ວັນທີ 11 ເມສາ 2025 ສູນກາງແນວລາວສ້າງຊາດ ໄດ້ຈັດພິ​ທີ​ປະ​ດັບຫຼຽນ​ກາລະນຶກ ​ 70 ປີ​ ວັນສ້າງ ຕັ້ງພັກປະ​ຊາ​ຊົນປະ​ຕິ​ວັດ​ລາວ  ແລະ ຫຼຽນກາລະນຶກ 70 ປີ ຄະນະຈັດຕັ້ງສູນກາງພັກ ໃຫ້ແກ່ບັນດາສະຫາຍການນຳ, ພະນັກງານປະຕິວັດອາວຸໂສບຳນານ ແລະ ພະນັກງານ ສູນກາງແນວລາວສ້າງຊາດ (ສນຊ) ​ເປັນ​ກຽດເຂົ້າ​ຮ່ວມ ແລະ ​ປະ​ດັບຫຼຽນ​ໂດຍສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີ​ບັນດາສະຫາຍຮອງປະທານ, ກຳມະການສູນກາງອ້ອມຂ້າງ, ຄະນະທີ່ປຶກສາ, ຄູ່ຮ່ວມງານ ຕະຫຼອດຮອດພະນັກງານ-ລັດຖະກອນ ເຂົ້າຮ່ວມຢ່າງພ້ອມພຽງ;

ການຈັດພິທີປະດັບຫຼຽນກາລະນຶກ ​70 ປີ ເນື່ອງໃນໂອກາດ ສະເຫຼີມສະຫຼອງວັນສ້າງຕັ້ງ ​ພັກປະຊາຊົນປະ ຕິວັດລາວ (22 ມີນາ 1955-22 ມີນາ 2025) ຄັ້ງນີ້, ຈໍານວນ 28 ສະຫາຍ ເຊິ່ງເປັນຫຼຽນກຽດຕິຄຸນອັນສູງສົ່ງຂອງພັກປະຊາຊົນປະຕິວັດລາວ ໃຫ້ແກ່ບັນດາສະຫາຍສະມາຊິກພັກ ຜູ້ທີ່ມີຜົນງານອັນໃຫ່ຍຫຼວງ, ມີວິລະກຳອັນລ້ຳເລີດ, ເປັນແບບຢ່າງອັນປະເສີດແກ່ຮຸ່ນຄົນສືບທອດ, ໄດ້ປະກອບສ່ວນອຸທິດເຫື່ອແຮງ, ສະຕິປັນຍາໃຫ້ແກ່ພັກ, ການປະຕິວັດໃຫ້ແກ່ປະເທດຊາດ ໃນສະ ໄໝຕໍ່ສູ້ກູ້ຊາດ ຕ້ານຈັກກະພັດລ່າເມືອງຂຶ້ນຜູ້ຮຸກຮານ ເພື່ອປົດປ່ອຍປະເທດຊາດ, ກອບກູ້ເອົາຄວາມເປັນເອກະ ລາດ ແລະ ອິດສະລະພາບ ມາໃຫ້ປະຊາຊົນລາວບັນດາເຜົ່າ; ທັງເປັນການຢັ້ງຢືນ, ການສະແດງໃຫ້ເຫັນເຖິງຄວາມຮູ້ບຸນຄຸນຢ່າງສູງ ພ້ອມທັງເປັນການຈາລຶກ ແລະ ຈົດຈໍາຄຸນງາມຄວາມດີ ຂອງບັນດາສະຫາຍສະມາຊິກພັກ-ພະນັກງານປະຕິວັດອາວຸໂສ ຜູ້ທີ່ມີຄຸນງາມຄວາມດີ, ອຸທິດເຫື່ອແຮງ ສະຕິປັນ ຍາປະກອບສ່ວນໃນພາລະກິດປົກປັກຮັກສາ ແລະ ພັດທະນາປະເທດຊາດຕະຫຼອດໄລຍະຜ່ານມາ. ຍິ່ງໄປກວ່ານັ້ນ, ການຍ້ອງຍໍສັນລະເສີນໃນຄັ້ງນີ້ ເປັນຄວາມທະນົງໃຈຂອງພັກ, ລັດຖະບານ ແລະ ປະຊາຊົນລາວບັນດາເຜົ່າ ທີ່ມີຕໍ່ບັນດາສະຫາຍສະມາຊິກພັກ;

ໂອກາດນີ້,  ສະຫາຍ ຄຳໄຫຼ ສີປະເສີດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ເປັນກຽດປະດັບຫຼຽນກາລະນຶກ 70 ປີ ວັນສ້າງຕັ້ງຄະນະຈັດຕັ້ງສູນກາງພັກ ໃຫ້ພະນັກງານ-ລັດຖະກອນ ຂະ      ແໜງຈັດຕັ້ງ ສູນກາງແນວລາວສ້າງຊາດ ທີ່ມີຜົນງານ, ຄຸນງາມຄວາມດີ ໃນການປະກອບສ່ວນເຄື່ອນໄຫວວຽກງານຈັດຕັ້ງ, ກໍ່ສ້າງພັກ-ພະນັກງານ ຈຳນວນ 21 ສະຫາຍ, ຍິງ 07 ສະຫາຍ ຕື່ມອີກ.

ບ.ກ: ອຸດອນ

ຂ່າວ: ພ.ພຽງ

ພາບ: ລິຄິດ