ສູນກາງແນວລາວສ້າງຊາດ (ສນຊ) ຈັດພິທີປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ (22 ມີນາ 1955 – 22 ມີນາ 2025) ເປັນກຽດປາຖະກະຖາ ໂດຍ ສະຫາຍ ສິນລະວົງ ຄຸດໄພທູນ, ກໍາມະການກົມການເມືອງສູນກາງພັກ,ເລຂາຄະນະພັກ, ປະທານສູນກາງແນວລາວສ້າງຊາດ ທັງເປັນຫົວໜ້າອະນຸກຳມະການໂຄສະນາ-ຂະບວນການ 3 ວັນປະຫວັດສາດຂອງພັກ-ຂອງຊາດ, ເຂົ້າຮ່ວມມີບັນດາ ສະຫາຍ ຄະນະພັກ ສນຊ, ບັນດາສະຫາຍການນຳອົງການຈັດຕັ້ງ ມະຫາຊົນ ຂັ້ນສູນກາງ, ອົງການພາຄີ, ກຳມະການສູນກາງແນວລາວສ້າງຊາດອ້ອມຂ້າງ, ຄະນະທີ່ປຶກສາ ແລະ ຄູ່ຮ່ວມງານ, ຄອບຄົວການນໍາ, ພະນັກງານອາວຸໂສບໍານານ ຕາງໜ້າບັນດາສາສະໜາຕ່າງໆ, ແນວລາວສ້າງຊາດນະຄອນຫຼວງວຽງຈັນ ພ້ອມດ້ວຍສະມາຊິກພັກ ພະນັກງານ-ລັດຖະກອນ ພາຍໃນສູນກາງແນວລາວສ້າງຊາດ ເຂົ້າຮ່ວມທີ່ຫ້ອງປະຊຸມໃຫຍ່ ຊັ້ນ 2 ໃນວັນທີ 27 ກຸມພາ 2025;
ໂອກາດນີ້, ສະຫາຍ ປະທານສູນກາງແນວລາວສ້າງຊາດ ໄດ້ຍົກໃຫ້ເຫັນສາມເນື້ອໃນໃຫຍ່ເປັນຕົ້ນ: ຂະບວນວິວັດແຫ່ງການກໍາເນີດຂອງພັກປະຊາຊົນປະຕິວັດລາວ, ບັນດາປັດໃຈ ແລະ ເງື່ອນໄຂ ໃນການສ້າງຕັ້ງພັກປະຊາຊົນປະຕິວັດລາວ ວັນທີ 22 ມີນາ 1955; 70 ປີ ແຫ່ງການຊີ້ນໍາ-ນຳພາ ຂອງພັກປະຊາຊົນປະຕິວັດລາວ ໃນແຕ່ລະໄລຍະ ເຊັ່ນ: ການນໍາພາ ເຮັດການປະຕິວັດຊາດປະຊາທິປະໄຕ ປີ 1955-1975, ການນຳພາປົກປັກຮັກສາລະບອບໃໝ່ ແລະ ສ້າງພື້ນຖານເສດຖະກິດ-ສັງ ຄົມ ປີ 1975-1985 ແລະ ການນໍາພາສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ຮອບດ້ານ ແລະ ມີຫຼັກ ການຂອງພັກແຕ່ ປີ 1986ເຖີງປັດຈຸບັນ; ຍົກໃຫ້ເຫັນໝາກຜົນແຫ່ງການນໍາພາຂອງພັກໃນການພັດທະນາປະເທດຊາດ ແຕ່ລະຂົງເຂດຄື: ຂົງ ເຂດການເມືອງ, ຂົງເຂດເສດຖະກິດ, ດ້ານວັດທະນະທຳ-ສັງຄົມ, ຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ຂົງເຂດພົວພັນຕ່າງປະເທດ; ໃນນີ້, ສະຫາຍໄດ້ຍົກໃຫ້ເຫັນຕື່ມ ກ່ຽວກັບການເສີມຂະຫຍາຍມູນ ເຊື້ອທາດແທ້ຂອງພັກປະຊາຊົນປະຕິວັດລາວ ເຊິ່ງຕະຫຼອດ 70 ປີ ແຫ່ງການນຳພາ ພັກເຮົາໄດ້ແບກຫາບພາລະກຳປະຫວັດສາດອັນຍິ່ງໃຫຍ່ ໃນແຕ່ລະໄລຍະທີ່ແຕກຕ່າງກັນ ແລະ ສາມາດປະຕິບັດພາລະກຳປະຫວັດສາດເຫຼົ່ານັ້ນໄດ້ຢ່າງສະຫງ່າງາມ; ສໍາລັບໃນຊຸມປີຕໍ່ໜ້າພັກເຮົາຍິ່ງມີຄວາມຮັບຜິດຊອບອັນໜັກໜ່ວງ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ-ເງິນຕາ, ປະກົດການຫຍໍ້ທໍ້ໃນສັງຄົມ, ການສຶກສາ, ຄ່າຄອງຊີບສູງຂຶ້ນ ແລະ ອື່ນໆ, ພັກເຮົາຕັດສິນໃຈນໍາພາ ສືບຕໍ່ຍູ້ແຮງພາລະກິດປ່ຽນແປງໃໝ່ຮອບດ້ານມີຫຼັກການ, ດ້ວຍການເສີມຂະຫຍາຍມູນເຊື້ອທາດແທ້ຂອງພັກ ດັ່ງນີ້: ພັກເຮົາມີຄວາມຈົງຮັກພັກດີ ແລະ ຢຶດໝັ້ນແນວຄິດ-ທິດສະດີມາກ-ເລນິນ ແນວຄິດ ໄກສອນ ພົມວິ ຫານ ກໍຄືຈຸດໝາຍສັງຄົມນິຍົມຢ່າງໜັກແໜ້ນ; ບໍ່ຄໍາພີຕາຍຕົວ ແຕ່ຫາກມີຄວາມເປັນເຈົ້າການປະດິດສ້າງໃນການໝູນໃຊ້ທິດສະດີ ແລະ ບົດຮຽນດ້ານຕ່າງໆ ເຂົ້າກັບເງື່ອນໄຂຕົວຈິງ ແລະ ສະພາບຈຸດພິເສດຂອງປະເທດຊາດ; ມີການສະ ຫຼຸບຖອດຖອນບົດຮຽນຈາກພຶດຕິກຳ ແລະ ປັບປຸງບູລະນະແນວທາງໃຫ້ສອດຄ່ອງຢູ່ໃນແຕ່ລະໄລຍະ; ຢຶດໝັ້ນ ແລະ ປະຕິບັດຢ່າງຖືກຕ້ອງບັນດາຫຼັກການພື້ນຖານດ້ານການຈັດຕັ້ງ ແລະ ການເຄື່ອນໄຫວ ຂອງພັກ ນັ້ນຄືຫຼັກການລວມສູນປະຊາທິປະໄຕ, ເວລາໃດກໍຖືສໍາຄັນການເສີມຂະຫຍາຍຄວາມສາມັກຄີເປັນເອກະພາບ ບົນພື້ນຖານແນວທາງແຜນນະ ໂຍບາຍຂອງພັກ, ພັກນໍາພາເປັນໝູ່ຄະນະບົນພື້ນຖານການແບ່ງງານ ແລະ ມອບໝາຍຄວາມຮັບຜິດຊອບໃຫ້ບຸກຄົນໃນໝູ່ຄະນະ; ພັກເຮົາເວລາໃດກໍຢຶດໝັ້ນໃນທາດແທ້ຖືປະຊາຊົນເປັນກົກ ແລະ ມີຄວາມຈົງຮັກພັກດີເພື່ອຜົນປະໂຫຍດ ລວມຂອງຊາດ ຂອງປະຊາຊົນ; ຖືການສະໜັບສະໜູນຂອງປະຊາຊົນ ເປັນສິ່ງສໍາຄັນຕັດສິນບົດບາດນໍາພາ ແລະ ການກໍາອໍານາດຂອງພັກ; ພັກສະແດງຄວາມກ້າຫານ; ກ້າປະເຊີນໜ້າກັບບັນຫາຕົວຈິງ, ກ້າຮັບເອົາຄວາມເປັນຈິງ ແລະ ກ້າປ່ຽນແປງຕົນເອງ, ດ້ວຍການນຳພາເດັດຂາດ, ໂດຍກົງ, ຮອບດ້ານ, ກຳອຳນາດຕາມກົດໝາຍ; ເຊີດຊູລັກສະນະນໍາໜ້າຂອງພັກ ແລະ ຄວາມເປັນແບບຢ່າງ ຂອງສະມາຊິກພັກ, ຄວາມເດັດຂາດເຂັ້ມງວດໃນການຈຳກັດແກ້ໄຂປະກົດການຫຍໍ້ທໍ້ ທີ່ເຮັດໃຫ້ພັກເສື່ອມອິດທິພົນບົດບາດ ແລະ ຂາດຄວາມເຊື່ອໝັ້ນຈາກປະຊາຊົນ ແລະ ພັກເຮົາເວລາໃດກໍຢຶດໝັ້ນຈິດໃຈຮັກຊາດ ເອກະລາດເປັນເຈົ້າຕົນເອງ, ເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງ, ຕັ້ງໜ້າເສີມຂະຫຍາຍກໍາລັງແຮງພາຍໃນຊາດສົມທົບກັບການພົວພັນຮ່ວມມືກັບພັກປະເທດເພື່ອນມິດຍຸດທະສາດ ແລະ ການຍາດແຍ່ງເອົາການສະໜັບສະໜູນຊ່ວຍ ເຫຼືອຈາກພາຍນອກ ຢ່າງມີຫຼັກການສ້າງເປັນກຳລັງແຮງສັງລວມ ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ.
ບກ: ພ.ບຸບຜາ + ສຊ ຈື້ໄຊ
ຂ່າວ: ຈິດຕະພົງ
ພາບ: ລີ