ກອງປະຊຸມຄະນະປະຈຳ ສູນກາງແນວລາວສ້າງຊາດ (ສນຊ) ເປີດກວ້າງ ປະຈຳປີ 2025 ຄັ້ງທີ 4 ສະໄໝທີ XI ໄດ້ໄຂຂຶ້ນຢ່າງເປັນທາງການ ພາຍໃຕ້ການເປັນປະທານ ຂອງທ່ານ ປອ. ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ເຂົ້າຮ່ວມມີບັນດາທ່ານຮອງປະທານ ສນຊ, ຄະນະທີ່ປຶກສາ, ຄູ່ຮ່ວມງານ, ກຳມະການສູນກາງແນວລາວສ້າງຊາດ ອ້ອມຂ້າງ, ແຂກຖືກເຊີນ ພ້ອມດ້ວຍຄະນະກົມ ເຂົ້າຮ່ວມແບບເຊິ່ງໜ້າ ແລະ ແບບວີດີໂອທາງໄກ ຈາກແນວລາວສ້າງຊາດ ບັນດາແຂວງ ແລະ ນະຄອນຫຼວງວຽງຈັນ, ທີ່ຫ້ອງປະຊຸມໃຫຍ່ ຊັ້ນ 2 ສູນກາງແນວລາວສ້າງຊາດ, ໃນວັນທີ 11 ກໍລະກົດ 2025;
ກອງປະຊຸມ, ໄດ້ຮັບຟັງການລາຍງານການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນແນວລາວສ້າງຊາດ ຄັ້ງທີ XI, ກອງປະຊຸມຄະນະປະຈຳ ສນຊ ເປີດກວ້າງ ຄັ້ງທີ 3 ແລະ ການຈັດຕັ້ງປະຕິບັດແຜນພັດທະນາ ຂອງອົງການແນວລາວສ້າງຊາດ ໃນໄລຍະ 6 ເດືອນຕົ້ນປີ 2025 ແລະ ແຜນວຽກຈຸດສຸມ 6 ເດືອນທ້າຍປີ 2025; ຮັບຟັງການລາຍງານຄວາມຄືບໜ້າ, ປຶກສາຫາລື ແລະ ປະເມີນການກະກຽມຄວາມພ້ອມໃນການຈັດງານສັບປະດາ ສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ ກໍຄືບັນດາກິດຈະກຳ ຂອງແຕ່ລະອະນຸກຳມະການ ເປັນຕົ້ນ: ອະນຸກຳມະການເນື້ອໃນ ແລະ ເສດຖະກິດ, ອະນຸກຳມະການໂຄສະນາ-ຂະບວນການ ແລະ ແຂ່ງຂັນ-ຍ້ອງຍໍ ແລະ ອະນຸກຳມະການພິທີການ, ສະຖານທີ່, ປ້ອງກັນ ແລະ ສຸຂະພາບ; ພິຈາລະນາຮັບຮອງຄຳສັບສຳຄັນ ຂອງວຽກງານແນວລາວສ້າງຊາດ, ປຶກສາຫາລື ແລະ ພິຈາລະນາຕໍ່ບົດລາຍງານ ຂອງວຽກງານກວດກາ ສນຊ ເປັນຕົ້ນ: ປະເມີນການການຈັດຕັ້ງປະຕິບັດຄຳແນະນຳ 009/ຄປຈ, ກ່ຽວກັບການຈັດຕັ້ງປະຕິບັດ 2 ວາລະແຫ່ງຊາດ ໃນຂົງເຂດແນວລາວສ້າງຊາດ, ຕິດຕາມກວດກາສຽງສະທ້ອນສັງຄົມ ກ່ຽວກັບການປະຕິບັດແຜນວຽກຂອງລັດຖະບານ ເພື່ອເປັນຂໍ້ມູນ ແລະ ທິດທາງໃນການລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ທ້າຍປີ 2025, ຕິດຕາມກວດກາສຽງສະທ້ອນສັງຄົມຕໍ່ກັບການກໍ່ສ້າງສ້ອມແປງ ແລະ ປົກປັກຮັກສາທາງຂອງລັດ; ຮັບຟັງລາຍງານຄວາມຄືບໜ້າ, ປຶກສາຫາລື ແລະ ພິຈາລະນານິຕິກຳສຳຄັນ ຂອງແນວລາວສ້າງຊາດ ຈຳນວນໜຶ່ງ ເຊັ່ນ: ການຄົ້ນຄວ້າປັບປຸງຮ່າງກົດໝາຍ ວ່າດ້ວຍແນວລາວສ້າງຊາດ; ຮ່າງມະຕິຂອງສະພາແຫ່ງຊາດ ກ່ຽວກັບການຕີຄວາມໝາຍການສ້າງລາຍຮັບເພີ່ມ ຂອງແນວລາວສ້າງຊາດ ແລະ ກອງປະຊຸມຈະໄດ້ຮັບຮອງເອົາການແຕ່ງຕັ້ງ ກຳມະການສູນກາງແນວລາວສ້າງຊາດ ປ່ຽນແທນ ຕື່ມອີກ;
ໂອກາດກ່າວໄຂກອງປະຊຸມ, ທ່ານປະທານ ສນຊ ເປັນກຽດມີຄຳເຫັນຊີ້ນຳ ເຊິ່ງມີບາງເນື້ອໃນໄດ້ເນັ້ນວ່າ: ການດຳເນີນກອງປະຊຸມຄັ້ງນີ້ ໄດ້ປະຕິບັດຕາມລະບອບປະຊຸມ ຂອງຄະນະປະຈຳ ສນຊ, ແຜນວຽກ 6 ເດືອນຕົ້ນປີ 2025; ໃນນີ້, ກອງປະຊຸມໃຊ້ເວລາຈຳກັດ ແຕ່ມີຫຼາຍເນື້ອໃນທີ່ຈະຕ້ອງໄດ້ພ້ອມກັນຄົ້ນຄວ້າ, ປຶກສາຫາລື ແລະ ພິຈາລະນາເປັນເອກະພາບຮັບຮອງເອົາຫຼາຍບັນຫາ ເພື່ອປັບປຸງໃນທ້າຍສະໄໝໃຫ້ມີໝາກມີຜົນ; ສະນັ້ນ, ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມສຸມສະຕິປັນຍາ ໃນການປະກອບຄຳຄິດຄຳເຫັນເນັ້ນໜັກ ຈຸດທີ່ຈະປະກອບຄຳເຫັນ ຢ່າງມີຈຸດສຸມ ຕໍ່ບັນດາຫົວຂໍ້ທີ່ໄດ້ນຳສະເໜີ ເພື່ອເຮັດໃຫ້ກອງປະຊຸມໄດ້ດຳເນີນໄປດ້ວຍຜົນສຳເລັດ ຕາມຈຸດປະສົງ ແລະ ຄາດໝາຍ ທີ່ວ່າງໄວ້.
ບກ: ສຊ.ຈື້ໄຊ
ຂ່າວ: ພ.ພຽງ
ພາບ: ແສງຫຼ້າ
