ສູນກາງແນວລາວສ້າງຊາດ

Lao Front For National Development

ແນວ​ລາວ​ສ້າງ​ຊາດ​ແຂວງວຽງ​ຈັນ ປາຖະກະຖາວັນ​ສ້າງ​ຕັ້ງ​ແນວ​ລາວ​ສ້າງ​ຊາດ ຄົບ​ຮອບ 71 ປີ

ພິທີປາຖະກະຖາເລົ່າມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 71 ປີ ໄດ້ໄຂຂຶ້ນຢູ່ທີ່ຫ້ອງປະຊຸມແນວລາວສ້າງຊາດ ແຂວງວຽງຈັນ ໃນວັນທີ 12 ສິງຫາ 2021 ຜ່ານມາ, ເປັນກຽດປາຖະກະຖາໂດຍທ່ານ ເທບພະໄທ ແກ້ວເຂັມເພັດ ຄະນະປະຈຳພັກແຂວງ ປະທານແນວລາວສ້າງຊາດແຂວງວຽງຈັນ, ໃຫ້ກຽດເຂົ້າຮ່ວມມີບັນດາກໍາມະການພັກແຂວງ, ພະແນກອ້ອມຂ້າງ, ບັນດາອົງການຈັດຕັ້ງມະຫາຊົນ ພ້ອມດ້ວຍພະນັກງານໃນອົງການເຂົ້າຮ່ວມ.

ໃນພິທີ, ທ່ານ ເທບພະໄທ ແກ້ວເຂັມເພັດ ໄດ້ໃຫ້ກຽດເຜີຍແຜ່ເອກະສານການເຕີບໃຫຍ່ ແລະ ຂະຫຍາຍຕົວຂອງແນວລາວສ້າງຊາດ ນັບແຕ່ປີ 1950 ເປັນຕົ້ນມາ ເຊິ່ງທ່ານໄດ້ຍົກໃຫ້ເຫັນມູນເຊື້ອຄວາມສາມັກຄີປອງດອງ ແລະ ນ້ຳໃຈເສຍສະຫຼະອັນໃຫ່ຍຫຼວງຂອງບັນດາຜູ້ນຳທີ່ຮັກຊາດ ໂດຍຜ່ານ 3 ໄລຍະປະຫວັດສາດ ຄື: ໄລຍະທີ 1 ແຕ່ປີ 1950-1956 ເອີ້ນວ່າ: ແນວລາວອິດສະຫຼະ, ໄລຍະທີ 2 ແຕ່ປີ 1956-1979 ປ່ຽນຊື່ມາເປັນແນວລາວຮັກຊາດ, ໄລຍະທີ 3 ແຕ່ປີ 1979 ຈົນເຖິງປະຈຸບັນປ່ຽນຊື່​ມາ​ເປັນແນວລາວສ້າງຊາດ; ​ທ່ານ​ຍັງ​ຍົກ​ໃຫ້​ເຫັນ​ຜົນ​ງານ​ການ​ເຄື່ອນ​ໄຫວ​ທີ່​ພົ້ນ​ເດັ່ນ​ໃນ​ແຕ່​ລະ​ໄລ​ຍະ ​ຂອງ​ການ​ປະ​ຕິ​ວັດ​ຊາດ ​ຈົນສາມາດ​ສະ​ຖາ​ປະ​ນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ນັ້ນກໍ່ຍ້ອນ​ມູນ​ເຊື້ອ​ຄວາມ​ສາ​ມັກ​ຄີ​ປອງດອງ ​ຂອງ​ປວງ​ຊົນ​ລາວ​ທັງ​ຊາດ ແລະ ສາມ​ຊາດ​ອິນ​ດູ​ຈີນ ພາຍ​ໃຕ້​ການ​ນຳ​ພາ​​ອັນສະຫຼາດ​ສ່ອງ​ໃສຂອງ​ພັກ, ເປັນຈິດໜື່ງໃຈດຽວພ້ອມກັນລຸກຮື້ຂື້ນ​ເຮັດ​ການ​ປະ​ຕິ​ວັດ​ ເພື່ອ​ທັບມ້າງກົນອຸບາຍ, ເລລ່ຽມຂອງສັດຕູ ພ້ອມທັງຕໍ່ສູ້ໃນທຸກຂອບເຂດທົ່ວປະເທດ ຈົນໄດ້ຮັບໄຊຊະນະຍິ່ງໃຫຍ່.

ທ່ານ​ ປະ​ທານ​ແນວ​ລາວ​ສ້າງ​ຊາດ​ແຂວງວຽງ​ຈັນ ຍັງໄດ້​ຫວນ​ຄືນ​ເຖິງ​ປະ​ຫວັດ​ ຂອງ​ແນວ​ລາວ​ສ້າງ​ຊາດ​ແຂວງວຽງ​ຈັນ ແລະ ຜົນງານຂອງແນວລາວສ້າງຊາດແຂວງວຽງຈັນ 1 ປີ ຜ່ານມາ. ເຊິ່ງໃນໄລຍະນັ້ນ ແຂວງວຽງຈັນຍັງຂຶ້ນກັບນະຄອນຫຼວງວຽງຈັນ. ພາຍຫຼັງປີ 1981-1983 ຈຶ່ງໄດ້ສ້າງ​ຕັ້ງເປັນແຂວງວຽງຈັນ ​ເຊິ່ງ​ແນວ​ລາ​ວ​ສ້າງ​ຊາດແຂວງກໍ່​ໄດ້​​ຖືກສ້າງ​ຕັ້ງ​ຂື້ນ ໃນ​ປີ 1981 ແລະ ປັດ​ຈຸ​ບັນ​ກອງ​ປະ​ຊຸມ​ໃຫຍ່ຜູ້​ແທນ​ແນວ​ລາວ​ສ້າງ​ຊາດ​ແຂວງວຽງ​ຈັນ ໄຂ​ຂຶ້ນ​ມາ​ແລ້ວ 7 ຄັ້ງ. ໃນ​ນັ້ນ​ຜົນ​ງານ​ທີ່​ພົ້ນ​ເດັ່ນ​ໃນ 1 ປີ​ຜ່ານ​ມາ ​ຂອງ​ຄະ​ນະ​ກຳ​ມະ​ການແນວ​ລາວ​ສ້າງ​ຊາດ​ແຂວງ ສະ​ໄໝ​ທີ VII, ກໍ່​ໄດ້​ສຳ​ເລັດ​ກອງ​ປະ​ຊຸມ​ໃຫຍ່​ຂັ້ນ​ຂອງ​ຕົນ, ໄດ້​ເຜີຍ​ແຜ່​ຜົນ​ສຳ​ເລັດ​ມະ​ຕິ​ກອງ​ປະ​ຊຸມ​ໃຫຍ່ ຄັ້ງ​ທີ XI ຂອງ​ພັກ, ຂອງ​ອົງ​ຄະ​ນະ​ພັກ​ແຂວງວຽງ​ຈັນ ຄັ້ງ​ທີ VI, ແຜນ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ແຫ່ງ​ຊາດ ແລະ ຂອງ​ແຂວງວຽງ​ຈັນ ໃນ​ໄລ​ຍະ 5 ປີ, ຮັບຮອງ​ຄອບ​ຄົວ ແລະ ບ້ານ​ສາ​ມັກ​ຄີ​ປອງດອງ ຢູ່​ເມືອງ​ໂພນ​ໂຮງ ແລະ ເມືອງ​ແມດ, ລົງ​ຊຸກ​ຍູ້​ຄະ​ນະ​ຮັບ​ຜິດ​ຊອບກວດຄົນເຂົ້່າ​ເມືອງ ເພື່ອຢັບຢັ້ງ ແລະ ສະກັດກັ້ນ​ການ​ແພ່​ລະ​ບາດ​ຂອງພະຍາດໂຄວິດ 19 ຕາມ​ຈຸດກວດ​ຕົວ​ເມືອງ​ທົ່ງ​ພຽງ​ຢູ່ 4 ຈຸດຄື: ຈຸດກວດ​ບ້ານ​ເມືອງ​ທຸ​ລະ​ຄົມ, ຈຸດກວດ​ບ້ານ​ປາກ​ກະ​ຍຸງ, ຈຸດກວດ​​ວົງ​ວຽນໂພນ​ໝີ ​ແລະ ເມືອງ​ແກ້ວ​ອຸ​ດົມ ນອກນັ້ນ​ຍັງ​ມີ​ຜົນ​ງານ​ພົ້ນ​ເດັ່ນ​ອີກຫຼາຍ​ດ້ານ ເຊິ່ງ​ຄະ​ນະ​ກຳ​ມະ​ການ​ແນວ​ລາວ​ສ້າງ​ຊາດ​ແຂວງວຽງ​ຈັນ​ຈະ​ໄດ້​ເອົາ​ໃຈ​ໃສ່​ສືບ​ຕໍ່​ປະ​ຕິ​ບັດ​ວຽກ​ງານ ແລະ ແຜນ​ການໃນ 5 ປີ ໃຫ້​ສຳ​ເລັດ​ຕາມ​ຄາດ​ໝາຍ.

info@lfnd.org.la | 021 213754 | (856-21) 453191