ກອງປະຊຸມສໍາມະນາກ່ຽວກັບຊັ້ນຄົນໃນສັງຄົມລາວ ໄດ້ຈັດຂຶ້ນ ຢູ່ ຫ້ອງປະຊຸມຂອງແນວລາວສ້າງຊາດແຂວງຫຼວງພະບາງ ໃນວັນທີ 12 ມີນາ 2020 ນີ້ ໂດຍການເປັນປະທານຮ່ວມຂອງ ທ່ານ ປອ. ຄໍາແປງ ທິບມູນຕາລີ ຫົວໜ້າສະຖາບັນຄົ້ນຄວ້າສັງຄົມສາດ ສະຖາບັນວິທະຍາສາດສັງຄົມແຫ່ງຊາດ, ທ່ານ ເອິນ ລໍສະຫວັນ ກໍາມະການພັກແຂວງ, ປະທານແນວລາວສ້າງຊາດ ແຂວງຫຼວງພະບາງ, ມີ ທ່ານ ໄທລໍ ຫວາເຊັ້ງ ຫົວໜ້າກົມຊັ້ນຄົນ-ການຈັດຕັ້ງສັງຄົມ ສູນກາງແນວລາວສ້າງຊາດ, ທ່ານ ສໍສອນພິດ ພານຸວົງ ຫົວໜ້າກົມຊົນເຜົ່າ-ສາສະໜາ ກະຊວງພາຍໃນ, , ທ່ານ ຮສ.ປອ. ຄໍາມະນີ ສຸລິເດດ ຮອງຄະນະບໍດີຄະນະວິທະຍາສາດສັງຄົມ ມະຫາວິທະຍາໄລແຫ່ງຊາດ ຊື່ງມີພະນັກງານແນວລາວສ້າງຊາດແຂວງຫຼວງພະບາງ, ບັນດາຂະແໜງການທີ່ກ່ຽວຂ້ອງຂອງແຂວງຫຼວງພະບາງ, ຕົວແທນຈາກແນວລາວສ້າງຊາດແຂວງອຸດົມໄຊ ແລະ ບັນດາຂະແໜງການທີ່ກ່ຽວຂ້ອງຂອງແຂວງອຸດົມໄຊ ເຂົ້າຮ່ວມ ມີຜູ້ເຂົ້າຮ່ວມທັງໝົດ 47 ທ່ານ, ຍິງ 16 ທ່ານ.

ກອງປະຊຸມໄດ້ຮັບຟັງລາຍງານສະພາບການຄົ້ນຄວ້າຊັ້ນຄົນໃນໄລຍະຜ່ານມາໂດຍຫຍໍ້ ແລະຜ່ານເນື້ອໃນເອກະສານກ່ຽວກັບການຄົ້ນຄວ້າ 5 ຊັ້ນຄົນໃນສັງຄົມລາວ. ຈຸດປະສົງຂອງກອງປະຊຸມໃນຄັ້ງນີ້ ແມ່ນ ເພື່ອທາບທາມຜູ້ແທນຈາກສອງແຂວງເປົ້າໝາຍດັ່ງກ່າວ ວ່າມີຄວາມເປັນເອກະພາບກັບການຄົ້ນຄວ້າເບື້ອງຕົ້ນກ່ຽວກັບ 5 ຊັ້ນຄົນ ຫຼື ບໍ? ກອງປະຊຸມໄດ້ຍົກບັນຫາຂຶ້ນມາສົນທະນາແລກປ່ຽນບົດຮຽນ, ຜ່ານການປະກອບຄໍາເຫັນຈາກບັນດາຜູ້ແທນກອງປະຊຸມແມ່ນມີຄວາມເປັນເອກະພາບຢັ້ງຢືນເຫັນດີຕໍ່ກັບການຈັດແບ່ງ 05 ຊັ້ນຄົນໃນສັງຄົມລາວ ຄື:
1. ຊັ້ນຄົນກໍາມະກອນ; 2 ຊັ້ນຄົນກະສິກອນ; 3 ຊັ້ນຄົນນັກຮຽນຮູ້ປັນຍາຊົນ; 4 ຊັ້ນຄົນຜູ້ຊົງຄຸນວຸດທິ; 5 ຊັ້ນຄົນນັກທຸລະກິດ-ການຄ້າ.
ຕອນທ້າຍຂອງກອງປະຊຸມ ທ່ານ ປອ. ຄໍາແປງ ທິບມູນຕາລີ ຫົວໜ້າສະຖາບັນຄົ້ນຄວ້າສັງຄົມສາດ ສະຖາບັນວິທະຍາສາດສັງຄົມແຫ່ງຊາດ, ປະທານກອງປະຊຸມ ໄດ້ເໜັ້ນໃຫ້ຄະນະວິຊາການຄົ້ນຄວ້າຊັ້ນຄົນໃນສັງຄົມລາວ ສືບຕໍ່ຄົ້ນຄວ້າ, ປັບປຸງເນື້ອໃນເອກະສານການຈັດແບ່ງ 5 ຊັ້ນຄົນໃຫ້ລະອຽດຕື່ມ, ເພື່ອລາຍງານຂັ້ນເທິງພິຈາລະນາຮັບຮອງຕາມແຜນການທີ່ໄດ້ກໍານົດໄວ້ ເພື່ອເປັນເອກະສານ ນິຕິກໍາທາງການ ອໍານວຍຄວາມສະດວກໃຫ້ແກ່ການເຄື່ອນໄຫວ ແລະ ຈັດຕັ້ງປະຕິບັດວຽກງານ ໃນຕໍ່ໜ້າ.