ສູນກາງແນວລາວສ້າງຊາດ

Lao Front For National Development

ແນວ​ລາວ​ສ້າງ​ຊາດ​ແຂວງໄຊຍະບູລີ ເຜີຍ​ແຜ່​ເຊື່ອມ​ຊືມມະ​ຕິ​​ເລືອກຕັ້ງ​ສະ​ມາ​ຊິກ​ສະ​ພາແຫ່ງ​ຊາດ ຊຸດ​ທີ IX ແລະ ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ ຊຸດ​ທີ II

ຕອນ​ເຊົ້າ​ວັນ​ທີ 13 ມັງ​ກອນ 2021 ຢູ່​​ຫ້ອງ​ປະ​ຊຸມ​ຫ້ອງ​ການ​ແນວ​ລາວ​ສ້າງ​ຊາດ​ແຂວງໄດ້​ມີ​ການ​ເຜີຍ​ແຜ່ເຊື່ອມ​ຊືມເອ​ກະ​ສານ​ການ​ເລືອກຕັ້ງ​ສະ​ມາ​ຊິກ​ສະ​ພາແຫ່ງ​ຊາດ ຊຸດ​ທີ IX ແລະ ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ ຊຸດ​ທີ II ຂຶ້ນໃຫ້​ກັບ​ພະ​ນັກ​ງານ-ລັດ​ຖະ​ກອນ ພາຍ​ໃນ​ອົງ​ການ​ແນວ​ລາວ​ສ້າງ​ຊາດ​ແຂວງ ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ທອງ​ສາ ພົມ​ມະ​ຈັນ ເລ​ຂາ​ໜ່ວຍ​ພັກ, ຮອງ​ປະ​ທານ​ແນວ​ລາວ​ສ້າງ​ຊາດ​ແຂວງ, ມີຮອງ​ປະ​ທານ​, ຫົວ​ໜ້າ​ຂະ​ແໜງ, ຮອງ​ຫົວ​ໜ້າ​ຂະ​ແໜງ ແລະ ພະ​ນັກ​ງານວິ​ຊາ​ການ ເຂົ້າ​ຮ່ວມທັງ​ໝົດ​ 23 ທ່ານ, ຍິງ 9 ທ່ານ.

ໃນ​ກອງ​ປະ​ຊຸມທ່ານ ທອງ​ສາ​ ພົມ​ມະ​ຈັນ ກໍ່​ໄດ້​ຜ່ານມະ​ຕິ​ຂອງ​ຄະ​ນະ​ປະ​ຈຳ​ພັກ​ແຂວງ ເລກ​ທີ 713/ຄ​ພ​ຂ.ຊຍ, ລົງ​ວັນ​ທີ 20 ຕຸ​ລາ 2020 ວ່າ​ດ້ວຍ​ການ​ເພີ້ມ​ທະ​ວີ ການ​ຊີ້​ນຳ-ນຳ​ພາ​ຂອງ​ຄະ​ນະ​ພັກ ຕໍ່​ການ​ເລືອກ​ຕັ້ງ​ສະ​ມາ​ຊິກ​ສະ​ພາແຫ່ງ​ຊາດ ຊຸດ​ທີ IX ແລະ ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ ຊຸດ​ທີ II. ຈາກ​ນັ້ນ, ທ່ານ ບຸນ​ດີ ທໍ່ ແລະ ທ່ານ ນາງ ສົມ​ຈັນ ບຸດ​ດີ ຮອງ​ປະ​ທານ​ແນວ​ລາວ​ສ້າງ​ຊາດ​ແຂວງ ກໍ່​ໄດ້​ຜັດ​ປ່ຽນ​ກັນ​ຂຶ້ນ​ເຜີຍ​ແຜ່​ເອ​ກະ​ສານ ​ການ​ເລືອກ​ຕັ້ງສະ​ມາ​ຊິກ​ສະ​ພາແຫ່ງຊາດ ຊຸດ​ທີ IX ແລະ ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ ຊຸດ​ທີ II ​ເຊິ່ງ​ເອ​ກະ​ສານບາງ​ຕອນ​​ເພີ່ນ​ໄດ້​ເວົ້າ​ວ່າ: ຜູ້​ທີ່ມີ​ສິດ​​ເລືອກ​ຕັ້ງ​ຕ້ອງ​ແມ່ນຄົນ​ລາວ​ທີ່​ມີອາ​ຍຸ​ແຕ່ 18 ປີ​ຂຶ້ນ​ໄປ ​ແລະ ​ມີ​ສິດສະ​ໝັກ​ເລືອກ​ຕັ້ງຕ້ອງ​ແມ່ນ​ມີອາ​ຍຸ 21 ປີ​ຂຶ້ນ​ໄປຕາມ​ມາດ​ຖານ​ເງື້ອນ​ໄຂ ແຕ່ຍົກ​ເວັ້ນ​ຜູ້​ທີ່​ເປັນ​ບ້າ ແລະ ເສຍ​ຈິດ. ​​ການ​ເລືອກ​ຕັ້ງ​ຄັ້ງ​ນີ້​ຕ້ອງສູ້​ຊົນ-ຮັບ​ປະ​ກັນໃນການ​ເລືອກ​ຕັ້ງ​ໃຫ້ໄດ້​ສະ​ມາ​ຊິກ​ສະ​ພາ​ແຫ່ງ​ຊາດ, ສະ​ມາ​ຊິກ​ສາ​ພາ​ປະ​ຊາ​ຊົນ​ແຂວງ ຄົບ​ຖ້ວນ​ຕາມ​ຈຳ​ນວນ​ທີ່​ກຳ​ນົດ​ໄວ້​ເຊັ່ນ: ທົ່ວ​ປະ​ເທດ​ມີ​ສະ​ມາ​ຊິກ​ສາ​ພາ​ແຫ່ງ​ຊາດ​ຈຳ​ນວນ 164 ທ່ານ ແລະ ສະ​ມາ​ຊິກ​ສະ​ພາ​ປະ​ຊາ​ຊົນ​ຂັ້ນ​ແຂວງ ຈຳ​ນວນ 510 ທ່ານ ສຳ​ລັບ​ເຂດ​ເລືອກ​ຕັ້ງ​ທີ 7 ແຂວງ​ໄຊ​ຍະ​ບູ​ລີ ມີ​ສະ​ມາ​ຊິກ​ສະ​ພາ​ແຫ່ງ​ຊາດ 9 ທ່ານ ແລະ ສະ​ມາ​ຊິກ​ສະ​ພາ​ປະ​ຊາ​ຊົນ​ແຂວງ 32 ທ່ານ.

ໃນ​ຕອນ​ທ້າຍ​ ທ່ານ​ປະ​ທານກອງ​ປະ​ຊຸມ  ກໍ່​ຍັງ​ໄດ້​ໂອ​ລົມ ແລະ ເນັ້ນ​ໜັກ​ຕື່ມ​ວ່າ: ​ເພືຶ່ອເຮັດ​ໃຫ້​ການ​ເລືອກ​ຕັ້ງ​ຄັ້ງ​ນີ້​ກາຍ​ເປັນ​ບຸນ​ໃຫ​ຍ່​ຂອງ​ຊາດ ດຳ​ເນີນ​ໄປ​ດ້ວຍ​ບັນ​ຍາ​ກາດ​ເບີກ​ບານ​ມ່ວນ​ຊື່ນ, ມີ​ປະ​ຊາ​ທິ​ປະ​ໄຕ, ຖືກ​ຕ້ອງ​ຕາມ​ກົດ​ໝາຍ, ປະ​​ຢັດ ແລະ ປະ​ຕິ​ບັດ​ໃຫ້​ໄດ້ 4 ຄາດ​ໝາຍ​ໃຫ​ຍ່​ຄື: 1. ຜູ້​ມີ​ສິດ​ປ່ອນ​ບັດ ຕື່ນ​ຕົວ​ສະ​ໝັກ​ໃຈ​ໄປ​ໃຊ້​ສິດ​ເລືອກ​ຕັ້ງໃຫ້​ໄດ້​ຮ້ອຍ​ສ່ວນ​ຮ້ອຍ, 2. ຮັບ​ປະ​ກັນ​ບໍ່​ໃຫ້​ມີ​ບັດ​ຕາຍ ຮ້ອຍ​ສ່ວນ​ຮ້ອຍ. 3. ແຕ່​ລະ​ໜ່ວຍ​ປ່ອນ​ບັດ ແລະ ເຂດ​ເລືອກ​ຕັ້ງ​ຕ້ອງ​ຮັບ​ປະ​ກັນ​ໃຫ້​ມີ​ຄວາມ​ສະ​ຫງົບ​ປອດ​ໄພ​ໃນ​ການ​ເລືອກ​ຕັ້ງ​ຮ້ອຍ​ສ່ວນ​ຮ້ອຍ, 4. ຖືກ​ຕ້ອງ, ວ່ອງ​ໄວ, ຊັດ​ເຈນ ຜົນ​ຂອງ​ການ​ເລືອກ​ຕັ້ງ ຮ້ອຍ​ສ່ວນ​ຮ້ອຍ.

info@lfnd.org.la | 021 213754 | (856-21) 453191