ສູນກາງແນວລາວສ້າງຊາດ

Lao Front For National Development

1 ປີຜ່ານມາ ແນວລາວສ້າງຊາດແຂວງຄໍາມ່ວນ ສາມາດຍາດໄດ້ຜົນງານຫຼາຍດ້ານ

ເນື່ອງໃນໂອກາດ ຄົບຮອບ 71 ປີ ວັນສ້າງຕັ້ງແນວລາວສ້າງຊາດ (13 ສິງຫາ 1950–13 ສິງຫາ 2021). ໃນວັນທີ 10 ສິງຫາ 2021 ນີ້ ທີ່ຫ້ອງປະຊຸມແນວລາວສ້າງຊາດແຂວງ ທ່ານ ສຸກກະເສີມ ອຸດອນ ຮອງປະທານແນວລາວສ້າງຊາດ ແຂວງຄຳມ່ວນ ໄດ້ສະແດງທັດສະນະຄວາມຮູ້ສຶກ ແລະ ຍົກໃຫ້ເຫັນຜົນງານການເຄື່ອນໄຫວໃນໄລຍະ 1 ປີຜ່ານມາ ຂອງແນວລາວສ້າງຊາດແຂວງຄຳມ່ວນ.

ທ່ານໄດ້ກ່າວວ່າ: ແນວລາວສ້າງຊາດ ແມ່ນໄດ້ກຳເນີດເຕີບໃຫຍ່ ແລະ ຂະຫຍາຍຕົວຜ່ານ 3 ໄລຍະຄື: ໄລຍະທີ 1 ແມ່ນໄລຍະແນວລາວອິດສະຫຼະ ເຊິ່ງໃນໄລຍະນີ້ແມ່ນໄດ້ປະຕິບັດບົດບາດອອກໜ້າແທນພັກ ເພື່ອເຕົ້າໂຮມກ້ອນກໍາລັງສໍາພັນທະພາບ ລະຫວ່າງຊົນຊັ້ນກໍາມະກອນ-ຊາວກະສິກອນ ແລະ ບັນດາກໍາລັງການເມືອງ, ການຈັດຕັ້ງສັງຄົມຕ່າງໆ, ອອກແຮງເຕົ້າໂຮມຄວາມສາມັກຄີປອງດອງທົ່ວປວງຊົນອ້ອມຂ້າງເປັນຕົ້ນ: ສໍາພັນພິເສດກັບກອງທັບ ແລະ ປະຊາຊົນ ຫວຽດນາມອ້າຍນ້ອງ, ສໍາພັນ 03 ຊາດອິນດູຈີນ, ເຮັດສໍາເລັດພາລະກໍາປະຫວັດສາດອັນສະຫງ່າອົງອາດຄື: ປົດປ່ອຍຊາດ ອອກຈາກແອກປົກຄອງຂອງພວກລ່າເມືອງຂຶ້ນ ແບບເກົ່າ, ບັງຄັບໃຫ້ພວກລ່າເມືອງ ຂຶ້ນແບບເກົ່າເຊັນສັນຍາເຊີແນວ 1954 ຍອມຮັບຮູ້ເອກະລາດ ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ ເຮັດໃຫ້ຊື່ສຽງ ແລະ ບົດບາດຂອງລາວພົ້ນເດັ່ນ ຂຶ້ນໃນເວທີການເມືອງຂອງໂລກ, ໄລຍະທີ 2 ແມ່ນໄລຍະ ແນວລາວຮັກຊາດ ເປັນອົງການຈັດຕັ້ງເປີດເຜີຍ ຖືກກົດໝາຍ ຂອງພັກປະຊາຊົນລາວ ໃນເວລາທີ່ພັກບໍ່ມີເງື່ອນໄຂເຄື່ອນໄຫວເປີດເຜີຍ, ທຸກແຜນນະໂຍບາຍ ແລະ ນະໂຍບາຍຂອງພັກທັງຕໍ່ພາຍໃນ ແລະ ຕ່າງປະເທດ, ປຸກລະດົມປະຊາຊົນລາວບັນດາເຜົ່າ ເຂົ້າຮ່ວມການຕໍ່ສູ້ຕີເອົາຊະນະພວກສັດຕູຜູ້ຮຸກຮານຈົນໄດ້ຮັບໄຊຊະນະ ເປັນເງື່ອນໄຂໃຫ້ແກ່ການຍຶດອຳນາດ ທົ່ວປະເທດ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975, ໄລຍະທີ 3 ກໍ່ຄືໄລຍະແນວລາວສ້າງຊາດ (ໄລຍະປະຈຸບັນ) ເຊິ່ງແມ່ນໄລຍະໃນການປະຕິບັດ ນະໂຍບາຍສາມັກຄີລະຫວ່າງຊົນເຜົ່າ, ຊັ້ນຄົນ, ສາສະໜາ ແລະ ເພດ-ໄວ ໃນວົງຄະນາຍາດແຫ່ງຊາດ ບົນພື້ນຖານພັນທະພາບກໍາມະກອນ-ຊາວນາ ພາຍໃຕ້ການນໍາພາຂອງພັກ, ປະຕິບັດສິດເສລີພາບ ປະຊາທິປະໄຕ ຂອງພົນລະເມືອງ, ປຸກລະດົມຂະບວນການຟື້ນຟູເສດຖະກິດ-ສັງຄົມຂອງຊາດ, ແກ້ໄຂຜົນຮ້າຍຂອງສົງຄາມ ແລະ ຜົນຮ້າຍ ຂອງລະບອບເກົ່າປະໄວ້, ເຮັດໃຫ້ຊີວິດການເປັນຢູ່ ຂອງປະຊາຊົນເຂົ້າສູ່ຄວາມສະຫງົບປົກກະຕິ, ປະກອບສ່ວນຊຸກຍູ້ການປັບປຸງລະບົບການສຶກສາ ແລະ ອະນຸລັກວັດທະນະທໍາ, ລົບລ້າງຄວາມບໍ່ຮູ້ໜັງສື, ຍົກລະດັບຄວາມຮູ້ຂອງປະຊາຊົນໃຫ້ສູງຂຶ້ນ.

ພ້ອມກັນນີ້, ທ່ານ ກໍໄດ້ຍົກໃຫ້ເຫັນເຖິງຜົນງານການເຄື່ອນໄຫວຂອງແນວລາວສ້າງຊາດ ແຂວງຄຳມ່ວນ ໃນໄລຍະ 1 ປີຜ່ານມາ ວ່າ: ແນວລາວສ້າງຊາດ ໄດ້ເຄື່ອນໄຫວຊຸກຍູ້ຈັດຕັ້ງຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ ຢ່າງເປັນຂະບວນຟົດຟື້ນ ເຊິ່ງມາຮອດປັດຈຸບັນສາມາດຮັບຮອງເອົາບ້ານສາມັກຄີປອງດອງໄດ້ 404 ບ້ານ, ມີ 55.716 ຄອບຄົວ ແລະ ໄດ້ກະກຽມຄວາມພ້ອມຮອບດ້ານ ກ່ຽວກັບການຫ້າງຫາກະກຽມຈັດພິທີປະກາດຮັບຮອງ ເມືອງຈັດຕັ້ງປະຕິບັດ ຂະບວນການສ້າງຄອບຄົວ ແລະ ບ້ານສາມັກຄີປອງດອງ 04 ເມືອງຄື: ໜອງບົກ, ມະຫາໄຊ, ຫີນບູນ ແລະ ຄູນຄໍາ, ພ້ອມນັ້ນກໍ່ໄດ້ປຸກລະດົມວັດຖຸ, ປັດໃຈ ຈາກຄະນະອົງການພຸດທະສາສະໜາແຂວງ, ເມືອງ, ສາສະໜາກາໂທຣິກ ແລະ ອົງການຈັດຕັ້ງສັງຄົມຕ່າງໆ ເປັນມູນຄ່າ 32.500.000 ກີບ ເພື່ອນໍາໄປຊ່ວຍເຫຼືອ ປະຊາຊົນບັນດາເຜົ່າ 3 ຕົວເມືອງ ທີ່ຖືກຜົນກະທົບຈາກໄພພິບັດ, ຊ່ວຍເຫຼືອຄອບຄົວທຸກຍາກອານາຖາ 1 ຄອບຄົວ ແລະ ໄດ້ນຳເອົາເຄື່ອງອຸປະໂພກ, ບໍລິໂພກໄປມອບໃຫ້ສູນປິ່ນປົວ, ສູນກັກກັນ ເພື່ອກວດຫາເຊື້ອພະຍາດໂຄວິດ-19 ຂອງແຂວງ, ເຂົ້າຮ່ວມກອງປະຊຸມປຶກສາຫາລືກ່ຽວກັບໂຄງການສ້າງຄວາມເຂັ້ມແຂງ ໃຫ້ແນວລາວສ້າງຊາດ ໃນການປົກປ້ອງສິດຜົນປະໂຫຍດຂອງປະຊາຊົນບັນດາເຜົ່າ ໃຫ້ມີສ່ວນຮ່ວມໃນການຄຸ້ມຄອງ, ນໍາໃຊ້ຊັບພະຍາກອນທໍາມະຊາດ ແລະ ສິ່ງແວດລ້ອມແບບຍືນຍົງໃນຂັ້ນແຂວງ ແລະ ຂັ້ນເມືອງໃນ 3 ເມືອງຄື: ບົວລະພາ, ນາກາຍ ແລະ ຄຸນຄໍາ.

ເນື່ອງໃນໂອກາດ ຄົບຮອບ 71 ປີ ວັນສ້າງຕັ້ງແນວລາວສ້າງຊາດ ທ່ານກໍ່ໄດ້ຮຽກຮ້ອງມາຍັງອົງການຈັດຕັ້ງສັງຄົມ, ບັນດາລັດວິສາຫະກິດ, ຫົວໜ່ວຍທຸລະກິດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າ ຈົ່ງຮ່ວມໃຈກັນປຸກລະດົມ ວັດຖຸສິ່ງຂອງ, ເຄື່ອງບໍລິໂພກ, ອຸປະໂພກຕ່າງໆ ເພື່ອນໍາໄປປະກອບສ່ວນຊ່ວຍເຫຼືອແຮງງານລາວ ທີ່ກັບມາຈາກປະເທດໃກ້ຄຽງ ທີ່ກຳລັງກັກກັນ ແລະ ປິ່ນປົວເຊື້ອພະຍາດໂຄວິດ 19 , ພ້ອມທັງໃຫ້ກໍາລັງໃຈແພດ, ໝໍ, ກໍາລັງປ້ອງກັນຊາດ, ປ້ອງກັນຄວາມສະຫງົບ ທີ່ເຮັດໜ້າທີ່ໃນການຕ້ານ ແລະ ສະກັດກັ້ນ ການແຜ່ລະບາດ ຂອງພະຍາດໂຄວິດ 19 ຢູ່ແຂວງຄຳມ່ວນໃນປະຈຸບັນນີ້.

 

info@lfnd.org.la | 021 213754 | (856-21) 453191