ໃນວັນທີ 16 ກັນຍາ ຜ່ານມານີ້ ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານ ສູນກາງແນວລາວສ້າງຊາດ ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ຟື້ນຟູຜົນກະທົບຈາກໄພພິບັດ ຢູ່ເມືອງສະໜາມໄຊ ແຂວງ ອັດຕະປືເປັນຕົ້ນແມ່ນໄດ້ຢ້ຽມຢາມໂຄງການກໍ່ສ້າງຟື້ນຖານໂຄງລ່າງ ເຊັ່ນ: ການກໍ່ສ້າງເຮືອນຢູ່ຖາວອນ, ໂຮງຮຽນບ້ານຫີນລາດມາຮອດປະຈຸບັນ ແມ່ນມີຄວາມສຳເລັດ 95 % , ໂຄງການກໍ່ຫ້ອງການທ່າແສງຈັນ ມີຄວາມສຳເລັດປະມານ 40-45%, ສຸກສາລາບ້ານຫີນລາດມີຄວາມສຳເລັດປະມານ 80-85%, ເຂດຈັດສັນບ້ານຕະມໍຢອດ, ບ້ານດອນບົກທ່າແສງຈັນ ແລະ ບ້ານດົງບາກໃໝ່ຫີນຄໍາ ພ້ອມທັງຢ້ຽມຢາມຖາມຂ່າວຊີວິດການເປັນຢູ່ຂອງພໍ່ແມ່ປະຊາຊົນ ແລະ ຄູອາຈານ ແລະ ນ້ອງນັກຮຽນຢູ່ເຂດດັ່ງກ່າວ, ໂດຍມີ ທ່ານ ອຸ່ນຫຼ້າ ໄຊຍະສິດ ຄະນະປະຈໍາພັກແຂວງ-ຮອງເຈົ້າແຂວງອັດຕະປື ພ້ອມດ້ວຍຄະນະ ລົງຕິດຕາມ.
