ກອງປະຊຸມສາມັນຄົບຄະນະກໍາມະການ ສູນກາງແນວລາວສ້າງຊາດ (ສນຊ) ຄັ້ງທີ 5 ສະໄໝທີ XI ເປີດຂຶ້ນຢ່າງເປັນທາງການ ໂດຍການເປັນປະທານຂອງທ່ານ ປອ. ສິນລະວົງ ຄຸດໄພທູນ ກຳມະ ການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີບັນດາທ່ານຄະນະກຳມະການ ສນຊ ອ້ອມຂ້າງສູນກາງ, ນະຄອນຫລວງ-ບັນດາແຂວງທົ່ວປະເທດ, ແຂກຖືກເຊີນຈາກກະຊວງ-ອົງການ, ຄອບຄົວການນໍາ ສນຊ ເຂົ້າຮ່ວມ 170ທ່ານ, ຍິງ 40 ທ່ານ, ທີ່ຫ້ອງປະຊຸມໂຮງແຮມແລນມາກ ນະຄອນຫຼວງວຽງຈັນ, ວັນທີ 24 ທັນວາ 2025 ແບບເຊິ່ງໜ້າ ແລະ ທາງໄກ;
ທ່ານປະທານສູນກາງແນວລາວສ້າງຊາດ ໄດ້ເປັນກຽດກ່າວເປີດກອງປະຊຸມ ຢ່າງເປັນທາງການ ໂດຍມີ ເນື້ອໃນບາງຕອນວ່າ: ກອງປະຊຸມຄັ້ງນີ້ດໍາເນີນໃນທ່າມກາງທີ່ປະເທດຊາດພວກເຮົາຍັງຢູ່ໃນບັນຍາກາດເບີກບານມ່ວຍຊື່ນຕໍ່ການສະເຫຼີມສະຫຼອງວັນຊາດ 2 ທັນວາ ຄົບຮອບ 50 ປີ, ວັນຄ້າຍວັນເກີດປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 105 ປີ ຕິດພັນກັບການກະກຽມດໍາເນີນກອງປະຊຸມໃຫຍ່ ຄັ້ງທີ XII ຂອງພັກ ແລະ ກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XII ໃນຕໍ່ໜ້າ; ກອງປະຊຸມຄັ້ງນີ້ເປັນຄັ້ງສຸດທ້າຍຂອງສະໄໝທີ XI ສະນັ້ນ, ພວກເຮົາຈະໄດ້ພ້ອມກັນລົງເລິກຫຼາຍບັນຫາສຳຄັນ ຄື:1) ຕີລາຄາຜົນການເຄື່ອນໄຫວຮອບດ້ານວຽກງານແນວລາວສ້າງຊາດ ປະຈໍາປີ 2025 ແລະ ທິດທາງແຜນວຽກຈຸດສຸມປະຈໍາປີ 2026 ໂດຍສະເພາະແມ່ນການກະກຽມດໍາເນີນກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XII; 2) ຕີລາຄາໝາກຜົນຂອງການຈັດຕັ້ງປະຕິບັດແຜນພັດທະນາອົງການແນວລາວສ້າງຊາດ ປະຈໍາປີ 2025 ແລະ ທິດທາງແຜນການປີ 2026; 3) ປຶກສາຫາລືວຽກງານສຳຄັນເພື່ອກຽມຄວາມພ້ອມການດໍາເນີນກອງປະຊຸມໃຫຍ່ຜູ້ແທນແນວລາວສ້າງຊາດ ທົ່ວປະເທດ ຄັ້ງທີ XII; 4) ຕີລາຄາຜົນການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ; 5) ປະກອບຄຳເຫັນຕໍ່ ຮ່າງຂໍ້ຕົກລົງຂອງ ຄະນະຈັດຕັ້ງສູນກາງພັກ ກ່ຽວກັບສ້າງຕັ້ງມູນນິທິສາມັກຄີພັດທະນາແນວລາວສ້າງຊາດ; 6) ລາຍງານກ່ຽວກັບເປົ້າໝາຍທີ່ຈະໄດ້ຮັບການຍ້ອງຍໍ ຂອງ ສນຊ, ເປົ້າໝາຍທີ່ຈະສະເໜີໃຫ້ຍ້ອງຍໍລະດັບຊາດ ແລະ ຕົວແທນ ຂອງ ສນຊ ລົງສະໝັກເລືອກຕັ້ງເປັນສະມາຊິກສະພາແຫ່ງຊາດ ຊຸດທີ X; 7) ປະເມີນຜົນ ແລະ ສະເໜີບຸກຄະລາກອນແນວລາວສ້າງຊາດ ສະໄໝທີ XII.
ພ້ອມນີ້, ທ່ານປະທານສູນກາງແນວລາວສ້າງຊາດ ໄດ້ຮຽກຮ້ອງມາຍັງບັນດາທ່ານທີ່ເຂົ້າຮ່ວມກອງປະຊຸມ ຈົ່ງເຊີດຊູຄວາມຮັບຜິດຊອບຂອງຕົນໃຫ້ສູງ, ສຸມສະຕິປັນຍາ ແລະ ເຫື່ອແຮງຂອງຕົນ ເພື່ອປະກອບຄໍາຄິດຄໍາເຫັນຢ່າງສ້າງສັນ ແລະ ຮັບປະກັນ ເຮັດໃຫ້ກອງປະຊຸມເທື່ອນີ້ ສໍາເລັດຜົນຢ່າງຈົບງາມ;
ກອງປະຊຸມຄົບຄະນະກຳມະການ ສູນກາງແນວລາວສ້າງຊາດ ຄັ້ງທີ 5 ສະໄໝທີ XI ຈະໄດ້ ດຳເນີນ ເປັນເວລາ 2 ວັນ ລະຫວ່າງ ວັນທີ 24-25 ທັນວາ 2025 ຈຶ່ງຈະສຳເລັດ.
