ທ່ານ ດຣ ອິນລາວັນ ແກ້ວບຸນພັນ ກໍາມະການສູນກາງພັກ, ຮອງປະທານ ສູນກາງແນວລາວສ້າງຊາດ(ສນຊ)ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ວຽກງານແນວລາວສ້າງຊາດ ຢູ່ແຂວງ ຫົວພັນ ໃນລະຫວ່າງວັນທີ 27 ທັນວາ 2024 ເຊິ່ງໄດ້ເຂົ້າພົບການນໍາແຂວງ ເພື່ອແຈ້ງຈຸດປະສົງ ໂດຍໃຫ້ກຽດຕ້ອນຮັບຂອງທ່ານ ພຸດພັນ ແກ້ວວົງໄຊ ຄະນະປະຈໍາພັກແຂວງ ຮອງເຈົ້າແຂວງຫົວພັນ ຈາກນັ້ນ ກໍ່ໄດ້ລົງພົບປະແນວລາວສ້າງຊາດແຂວງ ແລະ ແນວລາວສ້າງຊາດ ເມືອງວຽງໄຊ ທີ່ຫ້ອງການແນວລາວສ້າງຊາດເມືອງວຽງໄຊ ໂດຍມີພະນັກງານແນວລາວສ້າງຊາດແຂວງ-ເມືອງດັ່ງກ່າວ ເຂົ້າຮ່ວມ.

      ໃນການພົບປະ ທ່ານຮອງປະທານ ສນຊ ໄດ້ຮັບຟັງການລາຍງານຫຍໍ້ ກ່ຽວກັບສະພາບພົ້ນເດັ່ນໃນການເຄື່ອນໄຫວວຽກງານ ຈາກທ່ານ ວີີີເຕັງ ຈືື່ໄມເຕັງ ຮັກສາການປະທານແນວລາວສ້າງຊາດແຂວງ, ທ່ານ ອ່ອນ ແພງພູວັນ ປະທານແນວລາວສ້າງຊາດເມືອງ ໂດຍຫຍໍ້, ຈາກນັ້ນ ທ່ານຮອງປະທານ ສນຊ ໄດ້ມີຄໍາເຫັນໂອ້ລົມບາງເນື້ອໃນໂດຍໄດ້ເນັ້ນໃສ່ ບາງບັນຫາເປັນຕົ້ນ: ການເຕົ້າໂຮມຄວາມສາມັກຄີປະຊາຊົນບັນດາເຜົ່າ, ສາສະໜາ, ຊັ້ນຄົນ, ເພດ-ໄວ ໃຫ້ແໜ້ນແຟ້ນ ເປັນເອກະພາບກັນ ໃນການຈັດຕັ້ງປະຕິບັດບັນດາແນວທາງນະໂຍບາຍຂອງພັກ, ນິຕິກໍາຂອງລັດ ແລະ ຂອງແນວລາວສ້າງຊາດ ກໍ່ຄືຂອງອົງຄະນະພັກແຂວງ-ເມືອງ; ສຶກສາອົບຮົມ ແລະ ປຸກລະດົມຂົນຂວາຍປະຊາຊົນທຸກຊົນເຜົ່າ ເຂົ້າຮ່ວມຂະບວນການກະກຽມກອງປະຊຸມໃຫຍ່ 3 ຂັ້ນຂອງແນວລາວສ້າງຊາດຕິດພັນກັບການກະກຽມກອງປະຊຸມໃຫຍ່ 3 ຂັ້ນຂອງພັກ; ບັນຫາບຸກຄະລາກອນຂອງແນວລາວສ້າງຊາດ ເພື່ອກະກຽມໃຫ້ແກ່ກອງປະຊຸມໃຫຍ່ ແລະ ສະເໜີໃຫ້ແນວລາວສ້າງຊາດແຂວງ, ເມືອງ ພ້ອມກັນເອົາໃຈໃສ່ຜັນຂະຫຍາຍ ຂໍ້ແຂ່ງຂັນ 4 ເສີມສ້າງຂອງແນວລາວສ້າງຊາດ ໃຫ້ເປັນຮູບປະທໍາເທື່ອລະກ້າວ ໂດຍສະເພາະເສີມສ້າງຄວາມສາມັກຄີ ແລະ ສ້າງຄຸນງາມຄວາມດີຕໍ່ສັງຄົມ ແລະ ປະເທດຊາດ.

      ໃນໂອກາດດັ່ງກ່າວ ຍັງໄດ້ນໍາເອົາເງິນສົດຈໍານວນ 50ລ້ານກີບ ປະກອບສ່ວນຊຸກຍູ້ວຽກງານໂຄສະນາ ໂດຍປັບປຸງປົວແປງຫໍມູນເຊື້ອແນວລາວສ້າງຊາດ ທີ່ເມືອງວຽງໄຊ ແລະ ມອບເງິນສົດຈໍານວນໜຶ່ງ ເພື່ອສືບຕໍ່ໃຫ້ກໍາລັງໃຈບັນດາເມືອງ ແລະ ຄອບຄົວທີ່ຖືກຜົນກະທົບຈາກໄພນໍ້າຖ້ວມໃນປີ 2024 ນີ້ ຕື່ມອີກ.