ທ່ານ ບຸນຈັນ ມາລາວົງ, ເລຂາພັກເມືອງ, ເຈົ້າເມືອງໆວັງວຽງ ໄດ້ກ່າວຕ້ອນຮັບ ແລະ ລາຍງານການຈັດຕັ້ງປະຕິບັດແຜນພັດທະນາເສດຖິດ-ສັງຄົມຂອງເມືອງໂດຍຫຍໍ້ ເປັນຕົ້ນແມ່ນປະຊາຊົນສ່ວນໃຫຍ່ມີແນວຄິດອຸ່ນອ່ຽງທຸ່ນທ່ຽງ, ເສດຖະກິດຍັງສືບຕໍ່ຂະຫຍາຍຕົວຢ່າງຕໍ່ເນື່ອງ, ດ້ານວຽກງານ ປກຊ-ປກສ ແມ່ນຮັກສາໄດ້ຄວາມສະຫງົບໂດຍພື້ນຖານ. ພ້ອມກັນນີ້, ທ່ານ ສີສຸພັນ ວັດທະນາວົງ ຄະນະປະຈຳພັກເມືອງ, ປະທານແນວລາວສ້າງຊາດເມືອງວັງວຽງ ໄດ້ລາຍງານການຈັດຕັ້ງປະຕິບັດວຽກງານແນວລາວສ້າງຊາດຂອງເມືອງ ຊຶ່ງຄະນະກຳມະການແນວລາວສ້າງຊາດເມືອງວັງວຽງໄດ້ເອົາໃຈໃສ່ສຶກສາອົບຮົມເຕົ້າໂຮມຄວາມສາມັກຄີປະຊາຊາຊົນລາວບັນດາເຜົ່າ, ບັນດາສາສະໜາ, ຊັ້ນຄົນ-ການຈັດສັງຄົມ ແລະ ເພດ-ໄວ ຢູ່ເມືອງວັງວຽງ, ຖືສຳຄັນຜູ້ຊົງຄຸນວຸດທິບັນດາເຜົ່າເພື່ອເປັນກຳລັງແຮງໃນການປຸກລະດົມປະຊາຊົນຈັດຕັ້ງປະຕິບັດມະຕິ XI ຂອງພັກ, ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ກໍ່ຄືມະຕິກອງປະຊຸມໃຫຍ່ອົງຄະນະພັກເມືອງວັງວຽງ ຄັ້ງທີ VII ຊຶ່ງສາມາດປະກາດຮັບຮອງເມືອງວັງວຽງເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ.

     ທີ່ກອງປະຊຸມໄດ້ແລກປ່ຽນຄວາມເຫັນຈາກທ່ານເຈົ້້າແຂວງ, ບັນທ່ານຮອງປະທານ ສນຊ, ກໍາມະການ ສນຊ, ທີ່ປຶກສາ, ຄູ່ຮ່ວມງານ ແລະ ຄະນະກົມ ຢ່າງກົງໄປກົງມາ ເປັນຕົ້ນແມ່ນການພັດທະນາເສດຖະກິດ-ສັງຄົມ, ບົດບາດຂອງວຽກງານແນວລາວສ້າງຊາດ, ວຽກຄົນເຊື້ອຊາດລາວຢູ່ຕ່າງປະເທດ, ວຽກຊັ້ນຄົນ-ການຈັດຕັ້ງສັງຄົມ, ວຽກເຜົ່າ, ວຽກທ່ອງທ່ຽວ (ຄວາມສະອາດເປັນໃຈກາງ), ການສ້າງຜະລິດຕະພັນພາຍໃນເມືອງ ແລະ ວຽກງານອື່ນໆ.

ໂອກາດດັ່ງກ່າວ, ທ່ານປະທານສູນກາງແນວລາວສ້າງຊາດ ໄດ້ມີຄວາມເຫັນຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ແລະ ວຽກງານແນວລາວສ້າງຊາດເມືອງວັງວຽງ:

+ ຊົມເຊີຍຕໍ່ບັນດາຜົນງານທີ່ຄະນະນໍາເມືອງວັງວຽງຍາດມາໄດ້ຕະຫຼອດໄລຍະຜ່ານມາ ໂດຍສະເພາະແມ່ນການຈັດຕັ້ງປະຕິບັດມະຕິ XI ຂອງພັກ ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ;

+ ສືບຕໍ່ເປັນຫຼັກແຫຼ່ງເຕົ້າໂຮມຄວາມສາມັກຄີ “ແນວລາວສ້າງຊາດຢູ່ບ່ອນໃດຕ້ອງສ້າງຄວາມສາມັກຄີຢູ່ບ່ອນນັ້ນ”;

+ ປຸກລະດົມຂົນຂວາຍເຕົ້າໂຮມກໍາລັງແຮງຂອງປວງຊົນລາວທັງຊາດ ເພື່ອພ້ອມກັນປົກປັກຮັກສາ ແລະ ສ້າງສາປະເທດຊາດ ແລະ ພ້ອມທັງປະຕິບັດ 2 ວາລະແຫ່ງຊາດໃຫ້ເປັນຮູບປະທຳ.

+ ພ້ອມກັນຈັດຕັ້ງປະຕິບັດ 4 ການຫັນປ່ຽນຂອງແນວລາວສ້າງຊາດ, ມະຕິ 55 ກ່ຽວກັບວຽກງານການສ້າງລາຍຮັບເພີ່ມຂອງແນວລາວສ້າງຊາດໃນໄລຍະໃໝ່, ມະຕິ 04 ວ່າດ້ວຍການສ້າງເສດຖະກິດ ເອກະລາດເປັນເຈົ້າຕົນເອງ ໃນໄລຍະໃໝ່ ແລະ ມະຕິອື່ນໆ…

+ ພະນັກງານແນວລາວສ້າງຊາດໃນໄລຍະໃໝ່ ຕ້ອງມີ 4 ເສີມສ້າງ ຄື: ເສີມສ້າງຄຸນງາມ ຄວາມດີ, ເສີມສ້າງຄວາມສາມັກຄີ, ເສີມສ້າງຄຸນວຸດທິ ແລະ ເສີມສ້າງຄຸນນະທໍາ.

      ນອກຈາກນັ້ນ, ທ່ານປະທານສູນກາງແນວລາວສ້າງຊາດ ພ້ອມດ້ວຍຄະນະຍັງໄດ້ໄປຢ້ຽມຊົມໂຄງການພັດທະນາບໍ່ຖ່ານຫີນຂອງບໍລິສັດ ເຟີສ ປາຊີຟິກ ຈໍາກັດ ແລະ ໂຄງການພັດທະນາສວນສາທິດ ອຸດສາຫະກໍາການທ່ອງທ່ຽວວັດທະນະທໍາຂອງເມືອງວັງວຽງ ອີກດ້ວຍ.

ບກ: ແພງພັນ

ພາບ-ຂ່າວ: ເລົ່າລໍ່