ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ລົງຢ້ຽມຢາມພົບປະແນວລາວສ້າງຊາດ ນະຄອນຫຼວງ ວຽງຈັນ ໂດຍການຕ້ອນຮັບຂອງທ່ານ ຖະໜອມ ທຳທອງ ຄະນະປະຈຳພັກ ປະທານແນວລາວສ້າງຊາດ ນະຄອນຫຼວງວຽງຈັນ ທີ່ເມືອງສັງທອງ ນະຄອນຫຼວງ ວຽງຈັນ, ມີບັນດາທ່ານປະທານ-ຮອງປະທານແນວລາວສ້າງຊາດທີ່ມາຈາກບັນດາເມືອງອ້ອມຂ້າງ, ຄະນະນຳເມືອງສັງທອງ, ບັນດາທ່ານພະນັກງານບຳນານປະຕິວັດອາວຸໂສ, ເລຂາພັກ-ນາຍບ້ານ ແລະ ປະທານແນວລາວສ້າງຊາດບ້ານ ທົ່ວເມືອງສັງທອງ ເຂົ້າຮ່ວມ ໃນວັນທີ 18 ພຶດສະພາ 2023.
ທ່ານ ພົງສະຫວັນ ສິລິພັນ ເລຂາພັກເມືອງເຈົ້າເມືອງເມືອງສັງທອງ ໄດ້ລາຍງານຫຍໍ້ໃຫ້ຮູ້ວ່າ: ເມືອງສັງທອງມີພົນລະເມືອງທັງໝົດ 33 ພັນກວ່າຄົນ, ຍິງ 16 ພັນກວ່າຄົນ, ລວມມີ 35 ບ້ານ; ມີເນື້ອທີ່ 75.982 ຮຕ; ປະຊາຊົນສ່ວນຫຼາຍປະກອບອາຊີບປຸກຝັງ-ລ້ຽງສັດ ແລະ ຄ້າຂາຍ. ໃນສະພາບ ເສດຖະກິດ, ການເງິນຢູ່ພາຍໃນປະເທດຂອງພວກເຮົາທີ່ມີຄວາມຫຍຸ້ງຍາກ, ການເໜັງຕີງຂອງອັດຕາແລກປ່ຽນເງິນຕາ, ລາຄານໍ້າມັນເຊື້ອໄຟ ແລະ ອື່ນໆ ຖີບຕົວສູງຂຶ້ນ ໄດ້ຮັບຜົນກະທົບ ຢ່າງໜັກໜ່ວງໃນໄລຍະຜ່ານມາ ຄະນະພັກອົງການປົກຄອງເມືອງສັງທອງ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານ, ສະມາຊິກພັກ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າ ສ້າງຄວາມເປັນເອກະພາບ, ສ້າງຄວາມເສຍສະຫຼະ ຕິດພັນກັບການແກ້ໄຂວຽກງານຕົວຈິງ; ພ້ອມທັງປຸກລະດົມການປະກອບສ່ວນເຂົ້າໃນການຈັດຕັ້ງປະຕິບັດ 2 ວາລະແຫ່ງຊາດ, ໃຫ້ມີຄວາມສະຫງົບທາງດ້ານການເມືອງໜັກແໜ້ນ, ຮັບປະກັນຄວາມເປັນລະບຽບຮຽບຮ້ອຍທາງດ້ານສັງຄົມ, ຕິດພັນກັບການສ້າງບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີ ຢ່າງເປັນເຈົ້າການ. ໄດ້ຖືສໍາຄັນຕໍ່ວຽກສຶກສາ ສົ່ງເສີມການສອນດີ ຮຽນເກັ່ງ. ທົ່ວເມືອງມີໂຮງຮຽນພາກລັດ ແລະ ເອກະຊົນທັງໝົດ 51 ແຫ່ງ, ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີປອງດອງ ເປັນປຶກແຜ່ນຂອງປະຊາຊົນບັນດາເຜົ່າ, ປະກອບສ່ວນປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ; ສ້າງບ້ານສາມັກຄີປອງດອງໄດ້ 35 ບ້ານ, ຄອບຄົວສາມັກຄີປອງດອງໄດ້ 6.156 ຄອບຄົວ.
ໃນໂອກາດນີ້, ທ່ານປະທານ ສນຊ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນໍານະຄອນຫຼວງ ວຽງຈັນ ແລະ ເມືອງ ສັງທອງ ສາມາດຍາດໄດ້ຜົນງານອັນພົ້ນເດັ່ນໃນໄລຍະຜ່ານມາ ສາມາດເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດ, ເພິ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມກໍາລັງແຮງຂອງປະຊາຊົນທຸກຊັ້ນຄົນ, ປະກອບສ່ວນຢ່າງແຂງແຮງເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ທີ່ຕິດພັນກັບ 4 ຄາດໝາຍລວມຂອງແນວລາວສ້າງຊາດ: ເພີ່ມທະວີຄວາມສາມັກຄີປອງດອງ, ຄວາມເປັນປຶກແຜ່ນ ຂອງປະຊາຊົນ, ສ້າງສະຕິຊາດເອກະພາບອັນໜຶ່ງອັນດຽວ ຍົກສູງມູນເຊື້ອຊາດ, ດຸໝັ່ນຂະຫຍັນພຽນ, ຮັກຄວາມຍຸຕິທໍາ; ເສີມຂະຫຍາຍສິດປະຊາທິປະໄຕ ແລະ ສິດເປັນເຈົ້າຂອງປະຊາຊົນ ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ, ຍົກສູງຊີວິດການເປັນຢູ່ຂອງປະຊາຊົນໃຫ້ດີຂື້ນ; ເສີມຂະຫຍາຍ ແລະ ຮັບປະກັນພັນທະພາບລະຫວ່າງຊົນຊັ້ນກໍາມະກອນກັບ ຊາວກະສິກອນ ແລະ ປັນຍາຊົນ ພາຍໃຕ້ການນໍາພາຂອງພັກແຕ່ລະຂັ້ນ, ຮັດແໜ້ນ ແລະ ຂະຫຍາຍສາຍພົວພັນກັບອົງການພາຄີ ກັບພີ່ນ້ອງເຊື້ອຊາດລາວທີ່ດໍາລົງຊີວິດຢູ່ຕ່າງປະເທດ ແລະ ຍົກສູງບົດບາດ, ຂອງຄະນະກໍາມະການແນວລາວສ້າງຊາດ ໂດຍຮັບປະກັນ ໃຫ້ອົງການແນວລາວສ້າງຊາດແຕ່ສູນກາງຮອດທ້ອງຖິ່ນໃຫ້ເຄື່ອນໄຫວເປັນລະບົບ, ສາມາດເຮັດຫຼ້ອນໜ້າທີ່ການເມືອງຂອງຕົນ. ພ້ອມກັນນີ້, ທ່ານໄດ້ເນັ້ນໃຫ້ແນວລາວສ້າງຊາດແຕ່ລະຂັ້ນຜັນຂະຫຍາຍ ມະຕິ 55/ຄປຈ ວ່າດ້ວຍການຫາລາຍໄດ້ເພີ່ມ ຂອງແນວລາວສ້າງຊາດ ແລະ ທ່ານໄດ້ຍົກໃຫ້ເຫັນເນື້ອໃນ 4 ການຫັນປ່ຽນ: ຕ້ອງສ້າງຄວາມຮັບຮູ້ຄວາມເຂົ້າໃຈ ຕໍ່ວຽກງານແນວໂຮມໃນໄລຍະໃໝ່ໃຫ້ເລິກເຊິ່ງ, ຊຶ່ງມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິ 108 ຂອງກົມການເມືອງສູນກາງພັກ; ຍົກສູງຄຸນນະພາບການເຄື່ອນໄຫວຂອງແນວລາວສ້າງຊາດແຕ່ລະຂັ້ນ, ໂດຍເລັ່ງໃສ່ສ້າງການຫັນປ່ຽນ ແລະ ແກ້ໄຂຂອດທີ່ຍັງຫຍຸ້ງຍາກດ້ານລາຍຮັບ ທີ່ອາໄສຈາກງົບປະມານຂອງລັດພຽງແຫຼ່ງດຽວ ມາສູ່ການສ້າງລາຍຮັບເພີ່ມ ທີ່ບໍ່ຜິດກົດໝາຍໃຫ້ຫຼາຍຂຶ້້ນ; ສ້າງການຫັນປ່ຽນດ້ານຮູບການ ແລະ ວິທີການປຸກລະດົມຂົນຂວາຍປະຊາຊົນ ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ; ນໍາເອົາໝາກຜົນຂອງການແຂ່ງຂັນເຫຼົ່ານັ້ນ ມາໃຫ້ປະຊາຊົນບັນດາເຜົ່າ ແລະ ສ້າງການຫັນປ່ຽນດ້ານຮູບແບບການຮ່ວມສໍາພັນ ລະຫວ່າງອົງການພາຄີດ້ວຍກັນ ແລະ ວຽກຈຸດສຸມໃນຕໍ່ໜ້າຂອງແນວລາວສ້າງຊາດແມ່ນ 5 ແຜນງານ ແລະ 41 ໂຄງການ ເພື່ອຈັດຕັ້ງປະຕິບັດໃຫ້ໄດ້ຮັບຜົນເປັນຈິງ ພ້ອມກັນນັ້ນ, ຄະນະໄດ້ໄປຢ້ຽມຢາມກອງທຶນສາມັກຄີ ແລະ ພັດທະນາຂອງບ້ານປາກແຖບ ແລະ ໄດ້ຢ້ຽມຊົມບ່ອນທົດລອງໃນການຜະລິດກະສີກໍາປອດສານຜິດຂອງບ້ານຕື່ມອີກ.
ບກ: ກົງແກ້ວ+ຄໍາຜາຍ
ຂ່າວພາບ: ສຸວັນລີ