ສູນກາງແນວລາວສ້າງຊາດ

Lao Front For National Development

10 ບ້ານ ຂອງເມືອງຫຼວງນ້ຳທາ ໄດ້ຮັບຮອງເປັນ ບ້ານສາມັກຄີປອງດອງ

ພິທີປະກາດຮັບຮອງເອົາ 10 ບ້ານ ເມືອງຫຼວງນ້ຳທາ ເປັນບ້ານສາມັກຄີປອງດອງຂອງແນວລາວສ້າງຊາດ ໄດ້ຈັດຂື້ນ ໃນວັນທີ 18​ ມີນາ 2021 ທີ່ສະໂມສອນເມືອງຫຼວງນ້ຳທາ ແຂວງຫຼວງນ້ຳທາ; ພາຍໃຕ້ການເປັນປະທານຂອງ ທ່ານ ຄຳພຸດ ໂພທິລາດ ກຳມະການປະຈໍາພັກເມືອງ, ປະທານແນວລາວສ້າງຊາດເມືອງ, ເປັນກຽດເຂົ້າຮ່ວມຂອງ ທ່ານ ຄຳຫຼ້າ ແຫຼ່ງໄຊຍະທຳ ຮອງເລຂາພັກເມືອງ ຮອງເຈົ້າເມືອງຫຼວງນ້ຳທາ ແລະ ທ່ານ ສົມຈ໋າຍ ແຝງຫຼ້າ ຮອງປະທານແນວສ້າງຊາດແຂວງ , ມີບັນດາຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງ, ພະນັກງານ-ລັດຖະ ກອນ ພ້ອວດ້ວຍປະຊາຊົນຂອງ 10 ບ້ານ ເຂົ້າຮ່ວມ.

ໃນພິທີ, ທ່ານ ສົມຈັນ ເລຂາພັກບ້ານໆຕາຫວານ ໄດ້ກ່າວເປີດພິທີຢ່າງເປັນທາງການ ແລະ ທ່ານ ຈັນທະລາ ອານມວງສິດ ປະທານແນວລາວສ້າງຊາດບ້ານນ້ຳຂອນ ໄດ້ຜ່ານບົດສະຫຼຸບການຈັດຕັ້ງປະຕິບັດ ວຽກງານຂະບວນການສ້າງຄອບຄົວ ແລະ ບ້ານສາມັກຄີປອງດອງ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ; ເຊິ່ງຜ່ານການຈັດຕັ້ງປະຕິບັດວຽກງານດັ່ງກ່າວ ແນວລາວສ້າງຊາດບ້ານ, ອົງການປົກຄອງບ້ານ ໄດ້ສົມທົບກັບ ແນວລາວສ້າງເມືອງ, ແຂວງ  ແລະ ພາກສ່ວນທີ່ກ່ຽວຂ້ອງ ເອົາໃຈໃສ່ ເຊື່ອມຊືມບັນດາເອກະສານຕ່າງໆທີ່ກ່ຽວຂ້ອງ, ເປັນຕົ້ນສຶກສາອົບຮົມ,​ ປຸກລະດົມ ປະຊາຊົນບັນດາເຜົ່າໃນບ້ານ ໃຫ້ມີຄວາມສາມັກຄີປອງດອງກັນ, ຊ່ວຍເຫຼືອເຊິ່ງກັນ ແລະກັນ, ເຂົ້າຮ່ວມຂະບວນການຕ່າງໆຂອງພັກ-ລັດ ແນໃສ່ການແກ້ໄຂຄວາມທຸກຍາກ ພາຍໃນຄອບຄົວໃຫ້ຫຼຸດພົ້ນຈາກຄວາມດ້ອຍພັດທະນາ. ຈາກນັ້ນ, ກໍ່ໄດ້ມອບໃບຢັ້ງຢືນຮັບຮອງ 10 ບ້ານ ເປັນບ້ານສາມັກຄີປອງດອງ ຂອງແນວລາວສ້າງຊາດ ໂດຍເປັນກຽດມອບ ຂອງ ທ່ານ ສົມຈ໋າຍ ແຝງຫຼ້າ ຮອງປະທານແນວລາວສ້າງຊາດແຂວງ ແລະ ທ່ານ ຄຳຫຼ້າ ແຫຼ່ງໄຊຍະທຳ ຮອງເລຂາພັກເມືອງ ຮອງເຈົ້າເມືອງຫຼວງນ້ຳທາ.

ໃນພິທີດັ່ງກ່າວນີ້ ທ່ານ ຄຳຫຼ້າ ແຫຼ່ງໄຊຍະທຳ ຮອງເລຂາພັກເມືອງ ຮອງເຈົ້າເມືອງຫຼວງນ້ຳທາ ກໍ່ໄດ້ໃຫ້ກຽດໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງອົງການປົກຄອງບ້ານ ແລະ ປະຊາຊົນພາຍໃນ 10 ບ້ານດັ່ງກ່າວ ໃນໄລຍະຜ່ານມາ ເຊິ່ງເຮັດໃຫ້ສາມາດຍາດໄດ້ນຳມະຍົດ ເປັນບ້ານສາມັກຄີ ແລະ ທ່ານ ຍັງໄດ້ເນັ້ນຕື່ມວ່າ: ໃຫ້ອົງການປົກຄອງບ້ານ ແລະ ຜູ້ຊົງຄຸນວຸດທິ ຈົ່ງສືບຕໍ່ສຶກສາອົບຮົມ, ປຸກລະດົມປະຊາຊົນບັນດາເຜົ່າພາຍ ໃນບ້ານຂອງຕົນໃຫ້ມີຄວາມສາມັກຄີປອງດອງກັນ, ສຶບຕໍ່ເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ, ສ້າງເສດຖະກິດຄອບຄົວ ໃຫ້ກາຍເປັນຄອບຄົວພົ້ນທຸກ ແລະ ເປັນຄອບຄົວພັດທະນາ ໃຫ້ຢືນຍົງຕະຫຼອດໄປ.

info@lfnd.org.la | 021 213754 | (856-21) 453191