ສູນກາງແນວລາວສ້າງຊາດ

Lao Front For National Development

ໄຊຍະບູລີປະກາດເມືອງຫົງສາເປັນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ

ໃນວັນທີ 19 ມີນາ 2021 ນີ້, ແຂວງໄຊຍະບູລີໄດ້ຈັດພິທີປະກາດ ຮັບຮອງເອົາເມືອງຫົງສາເປັນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂຶ້ນຢູ່ທີ່ເດີ່ນກິລາຮົ່ມຂອງເມືອງ, ໂດຍການໃຫ້ກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ, ມີທ່ານ ຄຳສີ ແພງສະຫວັນ ກຳມະການປະຈຳພັກແຂວງ, ປະທານແນວລາວສ້າງຊາດແຂວງ, ທ່ານ ຄຳຫຼ້າ ຜິວວັນນາ ກຳມະການພັກແຂວງ, ເຈົ້າເມືອງຫົງສາ, ມີການນຳຂອງເມືອງ, ອົງການຈັດຕັ້ງບ້ານ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.

ທ່ານ ສົມຍົດ ອານຸວົງ ກຳມະການປະຈຳພັກເມືອງ, ປະທານແນວລາວສ້າງຊາດເມືອງ ໄດ້ຂຶ້ນລາຍງານການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ  ເຊິ່ງທ່ານໄດ້ໃຫ້ຮູ້ວ່າ ເມືອງຫົງສາຕັ້ງ ຢູ່ທາງທິດເໜືອຂອງແຂວງໄຊຍະບູລີ ຫ່າງຈາກເທດສະບານແຂວງ 86 ກິໂລແມັດ, ປະກອບມີ 32 ບ້ານ, ມີ 6,129 ຄອບຄົວ, ມີພົນລະເມືອງ 30,672 ຄົນ, ຍິງ 15,110 ຄົນ, ມີ 8 ເຜົ່າຄື: ເຜົ່າລາວ, ເຜົ່າກຶມມຸ, ເຜົ່າໄປຣ່, ເຜົ່າມົ້ງ, ເຜົ່າລື້, ເຜົ່າອິວມຽນ, ເຜົ່າໄຕ ແລະ ເຜົ່າຍວນ, ຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ແມ່ນການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດຂອງແນວລາວສ້າງຊາດຄັ້ງທີ X, ແນໃສ່ການປຸກລະດົມກໍາລັງແຮງສັງລວມທົ່ວປວງຊົນ ເຂົ້າຮ່ວມປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ເປັນຂະບວນຢ່າງກວ້າງຂວາງ ແລະ ຟົດຟື້ນ, ສ້າງຄວາມສາມັກຄີເປັນເອກະພາບຂອງປະຊາຊົນລາວບັນດາເຜົ່າ ໂດຍເລີ່ມຈາກຄອບຄົວ ແລະ ຮາກຖານບ້ານ ເປັນພື້ນຖານໃຫ້ແກ່ການສ້າງບ້ານພັດທະນາ, ອັນພື້ນຖານສຳຄັນ ໃນການສ້າງຄວາມເຂັ້ມແຂງຂອງເມືອງ, ສະແດງອອກທົ່ວເມືອງຫົງສາ ສາມາດສ້າງລາຍຮັບໄດ້ທັງໝົດ 644,32 ຕື້ກີບ, ລາຍຮັບສະເລ່ຍ 21,96 ລ້ານກີບຕໍ່ຄົນຕໍ່ປີ, ປະຈຸບັນຄອບຄົວທຸກຍາກຍັງເຫຼືອ 77 ຄອບຄົວ ເທົ່າກັບ 1,3%, ມີບ້ານທຸກຍາກ 1 ບ້ານ ເທົ່າກັບ 3,03%, ມີບ້ານພັດທະນາ 23 ບ້ານ, ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງແນວລາວສ້າງຊາດ ແມ່ນໄດ້ເລີ່ມແຕ່ ເດືອນພຶດສະພາ ປີ 2018 ເປັນຕົ້ນມາ, ຜ່ານການຈັດຕັ້ງປະຕິບັດຕົວຈິງ ໃນແຕ່ລະໄລຍະ ຄອບຄົວທີ່ໄດ້ຜ່ານຕາມມາດຖານເງື່ອນໄຂ ມີທັງໝົດຈຳນວນ 5,900 ຄອບຄົວ, ສາມາດຮັບຮອງເປັນຄອບຄົວສາມັກຄີປອງດອງແລ້ວ ຈຳນວນ 5,670 ຄອບຄົວ, ກວມເອົາ 96,10%, ປະກາດຮັບຮອງເປັນບ້ານສາມັກຄີປອງດອງແລ້ວ 30 ບ້ານ ກວມເອົາ 93,75%.

ໃນພິທີ ທ່ານ ເຈົ້າແຂວງໄຊຍະບູລີ ໄດ້ໃຫ້ກຽດຂຶ້້ນມອບໃບຢັ້ງຢືນ ເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ແນວລາວສ້າງຊາດ ແລະ ເປັນກຽດຂຶ້ນຮັບໂດຍທ່ານ ຄຳຫຼ້າ ຜິວວັນນາ ເຈົ້າເມືອງໆຫົງສາ, ຫຼັງຈາກນັ້ນຄະນະປະທານ ພ້ອມດ້ວຍແຂກ ແລະ ຜູ້ເຂົ້າຮ່ວມ ກໍ່ໄດ້ຮ່ວມກັນຕັດແຖບຜ້າເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນຕໍ່ພິທີດັ່ງກ່າວ.

info@lfnd.org.la | 021 213754 | (856-21) 453191