ໃນໂອກາດນີ້, ທ່ານ ປອ ຈັນທອນ ສິດທິໄຊ ຜູ້ອໍານວຍການໃຫຍ່ ທະນາຄານຄໍາລາວ ຈໍາກັດ ໄດ້ລາຍງານກ່ຽວກັບ ພາບລວມການດໍາເນີນທຸລະກິດ ແລະການເຄື່ອນໄຫວວຽກງານຂອງທະນາຄານຄໍາ ລາວຈໍາກັດ(LBB)ໂດຍມີ 5 ເນື້ອໃນໃຫຍ່ເປັນຕົ້ນ: ທ່າແຮງຂອງອຸດສາຫະກໍາ ຄໍາ ຂອງ ສປປ ລາວ; ຄວາມເປັນມາ ແລະ ໂຄງສ້າງຂອງທະນາຄານຄໍາ ລາວ; ພາບລວມທຸລະກິດຂອງ ທະນາຄານຄໍາລາວ; ການຍົກລະດັບ ມາດຕະຖານ ອຸດສາຫະກໍາຄໍາ-ການສໍາຮອງຄໍາ ແລະ ການສ້າງຕັ້ງໂຮງກັ່ນຫຼອມຄໍາ ແລະ ຍຸດທະສາດ, ຄາດຄະເນຜົນປະໂຫຍດ ຕໍ່ເສດຖະກິດຂອງປະເທດຊາດ, ພ້ອມກັນນີ້ ທ່ານຍັງໄດ້ຍົກໃຫ້ຮູ້ກ່ຽວກັບວິໄສທັດ ເພື່ອສ້າງສະຖຽນລະພາບ ດ້ານເສດຖະກິດ-ການເງິນສ້າງໃຫ້ ສປປ ລາວ ເປັນສູນກາງດ້ານການຄ້າຄໍາ ລໍ້າໜ້າດ້ານການກັ່ນຫຼອມ ວັດຖຸມີຄ່າໃນພາກພຶ້ນອາຊີ ພາຍໃນ 5 ປີຕໍ່ໜ້າ ທັງເປັນພາລະກິດເສີມຂະຫຍາຍຄວາມໂປ່ງໃສຂອງຕະຫຼາດ, ການປະຕິບັດທີ່ດີທີ່ສຸດຂອງສາກົນ ໃນການ ຊື້-ຂາຍ ຄໍາ ລະຫວ່າງນັກລົງທືນ ແລະ ບັນດາຜູ້ມີສ່ວນຮ່ວມໃນຕະຫຼາດ. ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມໄດ້ພ້ອມກັນແລກປ່ຽນຄໍາຄິດຄໍາເຫັນກົງໄປກົງມາຢ່າງຟົດຟື້ນ ແລະ ໄດ້ຮັບຟັງການອະທິບາຍຊີ້ແຈງຈາກທ່ານ ປອ ຈັນທອນ ສິດທິໄຊ.

     ໃນໂອກາດນີ້, ທ່ານປະທານ ສນຊ ໄດ້ເປັນກຽດມີຄໍາເຫັນໂອ້ລົມ ໂດຍ ທ່ານ ໄດ້ເນັ້ນ 4 ເນື້ອໃນຈິດໃຈຕໍ່ທະນາຄານຄໍາ ລາວ ເປັນຕົ້ນ: 1) ການເຜີຍແຜ່ ຊຸກຍູ້ ແລະ ປຸກລະດົມແນວຄິດຂອງປະຊາຊົນລາວບັນດາເຜົ່າ ເພື່ອເຂົ້າຮ່ວມໃນວຽກງານຂອງທະນາຄານຄໍາລາວ ອັນນີ້ແມ່ນເປົ້າໝາຍສໍາຄັນຫຼາຍ ເຊິ່ງພວກເຮົາຕ້ອງເຂົ້າໃຈເອກະພາບໄປທິດທາງດຽວ ໃນການຜັນຂະຫຍາຍແນວທາງ ນະໂຍບາຍຂອງພັກ-ລັດ ຕໍ່ຈຸດປະສົງການສ້າງຕັ້ງທະນາຄານຄໍາ ລາວ; 2) ຜ່ານການຈັດຕັ້ງປະຕິບັດຂອງທະນາຄານຄໍາ ມາໃນໄລຍະໜຶ່ງເຫັນວ່າມີຄວາມຄືບໜ້າໃນການການຊື້-ຂາຍຄໍາ ສະນັ້ນໃຫ້ພ້ອມກັນສືບຕໍ່ປຸກລະດົມໂຄສະນາ ເພື່ອກະຕຸ້ນເສດຖະກິດຂອງ ສປປ ລາວ, ພວກເຮົາໄດ້ສ້າງຕັ້ງທະນາຄານຄໍາແລ້ວ ການຈໍາໜ່າຍຄໍາ ຕໍ່ໄປນີ້ ຕ້ອງໄດ້ປະຕິບັດໄປຕາມແຜນຍຸດທະສາດ, ແຜນວຽກ ວິໄສທັດ ທີ່ພັກ-ລັດ ແລະ ທະນາຄານຄໍາວາງອອກ ເພື່ອບັນລຸຜົນ 3) ພວກເຮົາໃນນາມການນໍາອົງການແນວລາວສ້າງຊາດແຕ່ລະຂັ້ນ, ປະຊາຊົນລາວບັນດາເຜົ່າ, ນັກທຸລະກິດ ຕ້ອງໄດ້ສະໜັບສະໜູນດ້ານນະໂຍບາຍຂອງທະນາຄານເປັນຕົ້ນ ຈົ່ງພາກັນເຂົ້າໃຈຕໍ່ວິໄສທັດ, ຈຸດປະສົງ, ດ້ານເນື້ອໃນ, ທິດທາງ ແລະ ແຜນວຽກຂອງທະນາຄານຄໍາລາວ; ພວກເຮົາຈະໄດ້ພ້ອມກັນເຂົ້າຮ່ວມຊື້-ຂາຍ ຫລືໃຊ້ບໍລິການທະນາຄານຄໍາ, ເປັນສະມາຊິກໃຫ້ຫຼາຍຂຶ້ນເພື່ອໃຫ້ທະນາຄານເຕີບໃຫຍ່ຂະຫຍາຍຕົວຂຶ້ນເລື້ອຍໆ 4) ໃນນາມສ່ວນຕົວໄດ້ຕິດຕາມເບິ່ງກຸ່ມບໍລິສັດ ພົງສະຫວັນ ຂໍສະແດງຄວາມຊົມເຊີຍ ຕໍ່ຄະນະຮັບຜິດຊອບທຸກພາກສ່ວນ ທີ່ມີຄວາມກ້າຫານສ້າງອັນໃໝ່ໃຫຍ່ໂຕ ແລະ ທັນສະໄໝ ຈາກການຜັນຂະຫຍາຍແນວຄິດຂອງກອງປະຊຸມລັດຖະບານເປີດກວ້າງ ຄັ້ງທີ 1 ໃນປີ 2024 ກ່ຽວກັບ 9 ມາດຕະການໃນການແກ້ໄຂບັນຫາເສດຖະກິດ-ການເງິນ ເປັນຮູບປະທໍາ.

    ເຂົ້າຮ່ວມກອງປະຊຸມດັ່ງກ່າວມີການນໍາພັກ-ລັດ ແລະ ພະນັກງານຫຼັກແຫຼ່ງຈາກຫຼາຍກະຊວງ-ອົງການ, ຜູ້ປະກອບການ, ຫົວໜ່ວຍທຸລະກິດ ແລະ ພະນັກງານກ່ຽວຂ້ອງເຂົ້າຮ່ວມ. ໃນໂອກາດດັ່ງກ່າວ ທ່ານປະທານ ສນຊ ພ້ອມດ້ວຍຄະນະຂອງ ສນຊ ຍັງໄດ້ໄປຢ້ຽມຢາມທະນາຄານຄໍາ ລາວ ຈໍາກັດຕື່ມອີກ.

ບກ: ພ ບຸບຜາ

ຂ່າວ-ຮູບ: ລີ.