ໃນພິທີຕາງໜ້າຄະນະຈັດຕັ້ງສູນກາງພັກ ໄດ້ຂື້ນສະເໜີຄຳສັ່ງຂອງກົມການເມືອງສູນກາງພັກ ວ່າດ້ວຍການຍົກຍ້າຍຮອງເລຂາຄະນະບໍລິຫານງານພັກ, ຮອງປະທານສູນກາງແນວລາວສ້າງຊາດ 2ສະຫາຍ ໄປຮັບໜ້າທີ່ໃໝ່ ຄື:

1. ຍົກຍ້າຍ ສະຫາຍ ຄຳຜອຍ ວັນນະສານ ກຳມະການສູນກາງພັກ, ຮອງເລຂາຄະນະບໍລິຫານງານພັກ ຮອງປະທານສູນກາງແນວລາວສ້າງຊາດ ໄປຮັບໜ້າທີໃໝ່ ຢູ່ ສູນກາງກຳມະບານ,

2. ⁠ຍົກຍ້າຍ ສະຫາຍ ມອນໄຊ ລາວມົວຊົ່ງ ກຳມະການສູນກາງພັກ, ຮອງເລຂາຄະນະພັກ, ຮອງປະທານ ສນຊ ໄປຮັບໜ້າທີ່ໃໝ່ ຢູ່ ສະພາແຫ່ງຊາດ; ຈາກນັ້ນ, ກໍ່ໄດ້ສະເໜີມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງຮອງເລຂາຄະນະບໍລິຫານງານພັກ, ຮອງປະທານສູນກາງແນວລາວສ້າງຊາດ ຜູ້ໃໝ່ດັ່ງນີ້:

1. ແຕ່ງຕັ້ງສະຫາຍ ນາງ ບຸດສະດີ ທະນະເມືອງ ກໍາມະການສູນກາງພັກ ເປັນຮອງເລຂາຄະນະບໍລິຫານງານພັກ, ຮອງປະທານສູນກາງແນວລາວສ້າງຊາດ,

2. ແຕ່ງຕັ້ງ ສະຫາຍ ລາວປາວຊົງ ນະວົງໄຊ ກຳມະການສູນກາງພັກ ເປັນຮອງເລຂາຄະນະບໍລິຫານງານພັກ, ຮອງປະທານສູນກາງແນວລາວສ້າງຊາດ.

      ໃນໂອກາດທີ່ມີຄວາມໝາຍສໍາຄັນນີ້, ສະຫາຍ ສຈ. ປອ ກິແກ້ວ ໄຂຄໍາພິທູນ ໄດ້ຕາງໜ້າກົມການເມືອງສູນກາງພັກ ເປັນກຽດໂອ້ລົມ ຕໍ່ພິທີ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານພົ້ນເດັ່ນ ແລະ ຜົນສໍາເລັດຫຼາຍດ້ານຂອງ 2 ສະຫາຍຮອງເລຂາຄະນະພັກ ສນຊ ຜູ້ເກົ່າ ເຊິ່ງຕະຫຼອດໄລຍະຜ່ານມາໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານແນວລາວສ້າງຊາດໄດ້ມີຜົນສຳເລັດເປັນຢ່າງດີ ແລະ ໄດ້ມີບາງເນື້ອໃນເນັ້ນໜັກຕໍ່ 2 ສະຫາຍ ທີ່ມາຮັບໜ້າທີ່ໃໝ່ ໃນການຊີ້ນຳ-ນຳພາ ຢູ່ສູນກາງແນວລາວສ້າງຊາດ ດ້ວຍເນື້ອໃນວ່າ: ກ່ອນອື່ນໝົດຕ້ອງໄດ້ເອົາໃຈໃສ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງ​ພັກ ແລະ ແຜນພັດທະນາເສດຖະກິດ-ສັງຄົມ 5 ປີແຫ່ງລັດ ແລະ ຕິດພັນກັບການສ້າງເສດຖະກິດເປັນ ເຈົ້າຕົນເອງ ໂດຍຈັດຕັ້ງປະຕິບັດພາລະບົດບາດແນວລາວສ້າງຊາດເປັນຕົ້ນ: ① ເປັນຫຼັກແຫຼ່ງເຕົ້າໂຮມ ຄວາມສາມັກຄີປອງດອງປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ, ໄວ ລວມທັງພີ່ນ້ອງ ລາວຢູ່ຕ່າງປະ ເທດ ແລະ ສ້າງຄວາມເຂັ້ມແຂງ ທັງປັບປຸງກຳລັງແຮງທົ່ວປວງຊົນ; ② ສຶກສາອົບຮົມ, ປຸກ ລະດົມປະຊາ ຊົນບັນດາເຜົ່າ ເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ③ ເສີມຂະຫຍາຍ ສິດເປັນເຈົ້າ ໃນການປົກປັກຮັກສາ ວັດທະນະທຳ, ຮີດຄອງປະເພນີອັນດີງາມ, ປົກປ້ອງສິດ ຜົນປະໂຫຍດ ອັນຊອບທຳຂອງປະຊາຊົນບັນດາເຜົ່າ ແລະ ຊັ້ນຄົນ; ④ ໃກ້ຊິດຕິດແທດ, ເກັບກຳຄຳຄິດຄຳເຫັນ, ສ່ອງແສງມານະຈິດ ແລະ ຄວາມມຸ່ງມາດປາດຖະໜາຂອງປະຊາຊົນລາວບັນດາເຜົ່າ; ⑤ ຕິດຕາມ ກວດກາການ ເຄື່ອນໄຫວຂອງອົງການອໍານາດລັດ ແລະ ພາຄີຂອງແນວລາວສ້າງຊາດ ໂດຍຜ່ານຄຳເຫັນ ຂອງປະຊາຊົນ ບັນດາເຜົ່າ; ⑥ ເປັນໃຈກາງປະສານສົມທົບ ກັບບັນດາພາຄີຂອງຕົນ ແລະ ອີກດ້ານໜຶ່ງພວກເຮົາກໍ່ຕ້ອງ ຊອກວິທີການ ສ້າງເສດຖະກິດເປັນເຈົ້າຕົນເອງຕາມແນວທາງຂອງພັກ ທີ່ຖືກຕ້ອງຕາມລະບຽບກົດໝາຍ ເຮັດໃຫ້ຫຼຸດຜ່ອນການນຳໃຊ້ງົບປະມານລັດ ສ່ວນໃດໜຶ່ງ ແລະ ວຽກງານອື່ນໆ ທີ່ຖືກມອບໝາຍ.

      ຈາກນັ້ນ, ສະຫາຍ ລາວປາວຊົງ ນະວົງໄຊ ໄດ້ຂຶ້ນກ່າວຮັບຄໍາໂອວາດ ເຊິ່ງກ່ອນອື່ນສະຫາຍໄດ້ກ່າວຂອບໃຈຕໍ່ກົມການເມືອງສູນກາງພັກ ທີ່ໄວ້ວາງໃຈມອບໝາຍໜ້າທີ່ອັນມີກຽດ ໃຫ້ພວກຂ້າພະເຈົ້າທັງສອງ, ພວກຂ້າພະເຈົ້າພ້ອມດ້ວຍໝູ່ຄະນະ ແລະ ກໍາມະການແນວລາວສ້າງຊາດທຸກຂັ້ນ ຈະພ້ອມກັນນໍາເອົາຄວາມເປັນຫ່ວງເປັນໄຍ ແລະ ຈິດໃຈຊີ້ນໍາ ຂອງຂັ້ນເທິງນໍາໄປຜັນຂະຫຍາຍໃຫ້ມີຜົນສໍາເລັດຢ່າງບໍ່ຢຸດຢັ້ງ.

ບກ: ພ ບຸບຜາ

ຂ່າວ-ຮູບ: ຂິດ-ເຢ້