ກອງປະຊຸມ, ໄດ້ຍົກໃຫ້ເຫັນວ່າ: ການໃຫ້ວັກຊີນ ແມ່ນການປົກປ້ອງເດັກ ທີ່ມີປະສິດທິພາບທີ່ສຸດ ຈາກພະຍາດທີ່ອັນຕະລາຍຕໍ່ຊີວິດ, ເປັນວຽກງານບຸລິມະສິດໃນການສ້າງພຸມຄຸ້ມກັນ ແຫ່ງຊາດ ແລະ ຄວາມມຸ່ງໝັ້ນຂອງລັດຖະບານ; ກະຊວງສາທາລະນະສຸກ ໄດ້ໃຫ້ຄວາມສໍາຄັນຕໍ່ການສ້າງຄວາມເຂັ້ມແຂງ ດ້ານການບໍລິການສັກຢາກວັກຊີນ ແລະ ເພື່ອຮັບປະກັນວ່າເດັກນ້ອຍຢູ່ລາວທຸກໆຄົນໄດ້ຮັບວັກຊີນ, ການມີສ່ວນຮ່ວມຂອງທຸກພາກສ່ວນ ໃນການສົ່ງເສີມໂຄສະນາກ່ຽວກັບການໃຫ້ວັກຊີນໂປລິໂອໃນລະດັບຊາດ ແມ່ນມີຄວາມສຳຄັນຫຼາຍຕໍ່ຊຸມຊົນ ແລະ ຢູ່ເຂດຫ່າງໄກສອກຫຼີກ; ການປົກປ້ອງສຸຂະພາບຂອງເດັກແມ່ນຕ້ອງອາໄສຂໍ້ມູນທີ່ໜ້າເຊື່ອຖື ແລະ ການມີສ່ວນຮ່ວມຂອງຊຸມຊົນ ເພື່ອຊ່ວຍກັນໂຄສະນາໃຫ້ປະຊາຊົນລາວບັນດາເຜົ່າ ມີຄວາມເຂົ້າໃຈຕໍ່ວຽກງານປ້ອງກັນ-ຮັກສາສຸຂະພາບ ແລະ ໄດ້ຮັບວັກຊີນກັນພະຍາດຢ່າງຄົບຖ້ວນ ກວ້າງຂວາງ ທົ່ວເຖີງ ຕາມຫຼັກການວຽກງານໂພສະນາການ ຂອງກະຊວງສາທາລະນະສຸກ ເພື່ອໃຫ້ເດັກນ້ອຍລາວທຸກໆຄົນມີສຸຂະພາບທີ່ດີ.

     ທ່ານ ປະທານ ສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍ ຕໍ່ອົງການປົກຄອງພັກ-ລັດ ແຕ່ສູນກາງຮອດທ້ອງຖິ່ນ, ອົງການຢູນີເຊັບ ປະຈໍາລາວ ແລະ ອົງການຈັດຕັ້ງສາກົນ ທຸກພາກສ່ວນ ທີ່ໄດ້ເຄື່ອນໄຫວວຽກງານດັ່ງກ່າວ ຢ່າງມີຜົນສຳເລັດໃນແຕ່ລະໄລຍະ ແລະ ທ່ານ ໄດ້ເນັ້ນຕື່ມວ່າ: ໃຫ້ທຸກພາກສ່ວນສືບຕໍ່ປັບປຸງລະບົບປະສານງານໃຫ້ມີຄວາມກົມກຽວ, ໃຫ້ມີການແບ່ງວຽກງານກັນລະອຽດ ກໍານົດພາລະບົດບາດ ຂອງແຕ່ລະພາກສ່ວນໃຫ້ສາມາດເຄື່ອນໄຫວໄດ້ສະດວກ, ຖືກຕ້ອງ ໂດຍສະເພາະ ການໂຄສະນາສຶກສາອົບຮົມ ນໍາເອົາແນວທາງຂອງພັກ ເຂົ້າສູ່ການປະຕິບັດຕົວຈິງຢ່າງເປັນຮູບປະທໍາ ໂຄສະນາເຜີຍແຜ່ວຽກງານດັ່ງກ່າວໃຫ້ກວ້າງຂວາງ ທົ່ວເຖີງ ໃຫ້ປະຊາຊົນໄດ້ຮັບຮູ້ເຂົ້າໃຈ, ນຳພາປະຊາຊົນເຮັດ ແລະ ປະຊາຊົນປະຕິບັດ, ໂຄສະນາດ້ວຍຫຼາຍຮູບແບບ ເປັນຕົ້ນ: ນຳໃຊ້ພາສາທ້ອງຖິ່ນ ແລະ ເຄົາລົບຮີດຄອງປະເພນີທີ່ຖືກຕ້ອງ; ​ເສີມຂະຫຍາຍບົດບາດຜູ້ຊົງຄຸນວຸດທິໃຫ້ມີສ່ວນຮ່ວມ ປະກອບສ່ວນເຂົ້າໃນການສຶກສາອົບຮົມໃຫ້ປະຊາຊົນມີການປ່ຽນແປງທາງດ້ານພຶດຕິກຳ, ​ສ້າງຕາໜ່າງແນວໂຮມຄອບຄົວແນວໂຮມເປັນຄອບຄົວແບບຢ່າງດ້ານສາທາລະນະສຸກ ແລະ ສ້າງຄວາມໝັ້ນໃຈໃນການບໍລິການສຸຂະພາບ ເພື່ອໃຫ້ເດັກທຸກໆຄົນ ໄດ້ຮັບວັກຊີນປ້ອງກັນພະຍາດ ແລະ ທ່ານຍັງໄດ້ຮຽກຮ້ອງ ໃຫ້ອົງການຢູນິເຊັບ ສືບຕໍ່ໃຫ້ການ ຮ່ວມມື ແລະ ໃຫ້ການສະໜັບສະໜູນວຽກງານສຸຂະພາບ ໃຫ້ແກ່ ສປປ ລາວ ໃນຫຼາຍຮູບການຕື່ມອີກ.

ຂ່າວ+ພາບ: ເຢ

ບກ: ອຸດອນ