ທ່ານ ສຈ. ປອ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ສນຊ) ຕ້ອນຮັບການເຂົ້າຢ້ຽມພົບປະຂອງ ທ່ານ ບີນລາ ດຸຣານີ ຕາງໜ້າອົງການ UNICEF ປະຈໍາ ສປປ ລາວ ພ້ອມດ້ວຍຄະນະ ຢູ່ທີ່ສູນກາງແນວລາວສ້າງຊາດ, ໃນວັນທີ 17 ເມສາ 2026.

      ທ່ານ ບີນລາ ດຸຣານີ ຕາງໜ້າອົງການ UNICEF ໄດ້ສະແດງຮູ້ສຶກເປັນກຽດຢ່າງສູງທີ່ໄດ້ເຂົ້າພົບປະກັບທ່ານປະທານສູນກາງແນວລາວສ້າງຊາດ ໃນໂອກາດທີ່ໄດ້ຮັບໜ້າທີ່ໃໝ່ພ້ອມທັງແຈ້ງຈຸດປະສົງ ແລະ ສະພາບການເຄື່ອນໄຫວວຽກງານຂອງອົງການ UNICEF ໄລຍະຜ່ານມາ ຢູ່ ສປປ ລາວ ໂດຍສະເພາະແມ່ນການຮ່ວມມືກັບແນວລາວສ້າງຊາດ ໃນການຜັນຂະຫຍາຍບຸລີມະສິດແຫ່ງຊາດສົ່ງເສີມສຸຂະພາບທີດີ ໂດຍສະເພາະ ແມ່ຍິງ-ເດັກນ້ອຍ ແລະ ໄວໜຸ່ມໃນເຂດເປົ້າໝາຍຫ່າງໄກຊອກຫຼີກ ແລະ ຊົນເຜົ່າ ຕາມແຜນງານຂອງ UNICEF ເຊີ່ງຜ່ານມາກໍ່ໄດ້ຮັບການຮ່ວມມື ແລະ ສະໜັບສະໜູນຈາກ ສູນກາງແນວລາວສ້າງຊາດ ຕາມພາລະບົດບາດ ເຊີ່ງຈະເປັນສ່ວນໜື່ງໃນການປະກອບສ່ວນເຂົ້າໃນການພັດທະນາທີຍືນຍົງ

      ໂອກາດນີ້, ທ່ານປະທານສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ຜົນງານອັນໃຫຍ່ຫຼວງ ຂອງ ອົງການ UNICEF ໃນຖານະທີ່ເປັນຄູ່ຮ່ວມງານທີ່ຍາວນານຂອງລັດຖະບານ ແລະ ປະຊາຊົນລາວ, ເວົ້າລວມເວົ້າສະເພາະໄດ້ຮ່ວມມືກັບສູນກາງແນວລາວສ້າງຊາດຕະຫຼອດໄລຍະຜ່ານມາ ປີນີ້ ຄົບຮອບ 52 ປີ ຂອງການພົວພັນຮ່ວມມືລະຫວ່າງ ສປປ ລາວ ກັບ UNICEF ແລະ ຫວັງວ່າຈະສືບຕໍ່ຮ່ວມມືຢ່າງໃກ້ຊິດກັບສູນກາງແນວລາວສ້າງຊາດ ພາຍໃຕ້ການນຳພາຂອງພັກ-ລັດ, ເພື່ອສະໜັບສະໜູນບູລິມະສິດຮ່ວມກັນສຳລັບ ການສົ່ງເສີມສຸຂະພາບ, ເດັກນ້ອຍ ແລະ ໄວໜຸ່ມລາວ ລວມທັງການບໍລິການທີ່ມີ ຄຸນນະພາບ: ການສຶກສາ, ສາທາ, ການປົກປ້ອງ ແລະ ສະຫວັດດີການສັງຄົມ ເພື່ອຄວາມຢືດຢຸ່ນທີ່ດີຂຶ້ນໃນການປະເຊີນກັບສະພາບອາກາດ ແລະ ຄວາມສ່ຽງອື່ນໆທີ່ເກີດຂຶ້ນ; ທ່ານໄດ້ຍົກໃຫ້ເຫັນກ່ຽວກັບພາລະບົດບາດ ແລະ ໜ້າທີຫຼັກ ຂອງ ແນວລາວສ້າງຊາດ ຕື່ມອີກ