ໂດຍຕອບສະໜອງຕາມການເຊື້ອເຊີນ ຂອງສະພາສູງ ສະຫະພັນຣັດເຊຍ, ໃນລະຫວ່າງວັນທີ 03-09 ຕຸລາ 2025 ຄະນະຜູ້ແທນຂັ້ນສູງ ຂອງສູນກາງແນວລາວສ້າງຊາດ ນໍາໂດຍທ່ານ ປອ.ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ສະຫະພັນຣັດເຊຍ. ໃນໂອກາດນີ້, ຄະນະຜູ້ແທນຂັ້ນສູງສູນກາງແນວລາວສ້າງຊາດ ໄດ້ພົບປະກັບ ທ່ານ ນິໂກລາຍ ອານເດຼຢີວີຈ ຊູຣາວະລົບ ຮອງປະທານສະພາສູງ ສ.ຣັດເຊຍ, ປະທານກຸ່ມມິດຕະພາບລັດຖະສະພາ ຂອງ ສ.ຣັດເຊຍ ກັບ ສປປ ລາວ ພ້ອມດ້ວຍຄະນະ, ສອງຝ່າຍໄດ້ແຈ້ງສະພາບພົ້ນເດັ່ນໃນການເຄື່ອນໄຫວວຽກງານຂອງຕົນໃນໄລຍະຜ່ານມາໃຫ້ກັນຊາບ; ສະພາສູງຣັດເຊຍ ໄດ້ສະແດງທັດສະນະສະໜັບສະໜູນນະໂຍບາຍ ຂອງ ສປປ ລາວ ຢ່າງສະເໝີຕົ້ນສະເໝີປາຍ ແລະຊົມເຊີຍທັດສະນະ ຂອງ ສປປ ລາວ ຕໍ່ບັນຫາທີ່ຕິດພັນກັບຣັດເຊຍ; ໄດ້ຕີລາຄາສູງຕໍ່ບົດບາດ ຂອງແນວລາວສ້າງຊາດ ໃນການເຕົ້າໂຮມຄວາມສາມັກຄີທົ່ວປວງຊົນ ແລະມີຄວາມພະຍາຍາມສູງໃນການສ້າງເສດຖະກິດ ເປັນເຈົ້າຕົນເອງ ແລະມີຄວາມມຸ້ງຫວັງຈະຮ່ວມມືກັບ ສປປ ລາວໃນຂົງເຂດວຽກງານຕ່າງໆ. ທ່ານປະທານສູນກາງແນວລາວສ້າງຊາດ ໄດ້ສະແດງຄວາມຂອບໃຈ ຕໍ່ການເຊື້ອເຊີນ ແລະຕີລາຄາສູງໃນການເຄື່ອນໄຫວຢ້ຽມຢາມຄັ້ງນີ້, ຊື່ງຢູ່ໃນບັນຍາກາດ ທີ່ສອງປະເທດມີຫຼາຍເຫດການສໍາຄັນທາງປະຫວັດສາດ; ໄດ້ສະແດງຄວາມຂອບໃຈ ແລະຮູ້ບຸນຄຸນຕໍ່ ສ.ຣັດເຊຍ ທີ່ໄດ້ໃຫ້ການຊ່ວຍເຫຼືອ ແລະສະໜັບສະໜູນ ສປປ ລາວ ໃນໄລຍະຜ່ານມາ. ສອງຝ່າຍຈະສືບຕໍ່ພ້ອມກັນຄົ້ນຄວ້າ ແລະປຶກສາຫາລື ເພື່ອຊອກຊ່ອງທາງໃນການຮ່ວມມືກັນໃນຕໍ່ໜ້າ.