ສູນກາງແນວລາວສ້າງຊາດ

Lao Front For National Development

ໜ່ວຍຊາວໜຸ່ມແນວລາວສ້າງຊາດ ແຂວງຫຼວງພະບາງ ຮັບຮອງເປັນໜ່ວຍຊາວໜຸ່ມ 4 ບຸກ ຮອບທີ່ 2 ຄັ້ງທີ II

ວັນທີ 6 ກໍລະກົດ 2021 ນີ້ ຢູ່ຫ້ອງປະຊຸມແນວລາວສ້າງຊາດແຂວງ ໄດ້ຈັດພິທີປະກາດຮັບຮອງ ເປັນໜ່ວຍຊາວ ໜຸ່ມ 4 ບຸກ ຄັ້ງທີ II ໂດຍການເຂົ້າຮ່ວມ ຂອງທ່ານ ໄຊນະຄອນ ສຸດທິດາ ເລຂາຄະນະບໍລິຫານງານຊາວໜຸ່ມແຂວງ, ທ່ານ ນາງດວງມະນີ ອີນດາລັກ ຮອງປະທານແນວລາວສ້າງຊາດແຂວງ, ມີເລຂາໜ່ວຍຊາວໜຸ່ມແນວລາວສ້າງຊາດແຂວງ, ແຂກຖືກເຊີນ, ອົງການຈັດຕັ້ງມະຫາຊົນ ພາຍໃນແນວລາວສ້າງຊາດແຂວງ ຕະຫຼອດຮອດສະມາຊິກຊາວໜຸ່ມເຂົ້າຮ່ວມ.

ພິທີ ທ່ານ ສົມສັກ ຈອມແປງສຸກ ເລຂາໜ່ວຍຊາວໜຸ່ມແນວລາວສ້າງຊາດແຂວງ ຂື້ນຜ່ານບົດສະຫຼຸບການ ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ປະຈໍາປີ 2020 ແລະ ທິດທາງແຜນການປີ 2021 ວ່າ ໜ່ວຍຊາວໜຸ່ມ ແນວລາວສ້າງຊາດແຂວງ ເປັນໜ່ວຍເອກະລາດຂື້ນກັບການຊີ້ນໍາຂອງໜ່ວຍພັກແນວລາວສ້າງຊາດແຂວງ ແລະ ຂື້ນ ກັບຄະນະບໍລິຫານງານຊາວໜຸ່ມແຂວງ ປັດຈຸບັນສະມາຊິກຊາວໜຸ່ມແນວລາວສ້າງຊາດແຂວງມີທັງໝົດ 11 ທ່ານ, ຍິງ 5 ທ່ານ ໃນນັ້ນປະກອບມີຄະນະໜ່ວຍ 3 ທ່ານ, ຍິງ 2 ທ່ານ, ເປັນສະມາຊິກພັກ 9 ທ່ານ, ຍິງ 3 ທ່ານ, ເປັນສະມາຊິກກໍາມະບານ 11 ທ່ານ, ຍິງ 5 ທ່ານ ຜ່ານການຈັດຕັ້ງເຄື່ອນໄຫວປະຕິບັດເນື້ອໃນຂໍ້ແຂ່ງຂັນ 4 ບຸກ ໃນໄລຍະ 1 ປີຜ່ານມາຄື: ບຸກດ້ານແນວຄິດປະເມີນໄດ້ 93%, ບຸກດ້ານການຝຶກຝົນຫຼໍ່ຫຼອມຮໍ່າຮຽນ ປະເມີນໄດ້ 88%, ບຸກດ້ານການຈັດຕັ້ງປະເມີນໄດ້ 95%, ບຸກດ້ານວິຊາຊີບ-ສ້າງວຽກເຮັດງານທໍາ ປະເມີນໄດ້ 100%. ຈາກນັ້ນ, ຄະນະຈັດຕັ້ງ ຂື້ນຜ່ານຂໍ້ຕົກລົງ ຂອງຄະນະບໍລິຫານງານຊາວໜຸ່ມ ແຂວງ ວ່າດ້ວຍການມອບໃບຢັ້ງຢືນ ໃຫ້ໜ່ວຍຊາວໜຸ່ມ ແລະ ສະມາຊິກຊາວໜຸ່ມ ແນວລາວສ້າງຊາດແຂວງ ເປັນໜ່ວຍຊາວໜຸ່ມແຂງ 4 ບຸກ ຄັ້ງທີ II ປະຈໍາປີ 2020.

ຕອນທ້າຍ ທ່ານ ເລຂາຄະນະບໍລິຫານງານຊາວໜຸ່ມແຂວງ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ຍ້ອງຍໍຊົມ ເຊີຍຕໍ່ຜົນງານທີ່ໜ່ວຍຊາວໜຸ່ມແນວລາວສ້າງຊາດ ຍາດມາໄດ້ໃນຄັ້ງນີ້, ພ້ອມທັງເນັ້ນໜັກໃຫ້ຊາວໜຸ່ມ ທຸກສະຫາຍຕ້ອງຖືເອົາວຽກງານການເມືອງແນວຄິດເປັນຫຼັກ, ມີແບບແຜນວິທີເຮັດວຽກທີ່ຕົນຮັບຜິດຊອບ, ຕັ້ງໜ້າແກ້ໄຂປະກົດການຫຍໍ້ທໍ້ຕ່າງໆ,​ ຕັ້ງໜ້າຄົ້ນຄ້ວາຮໍ່າຮຽນມະຕິຕ່າງໆ ຂອງຂັ້ນເທິງວາງອອກ, ສືບຕໍ່ຄວາມສາມັກຄີເປັນເອກະພາບ ພາຍໃຕ້ການຊີ້ນໍາ-ນໍາພາຂອງພັກ ເຮັດໃຫ້ວຽກງານຊາວໜຸ່ມ ມີຄວາມໜັກແໜ້ນ ເພື່ອຍາດເອົາ 4 ບຸກໃນປີຕໍ່ໄປ.

info@lfnd.org.la | 021 213754 | (856-21) 453191