ທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ໂຄງການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ຕິດພັນກັບການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ ຢູ່ເຂດຈຸດສຸມ 516 ກຸ້ມບ້ານໂພນສະຫວາດ ເມືອງ ລ້ອງຊານ ແຂວງ ໄຊສົມບູນ ໃນວັນທີ 4 ມິຖຸນາ 2020 ນີ້. ໂດຍມີທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ, ທ່ານ ສຈ ປອ ອ໋ອດ ພົງສະຫວັນ ກໍາມະການສູນກາງແນວລາວສ້າງຊາດ  ມີພາກ ສ່ວນທີ່ກ່ຽວຂ້ອງ ແລະ ຕາງໜ້າພໍ່ແມ່ປະຊາຊົນ 8 ບ້ານ ຂອງເມືອງລ້ອງຊານເຂົ້າຮ່ວມ.

ໂອກາດດັ່ງກ່າວທ່ານ ສີວິໄລ ພົມມະຈັກ ຜູ້ອໍານວຍການໃຫຍ່ກຸ່ມບໍລິສັດ ພົງສະຫວັນ ຈໍາກັດ ໄດ້ລາຍງານຄວາມຄືບໜ້າການຈັດຕັ້ງປະຕິບັດໂຄງການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ຕິດພັນກັບການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ. ເຊິ່ງໂຄງການດັ່ງກ່າວເປັນການຮ່ວມມືລະຫວ່າງສູນການແນວລາວສ້າງຊາດ, ກຸ່ມບໍລິສັດ ພົງສະຫວັນ ຈໍາກັດ ແລະ ແນວລາວສ້າງຊາດແຂວງ ໄຊສົມບູນ. ໃນປັດຈຸບັນ ໂຄງການດັ່ງກ່າວໄດ້ສຸມໃສ່ປັບປຸງລະບົບໂຄງລາງພື້ນຖານ ໂດຍສະເພາະ ການບຸກເບີກ ແລະ ຂະຫຍາຍເສັ້ນທາງໂຄງການໃຫ້ກວ້າງຂຶ້ນ, ຕິດຕັ້ງໄຟຟ້າແຮງກາງເຂົ້າໂຄງການເພີ່ມ, ໄດ້ມີການສ້າງສະໝາມເດັກຫລິ້ນ, ຈົກໜອງປາ, ເຈາະນໍ້າບານດານ 5​ ບໍ ແລະ ເຮັດຝາຍກັ້ນນໍ້າ. ພ້ອມດຽວກັນນັ້ນ, ກໍ່ໄດ້ມີການປັບປຸງ ແລະ ຂະຫຍາຍພື້ນທີ່ໃນການປູກຝັງ-ລ້ຽງສັດ, ສໍາລັບການປູກຝັງແມ່ນໄດ້ປູກໄມ້ໃຫ້ໝາກ ໂດຍແມ່ນ   ໝາກມ່ວງ ໃນເນື້ອທີ 6 ເຮັກຕາ, ໝາກມັງກອນ, ການປູກເຫັດ ແມ່ນໄດ້ສ້າງໂຮງເກັບດອກເຫັດ 4 ​ໂຮງ ພ້ອມທັງໂຮງອັດເບົາເຫັດ 1 ໂຮງ ແລະ ຈໍາໜ່າຍດອກເຫັດອອກສູ່ຕະຫຼາດເປັນປົກກະຕິ, ປູກສາລີ ໃນເນື້ອທີ 2 ໄລ່ ແລະ ຍັງໄດ້ປັບປຸງສວນກ້າເບ້ຍໄມ້ໃຫ້ໝາກ ແລະ ສວນກ້າເຫົ້ງາມັງກອນ ໄດ້ສ້າງເຮືອນໝາກແຕງ ແຄນຕາລູບ ໃນເນື້ອທີ່ 6 ​ເຮັກຕາ ແລະ ປູກຫຍ້າໃຫ້ສັດ ເຊິ່ງມີຫຍ້າ ລູຊີ ໃນເນື້ອທີ 6 ເຮັກຕາ, ຫຍ້າເບນຽຍພັນປາກຊ່ອງ 3 ໄລ່. ສໍາລັບວຽກງານລ້ຽງສັດ ແມ່ນໄດ້ກໍສ້າງໂຮງເຮືອນງົວນົມ ພ້ອມທັງປັບປຸງຮົ້ວຟາມງົວນົມ, ປັບປຸງຄອກໝູ, ແບ້, ໄກ່ ແລະ ເປັດຕື່ມອີກ.

ຕໍ່ບັນດາຜົນສໍາເລັດດັ່ງກ່າວ, ທ່ານປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ອໍານາດການປົກຄອງເມືອງ, ບ້ານ ແລະ ໂຄງການດັ່ງກ່າວທີ່ມີການພັດທະນາຢ່າງຕໍ່ເນື່ອງ ແລະ ມີໃບໜ້າໃໝ່ ໂດຍສະ ເພາະແມ່ນການພັດທະນາໂຄງລາງພື້ນຖານ ແລະ ການຊອກຫາທ່າແຮງບົ່ມຊ້ອນ ໂດຍມີການຊຸກຍູ້ສົ່ງເສີມ ໃຫ້ພໍ່ແມ່ປະຊາຊົນເຮັດການຜະລິດ ເພື່ອມາຜະລິດເປັນສິນຄ້າເພີ່ມມູນຄ່າ ແລະ ສ້າງລາຍຮັບເຂົ້າສູ່ຄອບຄົວ, ເຮັດໃຫ້ປະຊາຊົນມີວຽກເຮັດງານທຳ ແລະ ມີລາຍຮັບຢ່າງຕໍ່ເນື່ອງ ເພື່ອກ້າວໄປສູ່ການຫຼຸດພົ້ນອອກຈາກຄວາມທຸກຍາກເທື່ອລະກ້າວ. ທ່ານປະທານ ສນຊ ໄດ້ມີຄໍາເຫັນ ແລະ ເນັ້ນໜັກໃຫ້ອົງການປົກຄອງເມືອງລ້ອງຊານສືບຕໍ່ເອົາໃຈ່ໃສ່ໃຫ້ການສະໜັບສະໜູນ ບັນດາກິດຈະກຳຕ່າງໆຂອງໂຄງການ ຕາມພາ ລະບົດບາດ, ສິດ ແລະ ໜ້າທີ່ຂອງຕົນ; ອະທິບາຍໃຫ້ປະຊາຊົນໄດ້ຮັບຮູ້ ເຂົ້າໃຈເຖິງຄວາມສໍາຄັນຂອງໂຄງການຢ່າງເລິກເຊິ່ງ; ພ້ອມນັ້ນ, ຄະນະຮັບຜິດຊອບໂຄງການ ກໍຄືກຸ່ມ ບໍລິສັດພົງສະຫວັນ ເຊິ່ງຜ່ານມາເຮັດໄດ້ດີແລ້ວ ໃຫ້ສືບຕໍ່ຈັດຕັ້ງບັນດາກິດຈະ ກຳທີ່ໄດ້ກໍານົດໃນແຜນການນັ້ນ ໂດຍສະເພາະ ການຝຶກອົບຮົມໃຫ້ປະຊາຊົນ 8 ບ້ານ ທາງດ້ານຄວາມຮູ້, ດ້ານເຕັກນິກການປູກ-ການລ້ຽງ, ການສ້າງອາຊີບທີ່ໜັ້ນຄົງ  ແລະ ການສ້າງລາຍຮັບໃຫ້ແກ່ຄອບຄົວ; ຄຽງຄູ່ກັນນັ້ນ ທ່ານ ຍັງຮຽກຮ້ອງໃຫ້ພໍ່ແມ່ ປະຊາຊົນໃນເຂດພັດທະນາໂພນສະຫວາດ ກໍຄືປະຊາຊົນໃນ 8 ບ້ານ ໃຫ້ເອົາໃຈໃສ່ໃຫ້ຄວາມຮ່ວມມື, ເຂົ້າຮ່ວມພັດທະນາໂຄງການຮ່ວມກັນໃຫ້ດີຂຶ້ນເລື້ອຍໆ.

ຫຼັງຈາກນັ້ນ ທ່ານປະທານ ສນຊ ພ້ອມຄະນະ ໄດ້ປູກຕົ້ນໄມ້, ຢ້ຽມຢາມບັນດາກິດຈະກໍາໃນໂຄງການ ເປັນຕົ້ນ: ການຈົກໜອງປາ, ພື້ນທີ່ປູກຫຍ້າ, ພື້ນທີ່ປູກໄມ້ໃຫ້ໝາກ ແລະ ບັນດາກິດຈະກໍາຕ່າງໆອີກຈໍານວນໜຶ່ງ.