ສູນກາງແນວລາວສ້າງຊາດ

Lao Front For National Development

ແນວ​ລາວ​ສ້າງ​ຊາດ​ແຂວງ​ສະ​ຫວັນ​ນະ​ເຂດເຄື່ອນ​ໄຫວ​ເຜີຍ​ແຜ່​ວຽກ​ງານ​ໂຄ​ສະ​ນາ​ສຸກ​ຂະ​ສຶກ​ສາ

ໃນ​​ວັນ​ທີ 11 ສິງຫາ 2021 ແນວ​ລາວ​ສ້າງ​ຊາດ​ແຂວງ ຮ່ວມ​ກັບ​ຄະ​ນະ​ໂຄ​ສະ​ນາ​-ອົບ​ຮົມ​ແຂວງ, ອົງ​ການ​ຈັດ​ຕັ້ງ​ມ​ະ​ຫາ​ຊົນ​​ແຂວງ; ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ພະ​ແນກ​ແຮງ​ງານ-ສະ​ຫວັດ​ດີ​ການ​ສັງ​ຄົມ ແລະ ພະ​ແນ​ກ​ສາ​ທາ​ລະ​ນະ​ສຸກ ໄດ້ເຄື່ອນ​ໄຫວ​ເຜີຍ​ແຜ່​ໂຄ​ສະ​ນາ​ວຽກ​ງານ​ຕ້ານ ແລະ ສະ​ກັດ​ກັ້ນ​ການ​ແຜ່​ລະ​ບາດ​ພະ​ຍາດ​ໂຄວິດ 19 ທີ່​ສູນ​ຫລັກ 4 ແລະ ສູນ​ໂພນ​ສະ​ຫວ່າງ​ເໜືອ ​ໂດຍ​ແມ່ນ ທ່ານຄຳ​ວິ​ໃສ​ ຜຸຍ​ຍະ​ວົງ ຄະ​ນະ​ປະ​ຈຳ​ພັກ​ແຂວງ ຫົວ​ໜ້າ​ຄະ​ນະ​ໂຄ​ສະ​ນາ​-ອົບ​ຮົມ​ແຂວງ ເປັນ​ຫົວ​ໜ້າ​ຄະ​ນະ ແລະ ມີ​ພໍ່​ແມ່​ປະ​ຊາ​ຊົນ​ຢູ່​ພາຍໃນ​ສູນເຂົ້າຮ່ວມ​.

ເນື່ອງ​ຈາກ​ວ່າ​ພໍ່​ແມ່​ພີ່​ນ້ອງ​ພວກ​ເຮົາ​ເປັນ​ກຸ່ມ​ຄົນທີ່​ກັບ​ມາ​ຈາກ​ປະ​ເທດ ​ທີ່​ມີ​ຄວາມ​ສ່ຽງ​ສູງໃນ​ການ​ຕິດ​ເຊື້ອ​ພະ​ຍາດ​ໂຄວິດ 19, ສະ​ນັ້ນ​ ດ້ວຍ​ຄວາມ​ເປັນ​ຫ່ວງ​ເປັນ​ໃຍ​ຂອງ​ການ​ນຳ​ຂັ້ນ​ແຂວງ ກໍ່​ຄື​ແນວ​ລາວ​ສ້າງ​ຊາດ​ແຂວງ ແລະ​ ອົງ​ການ​ຈັດ​ຕັ້ງ​ມະ​ຫາ​ຊົນ​​ແຂວງ ຈຶ່ງ​ໄດ້​ລົງ​ພົບ​ປະ​ໂອ້​ລົມ​ໃຫ້​ຂໍ້​ມູນ​ຂ່າວ​ສາ​ນ​ກ່ຽວ​ກັບ​ລະ​ບຽບ​ການ​ຂອງ​ສູນ​ກັກ​ບໍ​ລິ​ເວນ, ການ​ປະ​ຕິ​ບັດ​ຕົວ​ໃນ​ຂະ​ນະ​ທີ່​ຕົນ​ຢູ່​ໃນ​ສູນ​ກັກ​ບໍ​ລິ​ເວນ, ຫລັກ​ການ​ອະ​ນາ​ໄມ​ຕ່າງໆ​ເຊັ່ນ: ການ​ລ້າງ​ມື​ດ້ວຍ​ສະ​ບູ, ໃສ່​ຜ້າ​ອັດ​ປາກ ແລະ ການ​ຮັກ​ສາ​ໄລ​ຍະ​ຫ່າງ​ເປັນ​ຕົ້ນ. ນອກ​ຈາກ​ນີ້​, ຍັງ​ໄດ້​ນຳ​ເອົາ​ເນື້ອ​ໃນ​ຈິດ​ໃຈ​ຂອງ​ແນວ​ທາງ​ນະ​ໂຍ​ບາຍ​ພັກ ແລະ ​ລັດ​ຖະ​ບານທີ່​ມີ​ຕໍ່​ແຮງ​ງານ​ທີ່​ເດີນ​ທ່າງ​ກັບ​ຈາກ​ຕ່າງ​ປະ​ເທດເພື່ອ​ສ້າງ​ຂວັນ​ກຳ​ລັງ​ໃຈ​ໃຫ້​ແກ່​ເຂົາ​ເຈົ້າ ໃຫ້​ມີ​ຄວາມ​ເຊື່ອ​ໝັ້ນ​ຕໍ່​ການ​ຊີ້​ນຳ-ນຳ​ພາ​ຂອງ​ພັກ-ລັດ ກໍ່​ຄື​ອຳ​ນາດ​ການ​ປົກ​ຄອງ​ຂັ້ນ​ທ້ອງ​ຖິ່ນ ເພື່ອສາ​ມາດ​ຜ່ານ​ຜ່າ​ວິ​ກິດ​ການ​ລະ​ບາດ​ພະ​ຍາດ​ໂຄວິດ 19 ຄັ້ງ​ນີ້​ໄດ້, ແຕ່​ທຸກ​ຄົນ​ຕ້ອງ​ມີ​ສ່ວນ​ຮ່ວມເພື່ອ​ບັນ​ລຸ​ຈຸດ​ມຸ້ງ​ໝາຍ​ດັ່ງ​ກ່າວ; ແນວ​ທາງ​ນະ​ໂຍ​ບາຍ​ຂອງ​ພັກ​-ລັດແມ່ນ​ໃຫ້​ຮັບ​ພີ່​ນ້ອງ​ຊາວ​ລາວທີ່​ໄປ​ອອກ​ແຮງ​ງານ​ຢູ່​ປະ​ເທດ​ເພື່ອ​ບ້ານກັບ​ຄືນ​ສູ່​ບ້ານ​ເກີດ​ເມືອງນອນ ໂດຍ​ບໍ່​ໄດ້​ເສຍ​ຄ່າ​ໃຊ້​ຈ່າຍ​ໃດໆ, ມີ​​ນະ​ໂຍ​ບາຍ​ໃນ​ການ​ຫາ​ເຊື້ອ​ພະ​ຍາດ ລວມ​ໄປ​ເຖິງ​ການ​ປິ່ນ​ປົວໂດຍບໍ່​ຄິດ​ມູນ​ຄ່າ; ນອກ​ຈາກ​ນີ້​ຍັງ​ຈະ​ໄດ້​ຮັບ​ການ​ສັກ​ວັກ​ຊິນ​ປ້ອງ​ກັນ​ພະ​ຍາດ​ໂຄວິດ 19 ອີກ​ດ້ວຍ.

ການ​ລົງ​ເຄື່ອນ​ໄຫວ​ໂຄ​ສະ​ນາ​​ຍັງ​ຈະ​ໄດ້​ສືບ​ຕໍ່​ໄປ​ອີກ 10 ສູນ​ຄື: ສູນ​ຫົວ​ເມືອງ​ເໜືອ, ສູນ​ໂພນ​ສະ​ຫວັນ, ສູນ​ໂຮງ​ຮຽນ​ການ​ຊ່າງ, ສູນ​ມໍ​ປາຍ​ໂພນ​ສະ​ຫວັນ, ສູນ​ສະ​ໜາມ​ໄຊ, ສູນໂຮງຮຽນທ່າ​ສະ​ໂນ, ສູນໂຮງຮຽນຊອກ, ສູນໂຮງຮຽນສອນ​ໄຊ, ສູນ ມ​ສ ອຸ​ທຸມ​ພອນ ແລະ ສູນ​ອັບ​ເກນພາຍ​ໃນ​ເທ​ສະ​ບານ​ແຂວງ​ສະ​ຫວັນ​ນະ​ເຂດ.

 

info@lfnd.org.la | 021 213754 | (856-21) 453191