ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດຄັ້ງທີ 2 ສະໄໝທີ XI ໄດ້ໄຂຂຶ້ນຢ່າງເປັນທາງການ ທີ່ຫ້ອງປະຊຸມໃຫຍ່ສູນກາງແນວລາວສ້າງຊາດ ໃນວັນທີ 11 ມັງກອນ 2023 ນີ້ ໂດຍໃຫ້ກຽດກ່າວເປີດ ແລະ ເປັນປະທານຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີພະເຖລານຸເຖລະ, ບັນດາທ່ານຮອງປະທານສູນກາງແນວລາວສ້າງຊາດ, ປະທານແນວລາວສ້າງຊາດແຂວງ-ນະຄອນຫຼວງ, ກໍາມະການສູນກາງແນວລາວສ້າງຊາດອ້ອມຂ້າງສູນກາງ, ກໍາມະການສູນກາງແນວລາວສ້າງຊາດຢູ່ຕ່າງ ປະເທດ, ຄະນະທີ່ປຶກສາ ແລະ ຄູ່ຮ່ວມງານ ພ້ອມດ້ວຍແຂກຖືກເຊີນເຂົ້າຮ່ວມ; ເຊິ່ງກອງປະຊຸມຄັ້ງນີ້ ໄດ້ຈັດເປັນສອງຮູບແບບຄື: ຮູບແບບປົກກະຕິຢູ່ນະຄອນຫຼວງວຽງຈັນ ແລະ ຮູບແບບວີດີໂອທາງໄກຢູ່ບັນດາແຂວງທົ່ວປະເທດ
ໃນວາລະກອງປະຊຸມ ໄດ້ຮັບຟັງລາຍງານກ່ຽວກັບການສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມ ໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI ໃນໄລຍະ 1 ປີຜ່ານມາ ແລະກໍານົດທິດທາງແຜນວຽກຈດຸສຸມ ສໍາລັບປີ 2023 ເພື່ອເປັນການຢັ້ງຢືນຕໍ່ຜົນສໍາເລັດດ້ານດີ-ດ້ານອ່ອນ ໃນການເຄື່ອນໄຫວວຽກງານດັ່ງກ່າວ; ຮັບຟັງລາຍງານການຈັດຕັ້ງປະຕິບັດແຜນພັດທະນາອົງການແນວລາວສ້າງຊາດ ປະຈໍາປີ 2022 ແລະ ທິດທາງປີ 2023; ຮັບຟັງລາຍງານການຮ່າງມະຕິກ່ຽວກັບວຽກງານ ການສ້າງລາຍຮັບເພີ່ມ ຂອງແນວລາວສ້າງຊາດ; ໃນນີ້, ຍັງຈະໄດ້ຮັບຟັງບັນດາທ່ານ ຮອງປະທານ ສນຊ ຜູ້ບໍ່ປະຈໍາການ ລາຍງານວຽກງານທີ່ຕົນເອງຮັບຜິດຊອບ. ນອກຈາກນີ້, ບັນດາທ່ານກໍາມະການສູນກາງແນວລາວສ້າງຊາດທີ່ເປັນຕົວແທນຈາກອົງການຈັດຕັ້ງພາຄີ ຂອງແນວລາວສ້າງຊາດ, ຄະນະທີ່ປຶກສາ ແລະ ຄູ່ຮ່ວມງານ ກໍ່ຄື ທ່ານຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ໄດ້ປະກອບຄໍາເຫັນຕາມການເຈາະຈິ້ມຂອງປະທານກອງປະຊຸມຕື່ມອີກ; ພ້ອມທັງ ຈະໄດ້ມີການພິ ຈາລະນາຮັບຮອງເອົາບຸກຄາລະກອນ ເພື່ອປະກອບເຂົ້າໃນຄະນະກໍາມະການສູນກາງແນວລາວສ້າງຊາດ ເພີ່ມເຕີມ ແລະ ປ່ຽນແທນຈໍານວນໜຶ່ງ, ສຸດທ້າຍຈະໄດ້ມີການຮັບຮອງເອົາມະຕິກອງປະຊຸມຄັ້ງນີ້. ກອງປະຊຸມໃນຄັ້ງນີ້ຈະດໍາເນີນເປັນເວລາ 2 ວັນ ແຕ່ວັນທີ 11-12 ມັງກອນ ຈຶ່ງສໍາເລັດ. ຫຼັງຈາກນັ້ນ, ຜູ້ແທນ ກອງປະຊຸມຈະໄດ້ໄທັດສະນະຢ້ຽມຢາມສະຖານທີ່ທ່ອງທ່ຽວຢູ່ນະຄອນຫຼວງວຽງຈັນ ແລະ ບັນດາແຂວງຈໍານວນໜຶ່ງຕື່ມອີກ