາດແຂວງ ຄໍາມ່ວນ ສົມທົບກັບພາກສ່ວນຕ່າງໆ ເຮັດໃຫ້ມີຫຼາຍພາກສ່ວນ ລວມທັງການຈັດຕັ້ງ ພັກ-ລັດ, ສັງຄົມ, ອົງການສາສະໜາພາຍໃນແຂວງ ໃຫ້ການປະກອບສ່ວນ ເຄື່ອງອຸປະໂພກ-ບໍລິໂພກຕ່າງໆ ມາຮອດປະຈຸບັນ ລວມມູນຄ່າການຊ່ວຍເຫຼືອທັງໝົດແມ່ນ 100 ລ້ານກວ່າກີບ.

 

info@lfnd.org.la | 021 213754 | (856-21) 453191