ສູນກາງແນວລາວສ້າງຊາດ

Lao Front For National Development

ສນຊ ໄດ້ຮັບເຄື່ອງຊ່ວຍເຫຼືອ

ໃນວັນທີ 7 ກໍລະກົດ 2017 ນີ້, ສູນກາງແນວລາວສ້າງຊາດ (ສນຊ) ໄດ້ຈັດພິທີ ມອບ-ຮັບ ເຄື່ອງຊ່ວຍເຫຼືອທີ່​ໄດ້​ຮັບ​ການ​ອຸປະຖຳ​ຈາກພຣະອາຈານ ພຸດທະສອນ ອ່ອນວົງສາ ພ້ອມດ້ວຍຄະນະສົງ ບ້ານນາໄຊ, ມູນນິທິຊ່ວຍເຫຼືອຄົນທຸກຍາກ ​ແຫ່ງ ສປປ ລາວ, ທ່ານ ນາງ ດວງຕາ ມາດມະນີສອນ ກຸ່ມບໍລິສັດດີເອັມຈໍາກັດຜູ້ດຽວ ແລະ ທ່ານ ນາງ ບົວວຽງ ເພັດທະລານຄໍາ ບໍລິສັດບັນດິດກໍ່ ສ້າງ, ລວມມູນຄ່າ ທັງໝົດ 16,091,000 ກີບ ໂດຍມີພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ກ່າວຮັບໂດຍ ທ່ານ ຮສ.ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ, ເຄື່ອງທີ່ໄດ້ຮັບຄັ້ງນີ້ປະກອບມີ: ເກີບ​ໂບກ 100 ຄູ່; ໝວກ 200 ໜ່ວຍ; ເສື້ອແຂນສັ້ນ ​ແລະ ແຂນຍາວ 200 ຜືນ; ໂສ້ງຂາສັ້ນ ​ແລະ ຂາຍາວ 200 ຜືນ; ຜ້າເຊັດ ໂຕໃຫຍ່ 100 ຜືນ; ຜ້າເຊັດໂຕນ້ອຍ 100 ຜືນ; ເສື້ອກັນຝົນ 100 ຜືນ; ນໍ້າຕານ 100 ກິໂລ; ເກືອ 200 ກິໂລ; ນໍ້າປາ 100 ແກ້ວ; ປ໋ອງປາ 20 ແກັດ; ແປ້ງນົວ 3 ເປົາ ພ້ອມດ້ວຍເຄື່ອງອຸປະ​ໂພ​ກ ​ແລະ ບໍລິ​ໂພ​ກອີກຈໍານວນໜຶ່ງ.

ທ່ານ ຮສ.ດຣ. ສົມອົກ ກິ່ງສະດາ ໄດ້ຕາງໜ້າຄະນະພັກ-ຄະນະນໍາ ສູນກາງແນວລາວສ້າງຊາດ ໄດ້ສະແດງຄວາມຂອບໃຈເປັນ ຢ່າງຍິ່ງຕໍ່ກັບຜູ້ທີ່ມີນໍ້າໃຈເອື້ອເຝຶ້ອເພື່ອແຜ່ ທີ່ໄດ້ມອບເຄື່ອງຊ່ວຍເຫຼືອໃນຄັ້ງນີ້ ແລະ ເຄື່ອງຈໍານວນດັ່ງກ່າວ ເພື່ອຈະນໍາໄປມອບ ໃຫ້ປະຊາຊົນຜູ້ທຸກຍາກຢູ່ເຂດຊາຍແດນ ລາວ-ຫວຽດນາມ ເພື່ອເປັນການຊ່ວຍເຫຼືອບັນເທົ່າທຸກ ໃຫ້ແກ່ປະຊາຊົນທີ່ທຸກຍາກ ​ແລະ ຂາດ​ເຂີນ​ດັ່ງກ່າວ.

info@lfnd.org.la | 021 213754 | (856-21) 453191