ໃນພິທີຜູ້ເຂົ້າຮ່ວມໄດ້ຮັບຊົມພິມຮູບເງົາສັ້ນ 3 ເລື່ອງດັ່ງກ່າວດ້ວຍພາບ, ແສງ,ສີ, ສຽງ ຂອງເຫດການຕົວຈິງໃນປະຫວັດສາດ; ຈາກນັ້ນ, ທ່ານ ດຣ. ນາງ ອິນລາວັນ ແກ້ວບຸນພັນ ກໍ່ໄດ້ໃຫ້ກຽດຂຶ້ນມີຄໍາເຫັນສັງລວມຫຍໍ້ຕໍ່ກັບຄວາມໝາຍຄວາມສໍາຄັນຂອງ 3 ເຫດການດັ່ງກ່າວເປັນຕົ້ນ: ໄຊຊະນະດຽນບຽນຟູ ໃນວັນທີ 7 ພຶດສະພາ 1954 ບໍ່ພຽງແຕ່ແມ່ນໄຊຊະນະຂອງປະຊາຊົນຫວຽດນາມ ແຕ່ຍັງແມ່ນໄຊຊະນະຂອງປະຊາຊົນລາວ ແລະ ປະຊາຊົນກຳປູເຈຍ ທີ່ໄດ້ຮ່ວມສຳພັນສູ້ຮົບ ຮ່ວມຂຸມຄອງຕ້ານສັດຕູໂຕດຽວກັນ ເພື່ອປົດປ່ອຍຕົວເອງ, ເປັນຄວາມເອກອ້າງທະນົງໃຈ ຂອງປະຊາຊົນຫວຽດນາມ ທັງເປັນແວ່ນແຍງອັນໃສແຈ້ງໃຫ້ແກ່ບັນດາປະຊາຊາດ ທີ່ຕົກເປັນຫົວເມືອງຂຶ້ນ ເພື່ອລຸກຂຶ້ນຕໍ່ສູ້ໃນໄລຍະນັ້ນ; ຈາກນັ້ນ, ທ່ານກໍ່ໄດ້ຍົກຄວາມໝາຍຄວາມສໍາຄັນ ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ຊຽງຂວາງ ໃນຄ່ຳຄືນຂອງວັນທີ 18 ພຶດສະພາ 1959 ແລະ ວັນວິລະກໍາໂຕນຄຸກຢ່າງມະຫັດສະຈັນ ຂອງບັນດາທ່ານຜູ້ນໍາພັກ-ແນວລາວຮັກຊາດ ໃນວັນທີ 24 ພຶດສະພາ 1960 ເຊິ່ງສ່ອງແສງໃຫ້ເຫັນວ່າການນຳພາຂອງພັກຖືກຕ້ອງສະຫຼາດສ່ອງໃສ, ຂະບວນຕໍ່ສູ້ທີ່ເປັນທຳ, ແມ່ນໄຊຊະນະອັນໃຫຍ່ຫຼວງຂອງກໍາລັງປະກອບອາວຸດເຮົາ ແລະ ປະຊາຊົນລາວບັນດາເຜົ່າທີ່ຢູ່ພາຍໃຕ້ການນໍາພາຂອງພັກ, ເປັນເຫດການປະຫວັດສາດອັນສຳຄັນຂອງຊາດ, ຂອງພັກ, ຂອງກອງທັບ, ພ້ອມນີ້, ທ່ານຍັງໄດ້ຍົກໃຫ້ເຫັນປັດໄຈພື້ນຖານ ແລະ ສາເຫດທີ່ເຮັດໃຫ້ການຜ່າວົງປິດລ້ອມຂອງກອງພັນທີ່ 2 ແລະ ການໂຕນຄຸກຢ່າງມະຫັດຈັນ ຂອງບັນດາຜູ້ນໍາພັກ ແລະ ແນວລາວຮັກຊາດ ໄລຍະນັ້ນໄດ້ຮັບໄຊຊະນະ ຫຼື ສໍາເລັດຕາມແຜນການທີ່ວາງໄວ້.

ບກ: ພ.ບຸບຜາ

ຂ່າວ+ພາບ: ສຸວັນລີ