ສູນກາງແນວລາວສ້າງຊາດ

Lao Front For National Development

3 ອົງການຈັດຕັ້ງມະຫາຊົນ ສນຊ ແລະ ກຸ່ມບໍລິສັດ ພົງສະຫວັນ ຈຳກັດ ຈັດກິດຈະກໍາພົບປະສ້າງສັນກັບໂຮງງານສື່ສານກອງທັບ 209

ວັນທີ 20 ມັງກອນ ແມ່ນວັນທີ່ມີຄວາມໝາຍສຳຄັນໃນປະຫວັດສາດຂອງຊາດ ເຊິ່ງເປັນວັນກຳເນີດກອງທັບປະຊາຊົນລາວ, ກ່ອນໜ້ານີ້ 69 ປີ ຄືວັນທີ 20 ມັງກອນ 1949 ກອງຮ້ອຍລາດຊະວົງ ໄດ້ຮັບການສ້າງຕັ້ງຂຶ້ນ ເຊິ່ງນຳພາໂດຍກົງຮອບດ້ານ ຂອງທ່ານປະທານ ໄກສອນ ພົມວິຫານ ຜູ້ນຳທີ່ປີຊາສາມາດຂອງການປະຕິວັດລາວ ກໍຄືປະຊາຊົນລາວບັນດາເຜົ່າ. ສະນັ້ນ, ເພື່ອເປັນການຫວນຄືນການກຳເນີດ, ການເຕີບໃຫຍ່ຂະຫຍາຍຕົວ ແລະ ຄວາມເຂັ້ມແຂງຂອງກອງທັບປະຊາຊົນລາວ;

ວັນທີ 23 ມັງກອນ 2018 ທີ່ໂຮງງານສື່ສານກອງທັບ 209, ຄະນະພັກ-ຄະນະປະຈຳ ສູນກາງແນວລາວສ້າງຊາດ (ສນຊ) ນຳໂດຍທ່ານ ເຍ່ຍເກີຢ່າ ໜໍຈໍຈົງຕົວ ຄະນະພັກ, ຮອງປະທານ ສນຊ, ປະທານກຳມະບານ ສນຊ ພ້ອມດ້ວຍ 3 ອົງການຈັດຕັ້ງມະຫາຊົນ ສນຊ ແລະ ກຸ່ມບໍລິສັດພົງສະຫວັນ ຈຳກັດ ໄດ້ຈັດກິດຈະກຳພົບປະສ້າງສັນກັບຄະນະພັກ-ຄະນະບັນຊາ ພ້ອມດ້ວຍພະນັກງານ-ນັກຮົບ ທົ່ວກົມກອງ 209 ເຊິ່ງນຳໂດຍທ່ານ ພັນໂທ ສຸລິວົງ ລີກ້າຢົວ ຮອງເລຂາຄະນະພັກຮາກຖານ, ຫົວໜ້າການເມືອງໂຮງງານສື່ສານກອງທັບ 209;


ໃນພິທີ, ທ່ານ ຮອງປະທານ ສນຊ ໄດ້ມີຄຳເຫັນບາງເນື້ອໃນສຳຄັນວ່າ: ເປັນເວລາ 69 ປີແລ້ວ ທີ່ກອງທັບປະຊາຊົນລາວ ໄດ້ກຳເນີດເຕີບໃຫຍ່ຂະຫຍາຍຕົວ, ເຊິ່ງເປັນໄລຍະແຫ່ງການເວລາທີ່ໄດ້ຜ່ານການທົດສອບນາໆປະການລະອິດລະອ້ຽວ ໃນຂະບວນການປະຕິວັດຊາດຫຼາຍສິບປີ ໂດຍເລີ່ມຈາກ 25 ຄົນເທົ່ານັ້ນ ແລະ ຕໍ່ສູ້ຕ້ານຈັກກະພັດຜູ້ຮຸກຮານທັງແບບເກົ່າ ແລະ ແບບໃໝ່ ທີ່ທັນສະໄໝໃນໂລກ ແຕ່ກອງທັບພວກເຮົາ ພາຍໃຕ້ການນຳພາຂອງພັກ, ການສະໜັບສະໜູນຂອງປະຊາຊົນລາວບັນດາເຜົ່າ ແລະ ປະຊາຄົມຜູ້ຮັກຫອມສັນຕິພາບໃນໂລກ ກໍສາມາດຍາດໄດ້ໄຊຊະນະເປັນກ້າວໆມາ ແລະ ຍິ່ງຕີຍິ່ງຊະນະ ເຮັດໃຫ້ກອງທັບເຮົາເຕີບໃຫຍ່ຂະຫຍາຍຕົວທັງປະລິມານ ແລະ ຄຸນນະພາບຄືທຸກວັນນີ້. ສຳລັບສາຍພົວພັນລະຫວ່າງສູນກາງແນວລາວສ້າງຊາດ ແລະ ກອງທັບປະຊາຊົນລາວ ແມ່ນສະໜິດຕິດພັນກັນ ເພາະວ່າແນວລາວສ້າງຊາດປະຈຸບັນກໍສືບທອດພາລະກຳປະຫວັດສາດອັນສະຫງ່າລາສີຂອງແນວລາວອິດສະຫຼະ ແລະ ແນວລາວຮັກຊາດ ໃນເມື່ອກ່ອນທີ່ໄດ້ສ້າງຕັ້ງຂື້ນໃນວັນທີ 13 ສິງຫາ 1950. ເຖິງແນວໃດກໍ່ຕາມໃນໂອກາດນີ້ ເພື່ອເພີ່ມທະວີຄວາມສາມັກຄີ, ຄວາມຮັກແພງ ແລະ ເພື່ອໃຫ້ຄົນຮຸ່ນໜຸ່ມເຫັນໄດ້ຄວາມໝາຍສຳຄັນຂອງວັນດັ່ງກ່າວ ຄະນະນຳ ສນຊ ຈິ່ງອຳນວຍຄວາມສະດວກໃຫ້ພວກເຮົາໄດ້ປະຕິບັດຕາມແຜນການ, ຈາກນັ້ນທ່ານ ພັນໂທ ສຸລິວົງ ລີກ້າຢົວ ກໍໄດ້ສະແດງຄວາມຮູ້ສຶກໂດຍທ່ານກ່າວວ່າ: ຂ້າພະເຈົ້າຂໍຕາງໜ້າໃຫ້ຄະນະພັກ-ຄະ ນະບັນຊາ ແລະ ອ້າຍເອື້ອຍນ້ອງໃນກົມກອງ 209 ສະແດງຄວາມຂອບໃຈເປັນຢ່າງສູງ ແລະ ຝາກຄວາມຢ້ຽມຢາມຖາມຂ່າວເຖິງຄະນະພັກ-ຄະນະນຳ ສນຊ ແລະ ກຸ່ມບໍລິສັດພົງສະຫວັນ ຈຳກັດ ທຸກທ່ານ.

ການພົບປະຢ້ຽມຢາມ ແລະ ຈັດກິດຈະກຳສ້າງສັນຄັ້ງນີ້, ສນຊ ກັບກຸ່ມບໍລິສັດພົງສະຫວັນ ຈຳກັດ ໄດ້ມອບເຄື່ອງກິລາ 45 ຊຸດ, ເຄື່ອງດື່ມ ແລະ ເງິນສົດລວມມູນຄ່າ 6,300,000 ກີບ (ຫົກລ້ານສາມແສນກີບ) ແລະ ໄດ້ແຂ່ງຂັນກິລາບານເຕະ, ກິລາເປຕັງຍິງ-ຊາຍ ແບບມິດຕະພາບຮ່ວມກັນຢ່າງເບີກບານມ່ວນຊື່ນ.

info@lfnd.org.la | 021 213754 | (856-21) 453191