ກອງປະຊຸມວີດີໂອຄອນ(VDO Call) ລະບົບທາງໄກ ເພື່ອປືກສາຫາລືກ່ຽວກັບການກະກຽມຄວາມພ້ອມ ໃນການຈັດກອງປະຊຸມສາກົນ ປະທານແນວໂຮມ 3 ປະເທດ ກຳປູເຈຍ-ລາວ-ຫວຽດນາມ ຄັ້ງທີ 4 ທີ່ຈະຈັດຂຶ້ນຢູ່ ປະເທດລາດຊະອານາຈັກກຳປູເຈຍ ໄດ້ຈັດຂຶ້ນໃນວັນທີ 12 ພະຈິກ 2020 ທີ່ສູນກາງແນວລາວສ້າງຊາດ.
ເປັນກຽດເຂົ້າຮ່ວມກອງປະຊຸມຄັ້ງນີ້ ຝ່າຍລາວນໍາໂດຍທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ຝ່າຍກຳປູເຈຍ ນໍາໂດຍທ່ານ ແຍມ ວາລີ ຮອງປະທານຜູ້ປະຈຳການ ແລະ ເລຂາທິການສະພາແນວໂຮມສາມັກຄີພັດທະນາມາຕຸພູມ ກຳປູເຈຍ ແລະ ຝ່າຍຫວຽດນາມ ນໍາໂດຍທ່ານ ຕື່ ແທັງ ເຫວ ຫົວໜ້າກົມພົວພັນຕ່າງປະເທດ ສູນກາງແນວໂຮມປະເທດຊາດຫວຽດນາມ ພ້ອມດ້ວຍຄະນະຜູ້ແທນ ແລະ ພະນັກງານທີ່ກ່ຽວຂ້ອງຂອງທັງ 3 ຝ່າຍເຂົ້າຮ່ວມ.
ກອງປະຊຸມຄັ້ງນີ້, ທັງ 3 ຝ່າຍໄດ້ລາຍງານ ແລະ ປຶກສາຫາລືນຳກັນກ່ຽວກັບການກະກຽມຄວາມພ້ອມ ໃນໄລຍະຜ່ານມາ ໃນການຈັດກອງປະຊຸມສາກົນ ປະທານແນວໂຮມ 3 ປະເທດ ກຳປູເຈຍ-ລາວ-ຫວຽດນາມ ຄັ້ງທີ 4 ທີ່ຈະຈັດຂຶ້ນໃນຕໍ່ຫນ້ານີ້ ເຊິ່ງ ທັງ 3 ຝ່າຍໄດ້ມີຄວາມເປັນເອກະພາບກັນ ທາງດ້ານເນື້ອໃນ, ວາລະກອງປະຊຸມ, ການໃຊ້ລະບົບທາງໄກວີດີໂອຄອນ (VDO call) ແລະ ຄວາມພ້ອມຈໍານວນໜຶ່ງ.