ພິທີດັ່ງກ່າວໄດ້ຈັດຂື້ນ ວັນທີ 1 ພະຈິກ 2020, ທີ່ບ້ານ ນາໄກ່, ເມືອງວຽງໄຊ ແຂວງຫົວພັນ, ໂດຍການເປັນກຽດເຂົ້າຮ່ວມຂອງທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວ ສ້າງຊາດ ພ້ອມດ້ວຍຄະນະ, ມີທ່ານ ຮອງເລຂາພັກແຂວງ, ຮອງເຈົ້າແຂວງ ແຂວງຫົວພັນ, ກຸ່ມບໍລິສັດ ພົງສະຫວັນ ແລະ ພາກສ່ວນກ່ຽວຂ້ອງເຂົ້າຮ່ວມ.
ກິດຈະກໍາກໍ່ສ້າງໂຮງແຮມ ວຽງໄຊ ແລະ ໂຄງການພັດທະນາການບໍລິການ ການຄ້າວຽງໄຊ ທີ່ຈະເລີ່ມກໍ່ສ້າງດັ່ງກ່າວ ແມ່ນການຮ່ວມມືລະຫວ່າງ ແນວລາວສ້າງຊາດ ແຂວງຫົວພັນ, ແນວລາວສ້າງຊາດ ເມືອງ ວຽງໄຊ ແລະ ກຸ່ມບໍລິສັດພົງສະຫວັນ ຈຳກັດ; ການພັດທະນາໂຄງການດັ່ງກ່າວ ເປັນຄັ້ງທຳອິດ ທີ່ກຸ່ມບໍລິສັດ ພົງສະຫວັນ ໄດ້ປະກອບສ່ວນພັດທະນາຢູ່ເຂດທີ່ໝັ້ນຂອງການປະຕິວັດ, ເຂດປະຫວັດສາດຂອງການນຳພັກ-ລັດ ທີ່ໄດ້ຊີ້ນຳນຳພາຂະບວນການຕໍ່ສູ້ປົດປ່ອຍປະເທດຊາດໃນເມື່ອກ່ອນ, ເພື່ອໃຫ້ເມືອງວຽງໄຊ ນັບມື້ໄດ້ຮັບການພັດທະນາຂື້ນ ເພື່ອຄວາມສະດວກໃນການຕອບສະໜອງດ້ານການທ່ອງທ່ຽວ ໃຫ້ແກ່ແຂກ ທັງພາຍໃນ ແລະ ຕ່າງປະເທດໃຫ້ໄດ້ມາດຕະຖານລະດັບພາກພື້ນ ແລະ ສາກົນ; ເປັນການດືງດູດເອົານັກທ່ອງທ່ຽວມາທ່ຽວ ຖ້ຳປະຫວັດສາດ, ທ່ອງທ່ຽວທຳມະຊາດ ທີ່ສວຍງາມ ແລະ ວັດທະນະທຳອັນຫຼາກຫຼາຍຂອງປະຊາຊົນບັນດາເຜົ່າ ຢູ່ແຂວງຫົວພັນ. ສະຖານທີ່ກໍ່ສ້າງຕັ້ງຢູ່ ບ້ານນາໄກ່ ເມືອງວຽງໄຊ, ມີເນື້ອທີ່ 10,660 ຕາແມັດ, ຈະສ້າງເປັນອາຄານສຸງ 7 ຊັ້ນ, ໃນນັ້ນຈະມີ: ຫ້ອງບໍລິການຈຳໜ່າຍຊື້-ຂາຍ ສິນຄ້າ, ໜ່ວຍບໍລິການ ທະນາຄານພົງສະຫວັນ ສາຂາແຂວງຫົວພັນ, ມີລະບົບໂຮງແຮມ ແລະ ຮ້ານອາຫານ
ຈາກນັ້ນທ່ານປະທານສູນກາງແນວລາວສ້າງຊາດ ພ້ອມດ້ວຍຄະນະນຳ ແຂວງຫົວພັນ, ເມືອງວຽງໄຊ ແລະ ອົງການຈັດຕັ້ງທີ່ກ່ຽວຂ້ອງ ໄດ້ໄປວາງສີລາເລີກ ກໍ່ສ້າງສູນກະສິກຳຕົວແບບຢູ່ ເຂດກຸ່ມ 5 ເມືອງວຽງໄຊ ແຂວງຫົວພັນ, ສູນກະສິກຳດັ່ງກ່າວ ມີເນື້ອທີ່ ປະມານ 50 ເຮັກຕາ ເຊີ່ງຈະເປັນໂຄງການຊຸກຍູ້ສົ່ງເສີມການຜະລິດກະສິກຳເປັນສິນຄ້າ ຕິດພັນກັບການທ່ອງທ່ຽວ ຜົນຜະລິດກະສິກຳ, ຈະສ້າງເປັນຕົວແບບທາງດ້ານການປູກຝັງ-ລ້ຽງສັດ ເປັນຕົ້ນແມ່ນການປູກໄມ້ກິນໝາກ, ປູກພືດຜັກຕ່າງໆ ປອດສານພິດ ແລະ ຈະສົ່ງເສີມການລ້ຽງສັດພື້ນເມືອງ ແລະ ລ້ຽງສັດແບບອຸດສາຫະກຳ ໃນການເພາະພັນ, ການປະສົມພັນທຽມ ແລະ ການສ້າງສາຍພັນໃໝ່, ເພື່ອປະກອບສ່ວນເຂົ້າໃນການສ້າງວຽກເຮັດງານທຳໃຫ້ຊາວໜຸ່ມ ແລະ ປະຊາຊົນ ໄດ້ຈຳນວນໜື່ງ ແລະ ເພື່ອນຳເອົາຜົນປະໂຫຍດມາໃຫ້ປະຊາຊົນບັນດາເຜົ່າ ທັງເປັນການພັດທະນາເສດຖະກິດສັງຄົມ ຢູ່ທ້ອງຖິ່ນ ເມືອງວຽງໄຊ ໃຫ້ນັບມື້ມີບາດກ້າວຂະຫຍາຍຕົວຂື້ນ.