ໃນໂອກາດນີ້, ທ່ານ ປະທານ ສນຊ ໄດ້ສະແດງຄວາມຕ້ອນຮັບ ຊົມເຊີຍ ແລະ ພ້ອມທັງຕີລາຄາສູງ ຕໍ່ທ່ານ ນາງ ຄຣອງຂະນິດ ຣັກຈະເລີນ ທີ່ໄດ້ມາປະຕິບັດໜ້າທີ່ການທູດ ຢູ່ ສປປ ລາວ ໃນຄັ້ງນີ້. ຊຶ່ງການມາຂອງທ່ານ ຖືເປັນການປະກອບສ່ວນສຳຄັນ ໃນການເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມື ທີ່ເຄີຍມີມາແຕ່ດົນນານ ໃຫ້ນັບມື້ແໜ້ນແຟ້ນ. ເວົ້າລວມ ແລະ ເວົ້າສະເພາະ ແມ່ນຄວາມສາມັກຄີ ລະຫວ່າງ ສອງປະເທດ ລາວ-ຣາຊະອານາຈັກໄທ ກໍຄື ປະຊາຊົນຂອງທັງສອງປະເທດ ເຊິ່ງມີຮິດຄອງປະເພນີ, ວັດທະນະທໍາ ແລະ ພາສາຄ້າຍຄືກັນ ໃຫ້ໄດ້ຮັບການພັດທະນາ ໃຫ້ນັບມື້ນັບດີຂຶ້ນ.

     ພ້ອມນີ້, ທ່ານ ນາງ ຄຣອງຂະນິດ ຣັກຈະເລີນ ກໍໄດ້ສະແດງຄວາມຂອບໃຈຕໍ່ທ່ານ ປະທານ ສນຊ ທີ່ໄດ້ໃຫ້ການຕ້ອນຮັບອັນອົບອຸ່ນ. ພ້ອມທັງໃຫ້ຄໍາຢືນຢັນວ່າ ສປປ ລາວ ແລະ ຣາຊະອານາຈັກໄທ ຈະສືບຕໍ່ມີການພົວພັນການຮ່ວມມືກັນໃນຫຼາຍດ້ານໂດຍສະເພາະແມ່ນການສົ່ງເສີມດ້ານວັດທະນະທໍາ, ສາສະໜາ ທີ່ປະຊາຊົນສອງປະເທດເຄີຍຮ່ວມກັນປະຕິວັດໃຫ້ໄດ້ຮັບການພັດທະນາດີຂຶ້ນເປັນກ້າວໆ ຢ່າງຕໍ່ເນື່ອງ. ແລະ ສ້າງເງື່ອນໄຂໃຫ້ບັນດາການນຳຂັ້ນສູງຂອງສອງຝ່າຍ ໄດ້ມີການພົບປະ ແລະ ແລກປ່ຽນການຢ້ຽມຢາມ ເຊິ່ງກັນ ແລະ ກັນຫຼາຍຂຶ້ນ.

ບກ: ອຸດອນ

ຂ່າວ: ລີ

ພາບ: ໄຊວ່າງ