ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດ ແຂວງຜົ້ງສາລີ ຫວນຄືນມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 71 ປິ

ພິທີປາຖະກະຖາຫວນຄືນມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 71 ປິ(ວັນທີ 13 ສິງຫາ 1950–13  ສິງຫາ 2021) ໄດ້ຈັດຂຶ້ນໃນວັນທີ 13 ສິງຫາ 2021 ນີ້ ຢູ່ສະໂມສອນຂອງເມືອງບຸນເໜືອ ແຂວງຜົ້ງສາລີ, ໂດຍການໃຫ້ກຽດເຂົ້າຮ່ວມຂອງ ທ່ານ ຄຳຜອຍ ວັນນະສານ ກຳມະການສູນກາງພັກ ເລຂາພັກແຂວງ ເຈົ້າແຂວງໆຜົ້ງສາລີ, ທ່ານ ທອງສະຫວັນ ທຳມະວົງ ກຳມະການປະຈຳພັກແຂວງ, ຄະນະກໍາມະການສູນກາງແນວລາວສ້າງຊາດ, ປະທານແນວລາວສ້າງຊາດແຂວງ, ທ່ານ ພອນໄຊ ແກ້ວສົມພັນ ກໍາມະການປະຈໍາພັກແຂວງ ເລຂາພັກເມືອງ ເຈົ້າເມືອງໆບຸນເໜືອ, ມີບັນຄະນະປະຈໍາພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກໍາມະການພັກເມືອງ, ຄະນະກໍາມະການແນວລາວສ້າງຊາດເມືອງ, ຫົວໜ້າ-ຮອງຫົວໜ້າຫ້ອງການ, ກອງບັນຊາການ ປກສ-ປກສ,  ພະນັກງານອາວຸໂສບໍານານ, ຜູ້ຊົງຄຸນວຸດທິ ຕະຫຼອດຮອດພະນັກງານ-ລັດຖະກອນ ອ້ອມຂ້າງແຂວງ   ແລະ ເມືອງເຂົ້າຮ່ວມ.

​ໃນ​ພິທີ, ທ່ານ ທອງສະຫວັນ ທຳມະວົງ ກໍ່​ໄດ້​ຂຶ້ນ​​ເລົ່າ​ມູນ​​ເຊື້​ອ ​ແລະ ການ​ກໍາ​​ເນິດ​ເຕີບ​ໃຫ່ຍ ຂອງ​​ແນວ​ລາວ​ສ້າງ​ຊາດ ​​ເຊິ່ງທ່ານ​​ໃຫ້​ຮູ້ວ່າ: ອົງການແນວລາວສ້າງຊາດ ໄດ້ມີຕົ້ນກໍາເນິດ ແລະ ເຕີບໃຫ່ຍຂະຫຍາຍຕົວຂຶ້ນທ່າມກາງສົງຄາມສັກດີນາ ແລະ ພວກຈັກກະພັດຕ່າງດ້າວເຂົ້າມາຮຸກຮານ ແລະ ຍຶດຄອງເອົາຫົວເມືອງຂຶ້ນແຕ່ປະຊາຊົນລາວບັນດາເຜົ່າ ບໍ່ຍອມຈຳນົນ ບໍ່ຍອມເປັນຄ້ອຍຄ້າມ້າຕ້າງໃຫ້ແກ່ພວກເຂົາ ຈິງໄດ້ພາກັນລຸກຂຶ້ນຕໍ່ສູ້ຕ້ານການຮຸກຮານຂອງພວກສັກດີນາ ແລະ ຈັກກະພັດຕ່າງດ້າວໃນແຕ່ລະໄລຍະຢ່າງລຽນຕິດເປັນຕົ້ນແມ່ນຂະບວນການຕໍ່ສູ້ພາຍໃຕ້ການນໍາພາຂອງພໍ່ກະດວດ, ອົງແກ້ວອົງກົມມະດໍາ, ເຈົ້າຟ້າປັດໃຈ ແລະ ຂະບວນການຕໍ່ສູ້ອື່ນໆ ແຕ່ຂະບວກການຕໍ່ສູ້ນັ້ນລ້ວນແຕ່ຖືກປາບປາມຍ້ອນບໍ່ທັນມີທິດສະດີປະຕິວັດ, ບໍ່ທັນມີພາກປະຕິວັດນໍາພາຢ່າງຖືກຕ້ອງ ແລະ ການຈັດຕັ້ງແນວໂຮມຢ່າງກ້ວາງຂວາງ, ອົງການແນວລາວສ້າງຊາດສ້າງຊາດໄດ້ຮັບການສ້າງຕັ້ງຂຶ້ນໃນວັນທີ 13 ສິງຫາ ປີ 1950 ໄລຍະທີ 1 ເອີ້ນວ່າ ແນວລາວອິດສະຫຼະ, ໄລຍະທີ 2 ເອີ້ນວ່າ ແນວລາວຮັກຊາດ ແລະ ໄລຍະທີ 3 ເອີ້ນວ່າ ແນວລາວສ້າງຊາດ, ມາຮອດປັດຈຸບັນນັບແຕ່ໄດ້ມີການສ້າງຕັ້ງອົງການແນວລາວສ້າງສ້າງຊາດຢ່າງເປັນຮູບປະທໍາໂດຍພາຍໃຕ້ການຊີ້ນໍາຂອງພັກ ອົງການແນວລາວສ້າງຊາດໄດ້ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າຢ່າງກ້ວາງຂວາງ ເຮັດໃຫ້ການຕໍ່ສູ້ດ້ານອາວຸດ ແລະ ຕໍ່ສູ້ດ້ານການເມືອງ ຂອງກໍາລັງປະຕິວັດລາວ ໄດ້ຮັບໄຊຊະນະຢ່າງເນື່ອງນິດລຽນຕິດຈົນກ້າວມາເຖິງໄດ້ຮັບໄຊຊະນະອັນໃຫ່ຍຫຼວງ ແລະ ສາມາດປົດປ່ອຍປະເທດຊາດຢ່າງສົມບູນໃນວັນ 2 ທັນວາ ປິ 1975. ນອກຈາກນັ້ນມາຮອດປັດຈຸບັນອົງການແນວລາວສ້າງຊາດຍັງສືບຕໍ່ເປັນຄັນທຸງໃນການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ, ຊັ້ນຄົນ, ສາສະໜາ ແລະ ເພດ-ໄວ ໃຫ້ເປັນປຶກແຜ່ນແໜ້ນໜາ ເຂົ້າຮ່ວມທຸກຂະບວນການທີ່ສຳຄັນຂອງຊາດ ຄືປົກປັກຮັກສາ ແລະ ສ້າງສາພັດທະນາປະເທດຊາດ.

ໃນ​ພິ​ທີ​ຍັງ​ໄດ້​ປະດັບຫຼຽນ​ໄຊ​ແຮງ​ງານ​ຊັ້ນ I, ຊັ້ນ II, ຊັ້ນ III ແລະ ຫຼຽນ​ກາ​ແຮງ​ງານໃຫ້​ພະ​ນັກ​ງານ​ລັດ​ຖະ​ກອນ ຂອງ​ແນວ​ລາວ​ສ້າງ​ຊາດ​ ທີ່​ມີ​ຜົນ​ງານ​ດີ​ເດັ່ນປະ​ກອບ​ສ່ວນ​ເຫື່ອ​ແຮງ​ສະ​ຕິ​ປັນ​ຍາ​ເຂົ້າ​ໃນ​ວຽກ​ງານ​ແນວ​ລາວ​ສ້າງ​ຊາດ​ ຕະຫຼອດ​ໄລ​ຍະ 10 ປີ 2010-2020 ເຊີງ​ປະ​ດັບ​ໂດຍ ​ທ່ານ ຄຳຜອຍ ວັນນະສານ ແລະ ມອບໃບ​ຍ້ອງ​ຍໍ​ໃຫ້​ບຸກ​ຄົນ ແລະ ກົມ​ກອງ ທີ່​ມີ​ຜົນ​ງານ​ດີ​ເດັ່ນ ໃນ​ການ​ປະກອບສ່ວນ​ເຄື່ອນ​ໄຫວ​ວຽກງານ​ແນວ​ລາວ​ສ້າງ​ຊາດ​​ ໃນ​​ໄລຍະ​ຜ່ານ​ມາ.​ ​

info@lfnd.org.la | 021 213754 | (856-21) 453191