ກອງປະຊຸມປືກສາຫາລື ກ່ຽວກັບການ ສ້າງຕັ້ງສະຫະພັນກະສິກອນລາວ ລະຫວ່າງ ສູນກາງແນວລາວສ້າງຊາດ ແລະ ກະຊວງກະສິກໍາ ແລະ ປ່າໄມ້, ໄດ້ຈັດຂຶ້ນໃນວັນທີ 25 ສິງຫາ 2021 ຢູ່ສູນຝຶກອົບຮົມ ສູນກາງແນວລາວສ້າງຊາດ, ໂດຍການເປັນປະທານ ຮ່ວມ ຂອງ ທ່ານ ສິນລະວົງ ຄຸດໄພທູນ, ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ທ່ານ ເພັດ ພົມພິພັກ, ລັດຖະມົນຕີກະຊວງກະສິກໍາ ແລະ ປ່າໄມ້, ມີຮອງປະທານ ສູນກາງແນວລາວສ້າງຊາດ, ຫົວໜ້າກົມ-ຮອງກົມ, ຫ້ອງການ ແລະ ພະແນກການກ່ຽວຂ້ອງສອງຝ່າຍເຂົ້າຮ່ວມ.
ໃນກອງປະຊຸມຜູ້ເຂົ້າຮ່ວມໄດ້ຮັບຟັງການສະເໜີກ່ຽວກັບການສ້າງຕັ້ງສະຫະພັນກະສິກອນລາວ, ເຊິ່ງການຈັດຕັ້ງສະຫະພັນກະສິກອນແມ່ນຈະໄດ້ເຕົ້າໂຮມເອົາບັນດາການຈັດຕັ້ງການຜະລິດ ໃນຂົງເຂດກະສິກໍາ-ປ່າໄມ້-ການປະມົງ ເຊັ່ນ: ສະມາຄົມ, ສະຫະກອນ, ກຸ່ມ ໃຫ້ກາຍເປັນການຈັດຕັ້ງທີ່ເຂັ້ມແຂງລວມສູນ ເພື່ອສຶກສາອົບຮົມການເມືອງ, ນໍາພາແນວຄິດໃຫ້ແກ່ຖັນແຖວປະຊາຊົນໃນຂົງເຂດກະສິກໍາ-ປ່າໄມ້ ໃຫ້ມີການປ່ຽນແປງຕົນເອງ ຫຼື ສ້າງການຫັນປ່ຽນໃໝ່ ຈາກການຜະລິດກະແຈກກະຈາຍ ເຄຶ່ງທໍາມະຊາດ ພໍກຸ້ມຢູ່ກຸ້ມກິນ ( ການຜະລິດເອກະເທດ, ກະແຈກກະຈາຍ ຂອງຊາວນາຜູ້ຜະລິດຂະໜາດນ້ອຍ-ຂະໜາດກາງ) ສູ່ການຜະລິດຂະໜາດໃຫຍ່, ການຜະລິດສິນຄ້າທີ່ມີຄຸນນະພາບ, ມີການແຂ່ງຂັນພາຍໃນ, ພາຍນອກ ແລະ ກ້າວສູ່ຕະຫຼາດສາກົນ. ດ້ວຍເຫດຜົນທີ່ກ່າວມານັ້ນ ໂດຍອີງໃສ່ມະຕິ 108 ຂອງກົມການເມືອງສູນກາງພັກ, ສູນກາງແນວລາວສ້າງຊາດຈິ່ງໄດ້ລິເລີ່ມໃນການສຶກສາ, ຄົ້ນຄ້ວາ ແລະ ຊູກຍູ້ ເພື່ອສະເໜີທິດໃນການສ້າງຕັ້ງສະຫະພັນກະສິກອນລາວຂຶ້ນ ເພື່ອຕອບສະໜອງກັບຄວາມຮຽກຮ້ອງຕ້ອງການ ຂອງການເຕີບໃຫຍ່ທາງດ້ານເສດຖະກິດ-ສັງຄົມ ໂດຍສະເພາະການເຕີບໃຫຍ່ຂະຫຍາຍຕົວທາງດ້ານການຜະລິດກະສິກໍາ ທີ່ນັບມື້ຫັນໄປສູ່ຄວາມທັນສະໄໝ, ການເຊື່ອມໂຍງສາກົນ,ພ້ອມນີ້ກໍ່ຕອບສະໜອງກັບຄວາມຮຽກຮ້ອງຕ້ອງການ, ຄວາມມຸ້ງມາດປາຖະໜາຂອງຊາວກະສິກອນທີ່ມີກໍາລັງອັນໄພສານຢູ່ປະເທດເຮົາ.
ຜ່ານການຮັບຟັງເນື້ອໃນດັ່ງກ່າວຜູ້ເຂົ້າຮ່ວມກໍ່ໄດ້ພ້ອມກັນປະກອບຄໍາຄິດ, ຄໍາເຫັນໃສ່ເນື້ອໃນດັ່ງກ່າວໃຫ້ມີຄວາມຄົບຖ້ວນສົມບູນ, ພ້ອມດຽວກັນນັ້ນ ທ່ານປະທານ ກອງປະຊຸມກໍ່ໄດ້ຮຽກຮ້ອງມາຍັງຄະນະຮັບຜິດຊອບດັ່ງກ່າວຈົ່ງພ້ອມກັນເອົາໃສ່ໃນການຈັດຕັ້ງປະຕິບັດການສ້າງຕັ້ງສະຫະພັນກະສິກອນລາວ ໃຫ້ມີຜົນສໍາເລັດຕາມລະດັບຄາດໜາຍທີ່ວາງໄວ້.
ຂ່າວ-ພາບ: ແສງຫລ້າ