ກອງປະຊຸມໄດ້ດຳເນີນພາຍໃຕ້ຫົວຂໍ້ “ຍົກສູງຄວາມສາມາດນຳພາຂອງຄະນະໜ່ວຍພັກ, ປະຕິບັດ 3 ພາລະບົດບາດຂອງຫ້ອງການ ໃຫ້ທັນສະໄໝ ແລະ ວ່ອງໄວ; ສູ້ຊົນສ້າງເສດຖະກິດເອກະລາດ ເປັນເຈົ້າຕົນເອງ; ສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຂອງອົງຄະນະພັກ ສນຊ ຄັ້ງທີ VI ໃຫ້ປະກົດຜົນເປັນຈິງ”; ໃນນີ້, ຜູ້ເຂົ້າຮ່ວມໄດ້ຮັບຟັງການຜ່ານລາຍງານການເມືອງປະກອບດ້ວຍ 2 ພາກ ຄື: ຕີລາຄາຜົນການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ VIII ເຊິ່ງໄດ້ຍົກໃຫ້ເຫັນຈຸດດີ, ຈຸດອ່ອນ-ຂໍ້ຄົງຄ້າງ ພ້ອມທັງບົດຮຽນທີ່ຖອດຖອນໄດ້ ໃນໄລຍະຜ່ານມາ ແລະ ທິດທາງໜ້າທີ່ ໄລຍະ 2025-2030 ໂດຍມີທິດທາງໜ້າທີ່ລວມ, ຄາດໝາຍສູ້ຊົນ ແລະ ວຽກງານຈຸດສຸມໃນແຕ່ລະດ້ານ; ພ້ອມນີ້, ຄະນະໜ່ວຍພັກໄດ້ຜ່ານບົດສຳຫຼວດການນຳພາລວມຂອງຄະນະໜ່ວຍພັກສະໄໝທີ VIII ພ້ອມທັງກ່າວລາໜ້າທີ່; ໂອກາດນີ້, ບັນດາສະຫາຍຜູ້ແທນສົມບູນ ໄດ້ໃຊ້ສິດປະຊາທິປະໄຕບ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ຈຳນວນ 7 ສະຫາຍ ເລືອກເອົາ 5 ສະຫາຍ; ກອງປະຊຸມຄັ້ງປະຖົມມະລຶກ ໄດ້ຮັບຮອງເອົາການເລືອກຕັ້ງ ຄະນະໜ່ວຍພັກຫ້ອງການ ສະໄໝທີ IX ຈຳນວນ 5 ສະຫາຍ ຄື: ສະຫາຍ ປອ. ດາວຽງສັກ ຫວ່າງວິຈິດ ເປັນເລຂາໜ່ວຍພັກ, ສະຫາຍ ດາວັນ ໂຊຕຸກີ ເປັນຮອງເລຂາໜ່ວຍພັກ, ສະຫາຍ ທິດສະຫວັນ ວົງພັກດີ ເປັນກຳມະການໜ່ວຍພັກ ທັງເປັນປະທານກວດກາ, ສະຫາຍ ແພງສີ ທໍ່ ແລະ ສະຫາຍ ໄຊຍະສິດ ແສງພະທິດ ເປັນກຳມະການໜ່ວຍພັກ;

     ໂອກາດນີ້, ສະຫາຍປະທານ ສນຊ ເປັນກຽດໂອ້ລົມຕໍ່ກອງປະຊຸມ ໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານ ກໍ່ຄືຜົນສຳເລັດທີ່ໜ່ວຍພັກຍາດມາໄດ້ໃນໄລຍະຜ່ານມາ; ໃນນີ້, ໄດ້ເນັ້ນກ່ຽວກັບທິດທາງແຜນການ ເຊິ່ງມີບາງເນື້ອໃນ ວ່າ: ໜ່ວຍພັກຫ້ອງການ ຕ້ອງໄດ້ກຳແໜ້ນສະພາບຈຸດພິເສດພື້ນຖານໃນການຈັດຕັ້ງປະຕິບັດຕາມ 3 ພາລະບົດບາດ ໃນການເປັນເສນາທິການ, ການປະສານງານ ແລະ ການບໍລິການ-ຮັບໃຊ້ ໃຫ້ໄດ້ຮັບໝາກຜົນດີ, ເອົາໃຈໃສ່ໃນ ການເສີມສ້າງຄວາມເປັນເຈົ້າການຫັນເປັນທັນສະໄໝດ້ານວຽກງານຫ້ອງການ, ພ້ອມທັງເອົາໃຈໃສ່ບຳລຸງສ້າງພະນັກງານໃຫ້ໄດ້ຮຸ່ນໜຸ່ມ, ຮຸ່ນກາງ ແລະ ຮຸ່ນອາວຸໂສ; ພ້ອມນີ້, ໄດ້ຮຽກຮ້ອງໃຫ້ຄະນະໜ່ວຍພັກຊຸດໃໝ່ ຕ້ອງໄດ້ມີການແບ່ງໜ້າ ທີ່ຄວາມຮັບຜິດຊອບໃຫ້ແຕ່ລະບຸກຄົນ, ແຕ່ລະສະຫາຍຕ້ອງເປັນແບບຢ່າງ, ມີຄວາມເສຍສະຫຼະຫຼາຍຂຶ້ນຕື່ມ ເພື່ອພ້ອມກັນນຳພາ-ຊີ້ນຳ ວຽກງານຫ້ອງການ ໃຫ້ມີໝາກມີຜົນໃໝ່ໃຫຍ່ຫຼວງກວ່າເກົ່າ.

ບກ: ພ. ບຸບຜາ

ຂ່າວ: ພ.ພຽງ

ພາບ: ແສງຫຼ້າ