ໃນຕອນເຊົ້າ ວັນທີ 13 ສິງຫາ 2026 ທີ່ ສູນກາງແນວລາວສ້າງຊາດ(ສນຊ), ທ່ານ ສຈ.ປອ ກິແກ້ວ ໄຂຄຳພິທູນ ກຳມະ ການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ເປັນກຽດປາຖະກະຖາ ຫວນຄືນມູນເຊື້ອແຫ່ງການກຳເນີດ, ເຕີບໃຫຍ່ຂະຫຍາຍຕົວ ແລະ ຜົນງານ ຂອງອົງການແນວລາວສ້າງຊາດ ຄົບຮອບ 76 ປີ (ວັນທີ 13 ສິງຫາ 1950 – 13 ສິງຫາ 2026), ໂດຍ ມີ ທ່ານ ປອ ສິນລະວົງ ຄຸດໄພທູນ ອາດີດປະທານ ສນຊ, ບັນດາທ່ານອາດີດການນຳ ຂອງ ສນຊ, ບັນດາທ່ານກໍາມະການ ສນຊ ອ້ອມຂ້າງສູນກາງ, ຄອບຄົວການນໍາ ແລະ ພະນັກງານ ຂອງ ສນຊ ເຂົ້າຮ່ວມ.
ທ່ານ ປະທານ ສນຊ ໄດ້ຍົກໃຫ້ເຫັນສາເຫດ, ເງື່ອນໄຂຕົ້ນຕໍ ແລະ ປັດໄຈພື້ນຖານທີ່ຈຳເປັນຕ້ອງສ້າງຕັ້ງອົງການແນວລາວສ້າງຊາດຂື້ນ. ພ້ອນນັ້ນ, ກໍໄດ້ຍົກໃຫ້ເຫັນພາລະບົດບາດ, ຄວາມໝາຍຄວາມສຳຄັນ ແລະ ພາລະກຳປະຫວັດສາດ ກໍຄືຜົນງານອັນພົ້ນເດັ່ນ ແຫ່ງການເຕີບໃຫຍ່ຂະຫຍາຍຕົວ 3 ໄລຍະປະຫວັດສາດ ທີ່ມີຊື່ເອີ້ນແຕກຕ່າງກັນ ຄື: ໄລຍະແນວລາວອິດສະຫຼະ (1950-1956): ປະຕິບັດບົດບາດອອກໜ້າແທນພັກ ເຕົ້າໂຮມຄວາມສາມັກຄີປອງດອງທົ່ວປວງຊົນ; ເຮັດສຳເລັດພາລະກຳປົດປ່ອຍຊາດຈາກແອກປົກຄອງລ່າເມືອງຂຶ້ນແບບເກົ່າ ໂດຍການຮັບຮູ້ເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ; ໄລຍະແນວລາວຮັກຊາດ (1956-1979): ເປັນໄລຍະພັກເຄື່ອນໄຫວເປີດເຜີຍ ໄດ້ນໍາພາການປະຕິວັດຊາດ ແລະ ແນວລາວຮັກຊາດ ໄດ້ສືບຕໍ່ພາລະບົດບາດ ເຕົ້າໂຮມຄວາມສາມັກຄີ, ປຸກລະດົມປະຊາຊົນລາວບັນດາເຜົ່າປະກອບສ່ວນໃນຂະບວນການປະຕິວັດຊາດຕ້ານຈັກກະພັດລ່າເມືອງຂຶ້ນແບບໃໝ່ ໃນການດຳເນີນແຜນຍຸດທະສາດ 3 ບາດຄ້ອນ ປຸກລະດົມປວງຊົນລຸກຮື້ຂຶ້ນຢຶດອຳນາດທົ່ວປະເທດໃນວັນທີ 23/8/1975 ແບບ “ບົວບໍ່ຊໍ້ານໍ້າບໍ່ຂຸນ” ແຕ່ຈັບປາໄດ້ທຸກໂຕ ແລະ ປະກາດສ້າງຕັ້ງລະບອບໃໝ່ໃນວັນທີ 2 ທັນວາ 1975; ໄລຍະແນວລາວສ້າງຊາດ (1979-ປະຈຸບັນ): ປຸກລະດົມປະຊາຊົນປະຕິບັດສອງໜ້າທີ່ຍຸດທະສາດ ຕາມແນວທາງປ່ຽນແປງໃໝ່, ເປັນຄັນທຸງເຕົ້າໂຮມຄວາມສາມັກຄີປອງດອງ 4 ເສົາຄຳ້: ປອງດອງຊົນເຜົ່າ, ຊັ້ນຄົນ, ສາສະໜາ ແລະ ຄົນເຊື້ອຊາດລາວທີ່ດໍາລົງຊີວິດ ຢູ່ຕ່າງປະເທດ, ປະຕິບັດວຽກງານການທູດປະຊາຊົນ ກັບປະເທດເພື່ອນມິດຍຸດທະສາດ, ເພື່ອນມິດໃກ້ຄຽງ, ພາກພື້ນ ແລະ ສາກົນ. ຕິດຕາມ-ກວດກາ ການປະຕິບັດໜ້າທີ່ຂອງສະມາຊິກສະພາ, ລັດຖະບານ ແລະ ພະນັກງານ-ລັດຖະກອນ ແລະ ເປັນ ຂົວຕໍ່ທີ່ໜັກແໜ້ນລະຫວ່າງພັກ-ລັດ ກັບ ປະຊາຊົນ.
ໂອກາດນີ້, ທ່ານປະທານ ສນຊ ໄດ້ຮຽກຮ້ອງ ສະມາຊິກພັກ-ພະນັກງານ ຈົ່ງສືບຕໍ່ສຶກສາຄົ້ນຄວ້າ ແລະ ຮໍ່າຮຽນມູນເຊື້ອພື້ນຖານຂອງແນວລາວສ້າງຊາດ ເພື່ອກຳແໜ້ນ, ຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານຫຼັກແຫຼ່ງຂອງການປະຕິວັດ ແລະ ເປັນບ່ອນອີງໃນການປະຕິບັດໜ້າທີ່ວຽກງານໃຫ້ເປັນຮູບປະທຳ.