ເຂົ້າສານດັ່ງກ່າວ, ແມ່ນໄດ້ຮັບການສະໜັບສະໜູນຊ່ວຍເຫຼືອຈາກອົງການໃຈບຸນສາກົນ ເດເຊເຣັດ (Deseret International Charities ຫຼື DIC) ແລະ ເງິນສົດ ຈໍານວນ 200 ລ້ານກີບ ແມ່ນການປະກອບສ່ວນຈາກສັງຄົມ ໂດຍສະເພາະບັນດາທ່ານຄະນະກໍາມະການສູນກາງແນວລາວສ້າງຊາດ ທີ່ໄດ້ມອບໃຫ້ ໂດຍຜ່ານສູນກາງແນວລາວສ້າງຊາດ ເພື່ອນຳມາຊ່ວຍເຫຼືອ ແລະ ບັນເທົາທຸກໃຫ້ແກ່ປະຊາຊົນພາຍໃນແຂວງ ທີ່ປະສົບໄພພິບັດນ້ຳຖ້ວມ;

      ໃນໂອກາດສຳຄັນ, ທ່ານ ອາລຸນໄຊ ສູນນະລາດ ໄດ້ລາຍງານສະພາບໂດຍລວມການພັດທະນາເສດຖະກິດ-ສັງຄົມ ຂອງແຂວງຈຳປາສັກ ໃຫ້ຄະນະຮັບຊາບ; ພ້ອມດຽວກັນນັ້ນ, ຄະນະກຳມະການຄຸ້ມຄອງໄພພິບັດ ໄດ້ລາຍງານສະພາບຄວາມເສຍຫາຍຈາກພາຍຸ ແລະ ຝົນຕົກໜັກ ທີ່ກໍ່ໃຫ້ເກີດນ້ຳຖ້ວມເປັນບໍລິເວນກວ້າງ ເຮັດໃຫ້ບ້ານຈຳນວນ 244 ບ້ານ ແລະ ເຮືອນ ຈໍານວນ 2.961 ຫຼັງຄາໄດ້ຮັບຜົນເສຍຫາຍ, ເນື້ອທີ່ຖືກນໍ້າຖ້ວມ 7.359 ເຮັກຕາ, ຊົນລະປະທານເປ່ເພ 43 ໂຄງການ, ເສັ້ນທາງຊົນນະບົດ/ເສັ້ນທາງຫຼັກເສຍຫາຍຈຳນວນ 55 ເສັ້ນ, ຕາຝັງເຈື່ອນ 15 ຈຸດ ແລະ ໂຮງຮຽນເສຍຫາຍຈຳນວນ 35 ແຫ່ງ, ພ້ອມທັງຍົກໃຫ້ເຫັນ ການນຳພາ-ຊີ້ນຳ ມາດຕະການແກ້ໄຂບັນເທົາ ເພື່ອເຮັດໃຫ້ຊີວິດການເປັນຢູ່ ຂອງປະຊາຊົນກັບຄືນສູ່ສະພາບປົກກະຕິໂດຍໄວ; ພ້ອມນີ້, ທ່ານໄດ້ສະແດງຄວາມຂອບ ໃຈຢ່າງຍິ່ງຕໍ່ທ່ານປະທານ ສນຊ ກໍຄື ບັນດາທ່ານກໍາມະການສູນກາງແນວລາວສ້າງຊາດ ແລະ ພາກສ່ວນຕ່າງໆໃນສັງຄົມ ທີ່ໄດ້ໃຫ້ຄວາມຊ່ວຍເຫຼືອອັນທ່ວງທັນໃນຄັ້ງນີ້, ພ້ອມທັງຢືນຢັນວ່າທາງແຂວງຈະນຳເອົາການຊ່ວຍເຫຼືອດັ່ງກ່າວ ໄປແຈກຢາຍໃຫ້ເຖິງມືປະຊາຊົນ ຜູ້ທີ່ກຳລັງປະສົບໄພໃນປັດຈຸບັນ.

ໃນວັນດຽວກັນ, ທ່ານປະທານສູນກາງແນວລາວສ້າງຊາດ ໄດ້ພົບປະຢ້ຽມຢາມ ແລະ ໂອ້ລົມພະນັກງານແນວລາວສ້າງຊາດແຂວງ ໂດຍມີທ່ານ ນາງ ວາດສະໜາ ສິລິມາ ຄະນະປະຈຳພັກແຂວງ ປະທານແນວລາວສ້າງຊາດ ພ້ອມຄະນະ, ມີບັນດາທ່ານຜູ້ຕາງໜ້າອົງການຈັດຕັ້ງພາຄີ ແລະ ພະນັກງານແນວລາວສ້າງຊາດ ເຂົ້າຮ່ວມ; ພ້ອມທັງມອບເງິນສົດ 60.000.000 ກີບ (ຫົກສິບລ້ານກີບ) ໃຫ້ແກ່ແນວລາວສ້າງຊາດແຂວງ ແລະ ບັນດາເມືອງ ເພື່ອເປັນທຶນຮອນຊຸກຍູ້ສົ່ງເສີມການເຄື່ອນໄຫວວຽກງານແນວລາວສ້າງຊາດ ໃຫ້ມີຄວາມເຂັ້ມແຂງ ຕື່ມອີກ.

ບກ: ພ.ບຸບຜາ

ພາບ ແລະ ຂ່າວ: ພ.ພຽງ