ໜ່ວຍພັກກົມກວດກາ, ກົມໂຄສະນາ  ແລະ ກົມຊົນເຜົ່າ ສູນກາງແນວລາວສ້າງຊາດ ໄດ້ຈັດພິທີຮັບສະມາຊິກພັກໃໝ່ 4 ສະຫາຍ. ໂດຍການເປັນກຽດ ເຂົ້າຮ່ວມ ຂອງ ສະຫາຍ ຈັນທະວົງ ແສນອາມາດມົນຕີ  ຮອງປະທານສູນກາງແນວລາວສ້າງຊາດ, ມີບັນດາສະຫາຍເລຂາ ໜ່ວຍພັກອ້ອມຂ້າງສູນກາງ,  ຕາງໜ້າອົງການຈັດຕັ້ງຫາຊົນ ແລະ ສະມາຊິກພັກສົມບູນ, ສຳຮອງເຂົ້າຮ່ວມ ໃນວັນທີ 27 ພະຈິກ 2020 ຢູ່ສູນກາງແນວລາວສ້າງຊາດ.

ໃນພິທີ ສະຫາຍ ຈັນທະວົງ ແສນອາມາດມົນຕີ ໄດ້ມີຄຳເຫັນໂອ້ລົມ ແລະ ຍົກໃຫ້ເຫັນເນື້ອໃນວັດຖຸຈຸດປະສົງຂອງພັກປະຊາຊົນ ປະຕິວັດລາວ ແມ່ນການນຳພາປວງຊົນລາວທັງຊາດ ດຳເນີນພາລະກິດປ່ຽນແປງໃໝ່ ຮອບດ້ານ ທີ່ມີຫຼັກການຂອງພັກ, ປົກປັກຮັກສາປະເທດຊາດໄວ້ໃຫ້ໝັ້ນຄົງ, ກໍ່ສ້າງລະບອບປະຊາທິປະໄຕປະຊາຊົນ ໃຫ້ບັນລຸຕາມຈຸດໝາຍສັງຄົມນິຍົມ; ຢຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ ແລະ ມູນເຊື້ອອັນດີງາມຂອງພັກ ເປັນພື້ນຖານທາງດ້ານແນວຄິດ, ທິດສະດີຂອງພັກ, ເປັນເຂັມທິດໃຫ້ແກ່ການຈັດຕັ້ງ ແລະ ການເຄື່ອນໄຫວຂອງພັກ. ໃນນີ້ທ່ານ ໄດ້ຮຽກຮ້ອງໃຫ້ສະມາຊິກພັກໃໝ່ຈົ່ງເອົາໃຈໃສ່ຄົ້ນຄວ້າເຊື່ອມຊຶມຝຶກຝົນຫຼໍ່ຫຼອມຕົນເອງ ເພື່ອໃຫ້ແຫຼມຄົມໃນທຸກດ້ານ ກຳໄດ້ກ່ຽວກັບກົດລະບຽບຂອງພັກປະຊາຊົນ ປະຕິວັດລາວໂດຍສະເພາະການກໍ່ສ້າງ ແລະ ປັບປຸງຕົນເອງຕາມ 5 ຫຼັກການ 3 ທິດນຳ, 5 ໜ້າທີ່, 6 ສິດ ແລະ 9 ຂໍ້ຫ້າມ ຂອງສະມາຊິກພັກ; ໄດ້ເນັ້ນໝັກໃຫ້ສະມາຊິກພັກໃໝ່ທຸກສະຫາຍເອົາໃຈໃສ່ເປັນແບບຢ່າງຝຶກຝົນຫຼໍ່ຫຼອມຕົນເອງເປັນແບບຢ່າງໃຫ້ມະຫາຊົນ ຕື່ນຕົວເຂົ້າຮ່ວມປະກອບສ່ວນຂະບວນການຕ່າງໆ ໃຫ້ເຫັນໄດ້ຜົນງານອອກໃນຂະບວນການ ໂດຍສະເພາະວຽກງານວິຊາສະເພາະທີ່ຕົນເອງຮັບຜິດຊອບ.  ພ້ອມດຽວກັນນີ້ ສະຫາຍເລຂາໜ່ວຍພັກ ແຕ່ລະກົມກໍ່ໄດ້ຂຶ້ນມອບ ມະຕິຕົກລົງ ວ່າດ້ວຍການເລື່ອນສະມາຊິກພັກສຳຮອງຂຶ້ນເປັນສົມບູນ ໃຫ້ສະມາຊິກພັກໃໝ່.