ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດ ແຂວງຫຼວງພະບາງ ຖະແຫລງການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 71 ປີ

ວັນທີ 11 ສິງຫາ 2021 ນີ້ ທ່ານ ອ່ອນສີ ຈ່າເພຍວ່າ ຮອງແນວລາວສ້າງຊາດແຂວງ ໃຫ້ສໍາພາດ ຕໍ່ສື່ມວນຊົນ ທີ່ຫ້ອງປະຊຸມແນວລາວສ້າງຊາດແຂວງ ໃນໂອກາດສະເຫຼີມສະຫຼອງ ວັນສ້າງຕັ້ງແນວລາວສ້າງຊາດ ຄົບຮອບ 71 ປີ(13 ສິງຫາ 1950 ຫາ 13 ສິງຫາ 2021).

ທ່ານໄດ້ຍົກໃຫ້ເຫັນປະຫວັດຄວາມເປັນມາ ແລະ ຜົນງານການກຳ ເນີດເຕີຍໃຫຍ່ຂະຫຍາຍຕົວ ຂອງແນວລາວສ້າງຊາດ ໃນແຕ່ລະໄລຍະ ນັບແຕ່ສະໄໝຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານທັງແບບເກົ່າ ແລະ ແບບໃໝ່, ຜ່ານຜ່າເສັ້ນທາງອັນລະອິດລະອ້ຽວ, ຕະຫຼອດໄລຍະຜ່ານມາແນວລາວສ້າງຊາດ ຍາມໃດກໍເປັນຄັນທຸງ ອັນແຂງແກ່ນ ໃນການເຕົ້າໂຮມຄວາມສາມັກຄີປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ-ໄວ ໃນວົງຄະນະຍາດແຫ່ງຊາດ ໃຫ້ເປັນປືກແຜ່ນແໜ້ນໜາ ບົນພື້ນຖານພັນທະພາບກຳມະກອນ-ຊາວນາ ພາຍໃຕ້ ການຊີ້ນຳ-ນຳພາຂອງພັກ, ເຕົ້າໂຮມທຸກກຳລັງ, ການຈັດຕັ້ງສັງຄົມ ຢ່າງກວ້າງຂວາງ ເພື່ອປະກອບສ່ວນເຂົ້າໃນການ ປະຕິບັດ 2 ໜ້າທີຍຸດທະສາດ ຂອງພັກຄື: ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ນັບແຕ່ໄດ້ ຮັບການສ້າງຕັ້ງຂຶ້ນໃນວັນທີ 13 ສິງຫາ 1950 ເປັນຕົ້ນມາແນວລາວສ້າງຊາດ ກໍໄດ້ປ່ຽນຊື່ເອີ້ນ ສາມຄັ້ງ ຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງແຕ່ລະໄລຍະ ຄື: ໄລຍະທີ 1 ເອີ້ນວ່າແນວລາວອິດສະຫຼະ, ໄລຍະທີ 2 ປ່ຽນຊື່ມາເປັນແນວລາວຮັກຊາດ ແລະ ໄລຍະທີ 3 ໄດ້ປ່ຽນຊື່ມາເແນວລາວສ້າງຊາດ ຈົນຮອດປັດຈຸບັນນີ້.

ສຳລັບແຂວງຫຼວງພະບາງໃນ 1 ປີຜ່ານມາ ແມ່ນຍາດໄດ້ຜົນງານຫຼາຍດ້ານເປັນຕົ້ນ: ຄະນະກໍາມະການ ແນວລາວສ້າງຊາດແຂວງ ໄດ້ປະຕິບັດບົດບາດເປັນຄັນທຸງເຕົ້າໂຮມຄວາມສາມັກຄີປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ-ໄວ ພາຍໃນແຂວງ ມີຄວາມສາມັກຄີເປັນປຶກແຜ່ນປະກອບສ່ວນໃນການຈັດຕັ້ງປະຕິບັດແນວທາງ ນະໂຍບາຍຂອງພັກ ແລະ ລະບຽບກົດໝາຍຂອງລັດ ໂດຍສະເພາະແມ່ນການປະຕິບັດມາດຕະການປ້ອງກັນ ພະຍາດໂຄວິດ-19 ຢ່າງເຂັ້ມງວດ ເປັນຈົ້າການຊຸກຍູ້ຂະບວນການສ້າງຄອບຄົວ ແລະບ້ານສາມັກຄີປອງດອງ ໃນທົ່ວ ແຂວງ ເປັນຂະບວນກວ້າງຂວາງ, ມາຮອດປະຈຸບັນສາມາດຮັບຮອງເປັນບ້ານສາມັກຄີປອງດອງໄດ້ຈໍານວນ 461 ບ້ານ, ເທົ່າກັບ 61,06% ຂອງຈໍານວນບ້ານໃນທົ່ວແຂວງ; ປຸກລະດົມປະຊາຊົນບັນດາເຜົ່າປົກປັກຮັກສາ ແລະ ເສີມຂະຫຍາຍຮີດຄອງປະເພນີອັນດີງາມ ຂອງແຕ່ລະເຜົ່າຕາມຮີດ 12 ຄອງ 14 ທີ່ປະຊາຊົນບັນດາເຜົ່າ ເຄີຍປະຕິບັດກັນມາ ໂດຍສະເພາະແມ່ນລົງຊຸກຍູ້ ແລະ ເຂົ້າຮ່ວມບຸນປະເພນີ ຂອງປະຊາຊົນບັນດາເຜົ່າ ທີ່ຈັດຂຶ້ນໃນແຕ່ລະເດືອນ; ເຕົ້າໂຮມຄວາມສາມັກຄີບັນດາສາສະໜາໃນທົ່ວແຂວງໃຫ້ມີຄວາມສາມັກຄີປອງດອງ, ເຄື່ອນໄຫວພາຍໃຕ້ແນວທາງຂອງພັກ, ກົດໝາຍຂອງລັດ ໄດ້ເປັນຢ່າງດີ; ເປັນເຈົ້າການໃກ້ສິດຕິດແທດ ຊັ້ນຄົນຕ່າງໆໃນສັງຄົມ ແລະ ປຸກລະດົມຊຸກຍູ້ບັນດາຜູ້ຊົງຄຸນວຸດທິຂອງແຕ່ລະຊັ້ນຄົນ ເພື່ອເປັນກໍາລັງແຮງ.

 

 

info@lfnd.org.la | 021 213754 | (856-21) 453191