ວັນທີ 12 ມິຖຸນາ 2020 ນີ້ ແນວລາວສ້າງຊາດເມືອງຮ້ຽມ ແຂວງຫົວພັນ ໄດ້ສຳເລັດກອງປະຊຸມໃຫຍ່ ຄັ້ງທີ VII ພາຍຫຼັງການດຳເນີນເປັນເວລາ 1 ວັນເຕັມ ຢູ່ທີ່ສະໂມສອນໃຫຍ່ຂອງເມືອງ ໂດຍການເປັນປະທານຂອງທ່ານ ສອນໄຈ ຮ້ຽມມີວັນ ປະທານແນວລາວສ້າງຊາດເມືອງ ແລະ ເປັນກຽດເຂົ້າຮ່ວມຂອງທ່ານ ພູວຽງ ອິນທະວົງທຳ ຮອງປະທານແນວລາວສ້າງຊາດແຂວງ ທ່ານ ປອ ບຸນວິໄຊ ກົງປະລີ ເລຂາພັກເມືອງ ເຈົ້າເມືອງຮ້ຽມ ມີບັນດາທ່ານ ກຳມະການແນວລາວສ້າງຊາດເມືອງ ທີ່ເປັນຕົວແທນໃຫ້ແກ່ບັນດາຊັ້ນຄົນ, ຊົນເຜົ່າ, ສາສະໜາ ທຸກເພດໄວ ອາດີດການນຳຂອງເມືອງ ພະນັກງານປະຕິວັດອາວຸໂສ ຕະຫຼອດຮອດບັນດາທ່ານຫົວໜ້າ ຮອງຫົວໜ້າຫ້ອງການອ້ອມຂ້າງເມືອງ ເຂົ້າຮ່ວມ.
ໃນກອງປະຊຸມ ທ່ານ ສອນເພັງ ຄຳມະວັນ ຄະນະປະຈຳພັກເມືອງ ຮັກສາການປະທານແນວລາວສ້າງຊາດເມືອງ ຜ່ານບົດລາຍງານການເມືອງທັງສອງພາກ ເຊິ່ງຍົກໃຫ້ເຫັນດ້ານດີຜົນງານ ດ້ານອ່ອນຂໍ້ຄົງຄ້າງ ແລະ ທິດທາງແຜນການໃນ 5 ປີຕໍ່ໜ້າ. ເມືອງຮ້ຽມຕັ້ງຢູ່ທິດຕາເວັນຕົກຂອງແຂວງຫົວພັນ ຫ່າງຈາກເທດສະບານແຂວງ 150 ກິໂລແມັດ ປະກອບມີ 35 ບ້ານ ມີພົນລະເມືອງທັງໝົດ 13 ພັກວ່າຄົນ, ຍິງ 6 ພັນກວ່າຄົນ ເຊິ່ງໃນໄລຍະ 5 ປີ ( 2015-2019 ) ຜ່ານມາ ແນວລາວສ້າງຊາດເມືອງ ມີກຳມະການແນວເມືອງທັງໝົດ 23 ທ່ານ, ຍິງ 3 ທ່ານ ໄດ້ເອົາໃຈໃສ່ ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນຢ່າງຕັ້ງໜ້າ ໃນການເປັນຄັນທຸງເຕົ້າໂຮມຄວາມສາມັກຄີປອງດອງບັນດາເຜົ່າ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດເວົ້າລວມ ເວົ້າສະເພາະ ພັດທະນາເມືອງຮ້ຽມໃຫ້ ມີຄວາມເຂັ້ມແຂງທາງດ້ານການເມືອງແນວຄິດ, ສັງຄົມມີຄວາມສະຫງົບ ເປັນລະບຽບ ຮຽບຮ້ອຍ ມີຄວາມສາມັກຄີ ປອງດອງສະແດງອອກ: ໄດ້ນຳເອົາແນວທາງຂອງພັກ, ນະໂຍບາຍ, ລະບຽບກົດໝາຍຂອງລັດ ແຕ່ລະໄລຍະ ລົງເຜີຍແຜ່ສຶກສາອົບຮົມ ກນເມືອງແນວຄິດ ໃຫ້ປະຊາຊົນບັນດາເຜົ່າ ມີຄວາມຮັບຮູ້ເຂົ້າໃຈ ເຊື່ອໝັ້ນຕໍ່ການນຳພາຂອງພັກ, ເຂົ້າຮ່ວມໄກ່ວເກ່ຍປະ ກົດການຫຍໍ້ທໍ້ຕ່າງໆທີ່ເກີດຂື້ນພາຍໃນເມືອງຕົກໄປດ້ວຍດີ, ຊຸກຍູ້ປະຊາຊົນເຂົ້າຮ່ວມປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ເປັນຕົ້ນແມ່ນ: ຂະບວນການສ້າງບ້ານສາທາລະນະສຸກ, ບ້ານວັດທະນະທຳ, ບ້ານພັດທະນາ ແລະ ບ້ານສາມັກຄີປອງດອງ ຂອງແນວລາວສ້າງຊາດຕິດພັນກັບການແກ້ໄຂຄວາມທຸກຍາກຂອງປະຊາຊົນ ໄດ້ 18 ບ້ານ ກວມເອົາ 51% ຂອງບ້ານທັງໝົດ, ຊຸກຍູ້ປະຊາຊົນບັນດາເຜົ່າປະຕິບັດແຜນພັດທະນາເສດຖະກິດ-ສັງຄົມຂອງເມືອງ ໂດຍສະເພາະແມ່ນໄດ້ຮ່ວມມືກັບບໍລິສັດ ຊິງຕາ ສົ່ງເສີມກະສິກຳຈຳກັດຜູ້ດຽວ ໃນການປູກໝາກແໜ່ງກວາງຕຸງ ສາຍພັນປັບປຸງໃໝ່, ຊຸກຍູ້ປະຊາຊົນປູກຜັກເຮືອນຮົ່ມສະໜອງໃຫ້ແກ່ຕະຫຼາດເມືອງ, ແຂວງ. ສຳລັບທິດທາງແຜນການໃນ 5 ປີຕໍ່ໜ້າ ຈະສືບຕໍ່ເຮັດວຽກງານສຶກສາອົບຮົມການເມືອງແນວຄິດ ເຕົ້າໂຮມຄວາມສາມັກຄີປະຊາຊົນບັນດາເຜົ່າ ໃຫ້ເປັນປຶກແຜ່ນ ແໜ້ນໜາ ເຮັດໃຫ້ເມືອງມີຄວາມສະຫງົບ ເປັນລະບຽບຮຽບຮ້ອຍໃນທົ່ວສັງຄົມ, ປຸກລະດົມປະຊາ ຊົນເຮັດການຜະລິດກະສິກຳເປັນສິນຄ້າດ້ວຍຫຼາຍຮູບການໃຫ້ນັບມື້ຫຼາຍຂື້ນ ເຮັດໃຫ້ເສດຖະກິດຂອງເມືອງມີການຂະຫຍາຍຕົວຕໍ່ເນື່ອງ ແລະ ໝັ້ນທ່ຽງ. ສຸມໃສ່ຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆຢ່າງຕັ້ງໜ້າເປັນຕົ້ນແມ່ນ: ບັນຫາສາສະໜາ, ບັນຫາຢາເສບຕິດ ແລະ ອື່ນໆ.
ຜູ້ແທນກອງປະຊຸມໄດ້ ປະຊາມະຕິຮັບຮອງເອົາ ກຳມະການແນວລາວສ້າງຊາດເມືອງຊຸດໃໝ່ ຈຳນວນ 27 ທ່ານ, ຍິງ 6 ທ່ານ. ໃນນີ້ຮັບຮອງເອົາ ທ່ານ ສອນເພັງ ຄຳມະວັນ, ຄະນະປະຈຳພັກເມືອງ ເປັນປະທານແນວລາວສ້າງຊາດເມືອງ, ຮັບຮອງເອົາ ທ່ານ ຄຳແພງ ແສງຄຳສັນ ແລະ ທ່ານ ບຸນສອນ ຫົກຄຳເພັງ ເປັນຮອງປະທານແນວລາວສ້າງຊາດເມືອງ, ຮັບຮອງເອົາ ຄະນະທີ່ປຶກສາຂອງແນວລາວສ້າງຊາດເມືອງຈຳນວນ 5 ທ່ານ, ຜູ້ຊົງຄຸນວຸດທິ ຈຳນວນ 5 ທ່ານ, ຄະນະປະຈຳແນວລາວສ້າງຊາດເມືອງ ຈຳນວນ 5 ທ່ານ.
ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຂອງທ່ານຮອງປະທານແນວລາວສ້າງຊາດແຂວງເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະກຳມະການແນວລາວສ້າງຊາດເມືອງຍາດມາໄດ້ໃນໄລຍະ 5 ປີ ຜ່ານມາ ແລະ ຮຽກຮ້ອງໃຫ້ຄະນະກຳມະການແນວລາວສ້າງຊາດເມືອງຊຸດໃໝ່ຈົ່ງພ້ອມກັນສຸມໃສ່ເຮັດວຽກງານສຶກສາອົບຮົມການເມືອງແນວຄິດເຕົ້າໂຮມຄວາມສາມັກຄີປະຊາຊົນບັນດາເຜົ່າໃຫ້ເປັນປຶກແຜ່ນແໜ້ນໜາ ໂດຍສະເພາະແມ່ນຜູ້ຊົງຄຸນວຸດທິຕ້ອງເປັນແບບຢ່າງ ແລະ ນຳພາລູກຫຼານປະຕິບັດແນວທາງຂອງພັກ ລະບຽບກົດໝາຍ, ແຜນພັດທະນາເສດຖະກິດ-ສັງຄົມຂອງລັດໃຫ້ເປັນຂະບວນການຟົດຟື້ນ, ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ, ຂະບວນການສ້າງຄອບຄົວ ແລະ ບ້ານສາມັກຄີປອງດອງໃຫ້ເລິກເຊິ່ງກວ້າງຂວາງ, ປັບປຸງກົງຈັກການຈັດຕັ້ງ ແລະ ແບບແຜນວິທີການນຳພາຂອງຄະນະແນວລາວສ້າງຊາດແຕ່ລະຂັ້ນໃຫ້ມີຄວາມເຂັ້ມແຂງໃນທຸກດ້ານ ສາມາດເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນຢ່າງເຕັມສ່ວນ.