ຄະນະຜູ້ແທນຂັ້ນສູງ ສູນກາງແນວລາວສ້າງຊາດ (ສນຊ) ນຳໂດຍ ທ່ານ ປອ. ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ສຳເລັດເຄື່ອນໄຫວຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ຣາຊະອານາຈັກກຳປູເຈຍ ລະຫວ່າງວັນທີ 17-20 ຕຸລາ 2024;
ໃນວາລະການເຄື່ອນໄຫວ, ຄະນະຜູ້ແທນດັ່ງກ່າວ ໄດ້ພົບປະສອງຝ່າຍ ລະຫວ່າງ ສູນກາງແນວລາວສ້າງຊາດ ແລະ ສະພາແນວໂຮມສາມັກຄີພັດທະນາມາຕຸພູມ ຣາຊະອານາຈັກກຳປູເຈຍ, ສອງຝ່າຍ ໄດ້ທົບທວນຄືນຜົນຂອງການພົວພັນ ແລະ ການຮ່ວມມືໃນໄລຍະຜ່ານມາ ຕາມບົດບັນທຶກການຮ່ວມມື ຂອງສອງອົງການ (2019-2023) ພ້ອມທັງແລກປ່ຽນຄຳຄິດເຫັນກ່ຽວກັບທິດທາງແຜນການພົວພັນ ແລະ ການຮ່ວມມືສອງຝ່າຍ ໃນຕໍ່ໜ້າ; ໂອກາດນີ້, ໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈ (2024-2028) ປະກອບມີ 08 ຂໍ້ ເຊິ່ງເປັນພື້ນຖານໃຫ້ແກ່ການເພີ່ມທະວີການພົວພັນ ແລະ ການຮ່ວມມື ໃຫ້ມີຜົນສຳເລັດເປັນກ້າວໆ; ພ້ອມດຽວກັນນີ້, ໄດ້ເຂົ້າຢ້ຽມຂ່ຳນັບ ພະບາດສົມເດັດພະບໍຣົມມະນຽດ ໂນໂຣດົມ ສີຫາໂມນີ ພະມະຫາກະສັດ ແຫ່ງຣາຊະອານາຈັກກໍາປູເຈຍ, ເຂົ້າຢ້ຽມຂ່ຳນັບທ່ານ ສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ, ປະທານທີ່ປຶກສາສູງສຸດຂອງກະສັດ, ປະທານພັກປະຊາຊົນກຳປູເຈຍ ແລະ ປະທານສະພາສູງກຳປູເຈຍ ແລະ ເຂົ້າຢ້ຽມຂ່ຳນັບທ່ານ ສົມເດັດ ມະຫາ ບໍວໍ ທິບໍດີ ຮູນ ມາເນດ, ຮອງປະທານພັກປະຊາຊົນກຳປູເຈຍ, ທີ່ປຶກສາສະພາແນວໂຮມສາມັກຄີພັດທະນາມາຕຸພູມ ຣາຊະອານາຈັກກໍາປູເຈຍ ນາຍົກລັດຖະ ມົນຕີ ແຫ່ງຣາຊະອານາຈັກກຳປູເຈຍ; ນອກຈາກນີ້, ຍັງໄດ້ໄປຢ້ຽມຢາມແຂວງພຣະສີຫະນຸກວິນ ໂດຍໄດ້ຮັບການຕ້ອນຮັບຂອງທ່ານ ມາງ ຊີເນດ ເຈົ້າແຂວງພຣະສີຫະນຸກວິນ, ປະທານສະພາແນວໂຮມສາມັກຄີພັດທະນາມາຕຸພູມ ຣາຊະອານາຈັກກໍາປູເຈຍແຂວງພຣະສີຫະນຸກວິນ; ໂອກາດນີ້, ຄະນະໄດ້ແລກປ່ຽນບົດຮຽນ ໂດຍສະເພາະແມ່ນລະບົບກົງຈັກການຈັດຕັ້ງ ແລະ ການເຄື່ອນໄຫວຂອງສະພາແນວໂຮມ ຢູ່ຂັ້ນແຂວງ, ເມືອງ ແລະ ຂັ້ນບ້ານ ພ້ອມນີ້ໄດ້ໄປຢ້ຽມຢາມວິສາຫະກິດທ່າກຳປັ້ນ ແລະ ຢ້ຽມຢາມ ເຂດເສດຖະກິດພິເສດ BAY OF LIGHT ຢູ່ແຂວງພຣະສີຫະນຸກວິນ ອີກດ້ວຍ;
ການເຄື່ອນໄຫວຢ້ຽມຢາມ ແລະ ເຮັດວຽກ ຢ່າງເປັນທາງການ ຢູ່ຣາຊະອານາຈັກກຳປູເຈຍ ຂອງຄະນະຜູ້ແທນຂັ້ນສູງ ສນຊ ຄັ້ງນີ້ ເປັນການແລກປ່ຽນຮຽນຮູ້ບົດຮຽນການເຄື່ອນໄຫວ, ແລກປ່ຽນຂໍ້ມູນຂ່າວສານ ແລະ ນະໂຍບາຍ ໃໝ່ໆໃນວຽກງານແນວໂຮມ ຂອງກໍາປູເຈຍ ພ້ອມທັງເປັນສ່ວນໜຶ່ງປະກອບສ່ວນເສີມຂະຫຍາຍສາຍພົວພັນ ແລະ ການຮ່ວມມືມິດຕະພາບ ຖານບ້ານໃກ້ເຮືອນຄຽງ, ຄວາມສາມັກຄີທີ່ເປັນມູນເຊື້ອອັນດີງາມ ຂອງສອງພັກ-ສອງລັດ, ປະຊາຊົນສອງປະເທດ ເວົ້າລວມ, ເວົ້າສະເພາະ ສອງອົງການ ໃຫ້ມີຄວາມແໜ້ນແຟ້ນຍິ່ງໆຂຶ້ນ.
ພາບ ແລະ ຂ່າວ: ຈິດຕະພົງ
ບກ: ພ.ບຸບຜາ
