ໃນວັນທີ 26 ກໍລະກົດ 2018 ນີ້, ທ່ານ ຈັນທະວົງ ແສນອາມາດມົນຕີ ພ້ອມດ້ວຍຄະນະ ໄດ້ໄປຢ້ຽມຢາມຖາມຂ່າວຄວາມທຸກສຸກ ຂອງພໍ່ແມ່, ອ້າຍ, ເອື້ອຍ, ນ້ອງປະຊາຊົນລາວບັນດາເຜົ່າຢູ່ແຕ່ລະຈຸດ ທີ່ຮອງຮັບປະຊາຊົນຍົກຍ້າຍອອກຈາກຫົກບ້ານເຂດທີ່ຖືກ ຜົນກະທົບຈາກເຂື່ອນດັ່ງກ່າວ ທີ່ເມືອງສະໝາມໄຊ ແຂວງອັດຕະປື. ດ້ວຍຄວາມເປັນຫວ່ງເປັນໄຍ, ເຫັນອົກເຫັນໃຈ ແລະ ໃຫ້ ກໍາລັງໃຈນໍາພໍ່ແມ່ປະຊາຊົນບັນດາເຜົ່າທີ່ຖືກຜົນກະທົບໃນຄັ້ງນີ້.

ພ້ອມດຽວກັນນັ້ນ, ທ່ານ ຈັນທະວົງ ແສນອາມາດມົນຕີ ຮອງປະທານ ສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຕາງໜ້າ ຄະນະພັກ, ຄະນະນໍາສູນກາງແນວລາວສ້າງຊາດ ມອບເຂົ້າຊ່ວຍເຫຼືອປະຊາຊົນທີ່ຖຶກຜົນກະທົບຈາກ ເຂື່ອນໄຟຟ້າເຊປ່ຽນ ທີ່ເມືອງສະໜາມໄຊ ແຂວງອັດຕະປື ເປັນເຂົ້າຈໍານວນ 5 ໂຕນ, ມູນຄ່າລວມທັງໝົດ 30.000.000 ກີບ ມອບໃຫ້ຫ້ອງວ່າການແຂວງອັດຕະປື ເພື່ອໄປຊ່ວຍເຫຼືອປະຊາຊົນທີ່ຖືກຜົນກະທົບໃນຄັ້ງນີ້.