ທ່ານ ນາງ ສີພະຈັນ ນັນທະວົງສາ ຄະນະປະຈຳພັກ, ຮອງປະທານສູນກາງແນວລາວສ້າງຊາດ (ສນຊ) ຄະນະກຳມະການແກ້ໄຂບັນຫາຢາເສບຕິດລະດັບຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ແຂວງບໍລິຄຳໄຊ ເຊິ່ງມີທ່ານ ວັນເລີນ ປຸ້ຍໄມນີ ກຳມະການປະຈຳພັກແຂວງ ປະທານແນວລາວສ້າງຊາດແຂວງ ພ້ອມດ້ວຍບັນດາທ່ານຮອງປະທານແນວລາວສ້າງຊາດປະຈຳການ ແລະ ບໍ່ປະຈຳການ, ບັນດາທ່ານກຳມະການແນວລາວສ້າງຊາດແຂວງ, ອົງການຈັດຕັ້ງພາຄີ, ອົງການຈັດຕັ້ງມະຫາຊົນຂັ້ນແຂວງ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ ທີ່ຫ້ອງການແນວລາວສ້າງຊາດ ແຂວງບໍລິຄຳໄຊ, ໃນວັນທີ 19 ມັງກອນ 2026;
ໃນວາລະກອງປະຊຸມ, ທ່ານ ນາງ ເກດແກ້ວ ກົມມະແສງ ຮອງປະທານແນວລາວສ້າງຊາດແຂວງ ໄດ້ລາຍງານສະພາບການ ຈັດຕັ້ງປະຕິບັດວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດ ແລະ ວຽກງານຕິດຕາມ-ກວດກາ ຂອງແນວລາວສ້າງຊາດ ໃນໄລຍະຜ່ານມາ ເຊິ່ງໄດ້ຍົກໃຫ້ເຫັນຜົນງານດ້ານດີທີ່ພົ້ນເດັ່ນ, ດ້ານອ່ອນ-ຂໍ້ຄົງຄ້າງ ແລະ ຄຳຄິດເຫັນ-ຄຳສະເໜີຂອງປະຊາຊົນບັນດາເຜົ່າພາຍໃນແຂວງ; ພ້ອມນີ້, ໄດ້ຮັບຟັງການເຜີຍແຜ່ລາຍງານຜົນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປີ 2024-2025 ແລະ ການປະກອບຄໍາເຫັນແລກປ່ຽນບົດຮຽນ ລະຫວ່າງສູນກາງ ແລະ ທ້ອງຖິ່ນ ຂອງບັນດາທ່ານຜູ້ເຂົ້າຮ່ວມ ຢ່າງມີບັນຍາກາດຟົດຟື້ນ;
ໂອກາດນີ້, ທ່ານຮອງປະທານ ສນຊ ໄດ້ສະແດງຄວາມຊົມເຊີຍອົງການແນວລາວສ້າງຊາດ ແຂວງທີ່ໄດ້ປະກອບສ່ວນໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ການຕິດຕາມ, ກວດກາຂອງແນວລາວສ້າງຊາດ ແມ່ນມີຄວາມຄືບໜ້າ ແລະ ຍາດໄດ້ຜົນງານຫຼາຍສົມຄວນ; ໃນນີ້, ທ່ານໄດ້ເນັ້ນວ່າ ແນວລາວສ້າງຊາດຈະໄດ້ເພີ່ມທະວີການສຶກສາອົບຮົມການເມືອງແນວຄິດໃຫ້ປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ, ໄວ ໃນທົ່ວສັງຄົມ ໂດຍການຈັດຕັ້ງເຜີຍແຜ່ເຊື່ອມຊຶມນິຕິກຳຕ່າງໆ ຂອງພັກ-ລັດ ທີ່ກ່ຽວຂ້ອງເຖິງການແກ້ໄຂບັນຫາຢາເສບຕິດ ໃຫ້ທົ່ວເຖິງເລິກເຊິ່ງກວ່າເກົ່າ; ສຳລັບວຽກງານຕິດຕາມ, ກວດກາຂອງແນວລາວສ້າງຊາດ ແມ່ນສືບຕໍ່ສ້າງຄວາມຮັບຮູ້, ເຂົ້າໃຈ ໃຫ້ສັງຄົມໄດ້ຮັບຊາບ ເຊິ່ງການຕິດຕາມ, ກວດກາຂອງແນວລາວສ້າງຊາດ ແມ່ນການຕິດຕາມ, ກວດກາ ໂດຍຜ່ານຄຳຄິດຄຳເຫັນ, ຄຳຮ້ອງ, ຄຳສະເໜີ, ການສ່ອງແສງຄວາມມຸ້ງມາດປາຖະໜາ ຂອງປະຊາຊົນບັນດາເຜົ່າ ກ່ຽວກັບການຈັດຕັ້ງປະຕິບັດແນວທາງ, ນະໂຍບາຍ, ລັດຖະທຳມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ ໃນໄລຍະໃໝ່ ເຊິ່ງຕ່າງຈາກການຕິດຕາມ, ກວດກາ ຂອງອົງການກວດກາລັດ-ຕ້ານການສໍ້ລາດບັງຫຼວງຂອງລັດ; ການຕິດຕາມ, ກວດກາດັ່ງກ່າວຂອງແນວລາວສ້າງຊາດ ໂດຍແນ່ໃສ່ເສີມຂະຫຍາຍສິດເປັນເຈົ້າຂອງປະຊາຊົນ, ປະຊາຊົນຮັບຮູ້, ປະຊາຊົນເຂົ້າໃຈ, ປະຊາຊົນຈັດຕັ້ງປະຕິບັດ ແລະ ປະຊາຊົນ ມີຜົນປະໂຫຍດຮ່ວມກັນ.
ຂ່າວ+ພາບ: ພ.ພຽງ
ບກ: ພ. ບຸບຜາ
