ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດຄັ້ງທີ 2 ສະໄໝທີ XI ໄດ້ອັດລົງດ້ວຍຜົນສໍາເລັດອັນຈົບງາມ ໃນວັນທີ 12 ມັງກອນນີ້ ທີ່ສູນກາງແນວລາວສ້າງຊາດ ພາຍຫລັງດໍາເນີນມາເປັນເວລາ 2 ວັນ ໂດຍການເປັນປະ ທານຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີພະເຖລານຸເຖລະ, ບັນດາທ່ານຮອງປະທານສູນກາງແນວລາວສ້າງຊາດ, ປະທານແນວລາວສ້າງຊາດແຂວງ-ນະຄອນຫຼວງ, ກໍາມະການສູນກາງແນວລາວສ້າງຊາດອ້ອມຂ້າງສູນກາງ, ກໍາມະການສູນກາງແນວລາວສ້າງຊາດຢູ່ຕ່າງ ປະເທດ, ຄະນະທີ່ປຶກສາ ແລະ ຄູ່ຮ່ວມງານ ພ້ອມດ້ວຍແຂກຖືກເຊີນເຂົ້າຮ່ວມ; ເຊິ່ງກອງປະຊຸມຄັ້ງນີ້ ໄດ້ຈັດເປັນສອງຮູບແບບຄື: ຮູບແບບປົກກະຕິຢູ່ນະຄອນຫຼວງວຽງຈັນ ແລະ ຮູບແບບວີດີໂອທາງໄກຢູ່ບັນດາແຂວງທົ່ວປະເທດ
ກອງປະຊຸມຄັ້ງນີ້ຜູ້ເຂົ້າຮ່ວມໄດ້ພ້ອມກັນຮັບຟັງບັນດາເນື້ອໃນຂອງກອງປະຊຸມ ແລະ ສຸມໃສ່ປະກອບຄໍາຄິດຄໍາເຫັນດ້ວຍຄວາມຮັບຜິດຊອບສູງ ກົງໄປກົງມາຕໍ່ບົດສະຫຼຸບຕີລາຄາການປະຕິບັດມະຕິກອງປະຊຸມໃຫຍ່ ຄັ້ງທີ XI ໃນໄລຍະ 1 ປີ ຜ່ານມາ ແລະ ກຳນົດແຜນວຽກຈຸດສຸມປີ 2023 ຈາກທ່ານ ຄໍາເຜີຍ ບຸດດາວຽງ ກຳມະການສູນກາງພັກ ຮອງປະທານຜູ້ປະຈໍາການສູນກາງແນວລາວສ້າງຊາດ; ຊຶ່ງໄດ້ຍົກໃຫ້ເຫັນຜົນງານອັນພົ້ນເດັ່ນໃນຫຼາຍດ້ານ ໃນການເຄື່ອນໄຫວວຽກງານຂອງຄະນະກຳມະການສູນກາງແນວລາວສ້າງຊາດ ໃນໄລຍະ 1 ປີຜ່ານມາ ໄດ້ລົງຊຸກຍູ້ວຽກງານແນວລາວສ້າງຊາດ, ວຽກງານສາສະໜາ, ວຽກງານຊົນ ເຜົ່າ, ວຽກງານຊັ້ນຄົນ-ອົງການຈັດຕັ້ງສັງຄົມ, ວຽກງານການຈັດຕັ້ງພະນັກງານ, ວຽກງານກວດກາ, ວຽກງານໂຄສະນາ, ວຽກງານສູນຝຶກອົບຮົມ ແລະ ວຽກງານຄະນະທີ່ປືກສາຢູ່ຂັ້ນທ້ອງຖີ່ນຮາກຖານ. ພ້ອມດຽວກັນນີ້ ຍັງໃຫ້ຮູ້ວ່າ: ຕະຫລອດໄລຍະຜ່ານມາ, ແນວລາວສ້າງຊາດແຕ່ລະຂັ້ນ ໃນຖານະເປັນຫລັກແຫລ່ງເຕົ້າໂຮມຄວາມສາມັກຄີປອງດອງທົ່ວປວງຊົນເປັນປຶກແຜ່ນ ໄດ້ເປັນເຈົ້າການສະໜັບສະໜູນແນວທາງ, ນະໂຍບາຍຂອງພັກ, ລະບຽບ, ກົດໝາຍຂອງລັດ ໃນການຄວບຄຸມ ແລະ ແກ້ໄຂບັນຫາຄວາມຫຍຸ້ງຍາກຕ່າງໆ ໂດຍໄດ້ໂຄສະນາເຜີຍແຜ່ ແລະ ປຸກລະດົມແນວຄິດຈິດໃຈ ໃນການຈັດຕັ້ງປະຕິບັດທິດຊີ້ນຳ, ມະຕິ, ຄຳສັ່ງ, ແຜນພັດທະນາເສດຖະກິດ-ສັງຄົມ ແລະ 2 ວາລະແຫ່ງຊາດ ຂອງສູນກາງພັກ, ສະພາແຫ່ງຊາດ ແລະ ລັດຖະ ບານ ເພື່ອເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ. ພ້ອມກັນນັ້ນ, ຮັບຟັງລາຍງານການຈັດຕັ້ງປະຕິບັດແຜນພັດທະນາອົງການແນວລາວສ້າງຊາດ ປະຈໍາປີ 2022 ແລະ ທິດທາງປີ 2023; ຮັບຟັງລາຍງານການຮ່າງມະຕິກ່ຽວກັບວຽກງານການສ້າງລາຍຮັບເພີ່ມ ຂອງແນວລາວສ້າງຊາດ; ໃນນີ້, ໄດ້ຮັບຟັງບັນດາທ່ານ ຮອງປະທານ ສນຊ ຜູ້ບໍ່ປະຈໍາການ ລາຍງານວຽກງານທີ່ຕົນເອງຮັບຜິດຊອບ ແລະ ບັນດາທ່ານກໍາມະການສູນກາງແນວລາວສ້າງຊາດທີ່ເປັນຕົວແທນຈາກອົງການຈັດຕັ້ງພາຄີ ຂອງແນວລາວສ້າງຊາດ, ບັນດາທ່ານປະທານແນວລາວສ້າງຊາດແຂວງ, ຄະນະທີ່ປຶກສາ ແລະ ຄູ່ຮ່ວມງານ ກໍ່ຄື ທ່ານຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ໄດ້ປະກອບຄໍາເຫັນຕາມການເຈາະຈິ້ມຂອງປະທານກອງປະຊຸມຕື່ມອີກ; ພ້ອມທັງໄດ້ມີການພິຈາລະນາຮັບຮອງເອົາບຸກຄາລະກອນ ເພື່ອປະກອບເຂົ້າໃນຄະນະກໍາມະການສູນກາງແນວລາວສ້າງຊາດ ເພີ່ມເຕີມ ແລະ ປ່ຽນແທນຈໍານວນໜຶ່ງ.
ທ່ານປະທານສູນກາງແນວລາວສ້າງຊາດໄດ້ມີຄໍາເຫັນຕໍ່ກອງປະຊຸມໃນຄັ້ງນີ້ວ່າ: ໃນຕະຫຼອດ 1 ປີຜ່ານມາ, ເຖິງວ່າຈະມີສະພາບຂໍ້ຫຍຸ້ງຍາກ ຈາກຜົນກະທົບຂອງພະຍາດໂຄວິດ 19 ແລະ ຄວາມຫຍຸ້ງຍາກທາງດ້ານເສດຖະກິດ-ການເງິນ, ເງິນຕາ, ຄ່າຄອງຊີບສູງ ກໍ່ຕາມແຕ່ແນວລາວສ້າງຊາດທຸກຂັ້ນໄດ້ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຢ່າງຕັ້ງໜ້າ, ຊຶ່ງທຸກແຜນວຽກລ້ວນແຕ່ຖືກຈັດຕັ້ງປະຕິບັດ; ຕ້ອງເສີມສ້າງຄວາມສາມັກຄີ, ຄວາມເປັນປຶກແຜ່ນຂອງປະຊາຊົນທັງຊາດ, ສ້າງສະຕິ ຊາດເອກະພາບອັນໜຶ່ງອັນດຽວ; ສູ້ຊົນ ແລະ ເສີມຂະຫຍາຍໃຫ້ໄດ້ສິດເປັນເຈົ້າຂອງປະຊາຊົນ ເຂົ້າໃນຂະບວນການແຂ່ງຂັນຮັກຊາດ ແລະ ພັດທະນາ ເພື່ອປະຕິບັດແຜນວຽກຕ່າງໆຂອງທ້ອງຖິ່ນຕົນ; ສູ້ຊົນຜັນຂະຫຍາຍຂໍ້ແຂ່ງຂັນຮັກບ້ານເກີດ, ກໍາມະການແນວລາວສ້າງຊາດສ້າງຄຸນງາມຄວາມດີ 1 ໂຄງການ 1 ກິດຈະການ; ທຸກຄວາມຮຽກຮ້ອງທຸກວຽກທຸກງານຕ້ອງເລີ່ມຈາກປະຊາຊົນ, ໃຫ້ປະຊາຊົນຮູ້, ປະຊາຊົນເຮັດ ແລະ ປະຊາຊົນໄດ້ຮັບຜົນປະໂຫຍດ; ພ້ອມດຽວກັນນີ້ທ່ານຍັງໄດ້ເນັ້ນຕື່ມອີກວ່າ: ໃຫ້ອົງການແນວລາວສ້າງຊາດທຸກຂັ້ນ, ກໍາມະການແນວລາວສ້າງຊາດ ຫັນເອົາມະຕິກອງປະຊຸມໃຫຍ່ ຄັ້ງທີ XI ຂອງພັກ, ຂອງລັດ ກໍ່ຄືຂອງທ້ອງຖິ່ນ ແລະ ມະຕິກອງປະຊຸມປະຈໍາປີ 2022 ໃຫ້ເປັນແຜນວຽກລະອຽດຂອງຕົນ ໂດຍຈັດໃຫ້ມີບູລິມະສິດຢ່າງຈະແຈ້ງ; ກໍາມະການແນວ, ທີ່ປຶກສາ, ຜູ້ຮ່ວມງານ, ເປັນເຈົ້າການ ນໍາເອົາຈິດໃຈຂອງກອງປະຊຸມນີ້ໄປເຜີຍແຜ່ແນະນໍາ ແລະ ຂົນຂວາຍພະນັກງານ ແລະ ປະຊາຊົນ ຢູ່ອ້ອມຂ້າງຂອງຕົນໃຫ້ເຂົ້າຮ່ວມຂະບວນການຕ່າງໆ; ເພີ່ມທະວີປະສານງານກັບອົງການພາຄີ, ອົງການພັກ-ລັດຂັ້ນສູນກາງ ແລະ ທ້ອງຖິ່ນ, ນັບທັງຂະຫຍາຍການຮ່ວມມືກັບຕ່າງປະເທດ ແລະ ເປີດກວ້າງການພົວພັນການທູດພາກປະຊາຊົນ ເຮັດແນວໃດຈຶ່ງຈະໄດ້ກໍາລັງແຮງເພື່ອພັດທະນາ; ທຸກໜ່ວຍງານຕ້ອງເຄື່ອນໄຫວປະຕິບັດແຜນວຽກ, ບົນພື້ນຖານກົດໝາຍ ແລະ ກົດລະບຽບຂອງແນວລາວສ້າງຊາດ.
