ຫຼັງຈາກນັ້ນ, ທ່ານຮອງປະທານສູນກາງແນວລາວສ້າງຊາດ ໄດ້ພົບປະໂອ້ລົມ ໂດຍມີທ່ານ ບຸນມີ ໄລປະເສີດ ປະທານແນວລາວສ້າງຊາດແຂວງ ມີກຳມະການສູນກາງແນວລາວສ້າງຊາດ ປະຈໍາແຂວງ, ມີກໍາມະການແນວລາວສ້າງຊາດແຂວງ, ບັນດາຫົວໜ້າ, ຮອງຫົວໜ້າ ແລະ ພະນັກ ງານ-ລັດຖະກອນ ຂອງແນວລາວສ້າງຊາດແຂວງ ເຂົ້າຮ່ວມ. ໂອກາດດັ່ງກ່າວ, ທ່ານ ປະທານແນວລາວສ້າງຊາດແຂວງ ໄດ້ລາຍງານຜົນງານການເຄື່ອນໄຫວຽກງານຂອງແນວລາວສ້າງຊາດໃນໄລຍະທີ່ຜ່ານມາ ໂດຍສະເພາະແມ່ນວຽກງານສາສະໜາ ແລະ ວຽກງານໂຄສະນາ ໃນໄລຍະທີ່ຜ່ານມາ.

      ຕອນທ້າຍ ທ່ານ ຮອງປະທານສູນກາງແນວລາວສ້າງຊາດ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ ແນວລາວສ້າງຊາດແຂວງຍາດມາໄດ້ໃນໄລຍະຜ່ານມາ. ພ້ອມດຽວກັນນັ້ນທ່ານ ຮອງປະທານຍັງໄດ້ຍົກໃຫ້ເຫັນບົດບາດຄວາມສຳຄັນຂອງແນວລາວສ້າງຊາດ ໃນການປຸກລະດົມເຕົ້າໂຮມຄວາມສາມັກຄີປອງດອງປະຊາຊົນລາວບັນດາເຜົ່າ,ບັນດາສາສະໜາຮັກສາໄດ້ມູນເຊື້ອຄວາມສາມັກຄີເປັນປຶກແຜ່ນ; ເອົາໃຈໃສ່ດ້ານບຸກຄະລາກອນ ເພື່ອຍົກສູງບົດບາດ ແລະ ເພີ່ມທະວີຄວາມສາມາດໃນການນໍາພາຂອງແນວລາວສ້າງຊາດແຕ່ລະຂັ້ນໃຫ້ມີຄວາມໜັກແໜ້ນ-ເຂັ້ມແຂງສ້າງໄດ້ການຫັນປ່ຽນໃໝ່ຢ່າງແຂງແຮງ,ເພື່ອເຄື່ອນໄຫວປະຕິບັດໜ້າທີ່ການເມືອງໃນໄລຍະໃໝ່ ຕາມພາລະບົດບາດຂອງຕົນນັບມື້ນັບສູງຂຶ້ນ; ເອົາໃຈໃສ່ວຽກງານໂຄສະນາ-ຂະບວນການ,ວຽກງານສາສະໜາ ເຫັນໄດ້ມູນເຊື້ອແຕ່ລະໄລຍະຂອງແນວລາວສ້າງຊາດ, ຜົນງານທີ່ພົ້ນເດັ່ນ, ວຽກດີຄົນເດັ່ນ ແລະ ເອົາໃຈໃສ່ດ້ານເນື້ອໃນ ສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນ ໄລຍະ 5 ປີ ຜ່ານມາໃຫ້ແທດເໝາະຕົວຈິງ ແລະ ວາງທິດທາງໃນຕໍ່ໜ້າ; ຄຽງຄູ່ກັນນັ້ນ, ທ່ານຍັງໄດ້ເນັ້ນໃຫ້ຄະນະກຳມະການແນວລາວສ້າງຊາດແຂວງ, ພະນັກງານແນວລາວສ້າງຊາດແຕ່ລະຂັ້ນ ຈົ່ງເພີ່ມທະວີຄວາມເປັນເຈົ້າການໃນການຈັດຕັ້ງປະຕິບັດໂດຍເອົາໃຈ ໃສ່ 9 ເນື້ອໃນຂໍ້ແຂ່ງຂັນ ຂອງແນວລາວສ້າງຊາດ ທີ່ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຕິດພັນກັບການກະກຽມ ດໍາເນີນກອງປະຊຸມໃຫຍ່ 3 ຂັ້ນ ຂອງແນວລາວສ້າງຊາດ ໃຫ້ບັນລຸຕາມຈຸດປະສົງທີ່ວາງໄວ້. ພ້ອມກັນນັ້ນ, ຍັງໄດ້ແລກປ່ຽນບົດຮຽນ, ແລກປ່ຽນຄໍາຄິດຄໍາເຫັນ, ບັນຫາຕ່າງໆທີ່ມີຄວາມສົນໃຈ ເພື່ອປຶກສາຫາລື ຊອກຫາວິທີທາງແກ້ໄຂຊ່ວຍກັນຕື່ມອີກ.