ສູນກາງແນວລາວສ້າງຊາດ

Lao Front For National Development

ໜ່ວຍພັກແນວລາວສ້າງຊາດແຂວງບໍ່ແກ້ວ ສໍາເລັດກອງປະຊຸມໃຫຍ່ ຄັ້ງທີ I

ໃນຕອນບ່າຍວັນທີ 7 ກໍລະກົດ 2020 ນີ້ ທີ່ຫ້ອງປະຊຸມແນວລາວສ້າງຊາດແຂວງ, ໜ່ວຍພັກແນວລາວສ້າງຊາດແຂວງ ໄດ້ເປີດກອງປະຊຸມໃຫຍ່ ຄັ້ງທີ I ຂຶ້ນ ໂດຍການເປັນປະທານຂອງ ສະຫາຍ ດາລີວັນ ພູສະຫວັນ ຄະນະປະຈໍາພັກແຂວງ ປະທານແນວລາວສ້າງຊາດແຂວງ, ໃຫ້ກຽດເຂົ້າຮ່ວມມີ ສະຫາຍ ປ.ອ ບົວຄົງ ນາມມະວົງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກແຂວງ,ເຈົ້າແຂວງບໍ່ແກ້ວ, ມີບັນດາເລຂາ-ຮອງເລຂາໜ່ວຍພັກ, ແຂກຖືກເຊີນ ແລະ ສະມາຊິກພັກສົມບູນເຂົ້າຮ່ວມຢ່າງພ້ອມພຽງ.

ໃນກອງປະຊຸມ, ໄດ້ຜ່ານບົດລາຍງານການເມືອງທັງສອງພາກ ໃນນັ້ນໄດ້ຕີລາຄາດ້ານດີ, ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ໃນໄລຍະຜ່ານມາ ແລະ ບົດສໍາຫຼວດການນໍາພາຊີ້ນໍາການຈັດຕັ້ງວຽກງານຮອບດ້ານ ຂອງຄະນະໜ່ວຍພັກແນວລາວສ້າງຊາດແຂວງຊຸດເກົ່າ ແລະ ທິດທາງແຜນການໃນຕໍ່ຫນ້າ. ໃນຂະນະດຽວກັນ ສະຫາຍ ສາທິດ ອານາຈັກ ຕາງຫນ້າໃຫ້ຄະນະຈັດຕັ້ງແຂວງ ໄດ້ຂຶ້ນຜ່ານມາດຖານ, ເງື່ອນໄຂ ແລະ ມະຕິຕົກລົງວ່າດ້ວຍການຮັບຮອງເອົາບຸກຄະລາກອນຜູ້ທີ່ເຂົ້າສະຫມັກເລືອກຕັ້ງເປັນຄະນະພັກຊຸດໃໝ່ ມີທັງໝົດ 5 ສະຫາຍ, ຍິງ 1 ສະຫາຍ ກອງປະຊຸມໄດ້ປ່ອນບັດເລືອກເອົາ ສະຫາຍ ດາລີວັນ ພູສະຫວັນ ເປັນເລຂາໜ່ວຍພັກແນວລາວສ້າງຊາດແຂວງ, ສະຫາຍ ສູນດາວັນ ບົວລິວົງ ເປັນຮອງເລຂາ ພ້ອມທັງເຮັດວຽກກວດກາໜ່ວຍພັກ, ສະຫາຍ ຄໍາດີ ສີປະເສີດ ເປັນກໍາມະການພັກ.

ໂອກາດນີ້ ປ.ອ ບົວຄົງ ນາມມະວົງ ເລຂາຄະນະບໍລິຫານງານພັກແຂວງ ເຈົ້າແຂວງ ແຂວງ ບໍ່ແກ້ວ ໄດ້ມີຄໍາເຫັນໂອ້ລົມຕໍ່ກອງປະຊຸມໃນຄັ້ງນີ້ ໂດຍທ່ານໄດ້ເນັ້ນໜັກໃຫ້ສະມາຊິກພັກແຕ່ລະສະຫາຍຈົ່ງຍົກສູງຄວາມຮັບຜິດຊອບໃນການເອົາໃຈໃສ່ແກ້ໄຂຈຸດອ່ອນຂໍ້ຄົງຄ້າງໄປພ້ອມໆກັບການເຄື່ອນໄຫວວຽກງານ ຂອງແນວລາວສ້າງຊາດ, ພ້ອມກັນຈັດຕັ້ງຜັນຂະຫຍາຍເຊື່ອມຊຶມເນື້ອໃນຈິດໃຈມະຕິກອງປະຊຸມ, ສ້າງແຜນການ ໂຄງການດໍາເນີນການໃນແຕ່ລະໄລຍະ, ຊຸກຍູ້, ກວດກາ, ຕິດຕາມການຈັດຕັ້ງປະຕິບັດ ພ້ອມທັງສະຫຼູບລາຍງານເປັນແຕ່ລະໄລຍະ, ສືບຕໍ່ເຮັດວຽກງານສຶກສາອົບຮົມການເມືອງແນວຄິດໃຫ້ຕໍ່ເນື່ອງ ແລະ ເປັນປົກກະຕິ, ພ້ອມກັນປະຕິບັດຕາມລະບຽບຂອງພັກ ກົດໝາຍຂອງລັດຢ່າງເຄັ່ງຄັດ, ເພີ່ມທະວີຄວາມສາມັກຄີໃຫ້ເປັນປຶກແຜ່ນແໜ້ນໜາ, ເອົາໃຈໃສ່ແກ້ໄຂບັນຫາຫາງສຽງສັງຄົມຢ່າງຈິງຈັງ, ຊີ້ນໍາ-ນໍາພາປັບປຸງກໍ່ສ້າງພັກ-ພະນັກງານ, ຖືສໍາຄັນການຫັນລົງສູ່ຮາກຖານ, ເອົາໃຈໃສ່ປັບປຸງຂະຫຍາຍສະມາຊິກພັກໃຫ້ມີຄຸນນະພາບ, ມີຄຸນທາດການເມືອງໜັກແໜ້ນ, ມີການຂ ້ນແຜນກໍານົດຕໍາແໜ່ງງານພະນັກງານນໍາພາຄຸ້ມຄອງໃຫ້ຖືກຕ້ອງ ສອດຄ່ອງກັບຄວາມຮູ້ຄວາມສາມາດຕາມວິຊາສະເພາະ ເພື່ອພ້ອມກັນນໍາໄປຈັດຕັ້ງປະຕິບັດວຽກງານໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້ໃນຕໍ່ຫນ້າ.

info@lfnd.org.la | 021 213754 | (856-21) 453191