ກອງປະຊຸມຄັ້ງນີ້ ໄດ້ຈັດຂື້ນພາຍໃຕ້ ຫົວຂໍ້ ”ຕົ້ນກຳເນີດອັນດຽວກັນ, ຮ່ວມປະນິທານດຽວກັນ, ສູ່ຄວາມຮຸ່ງເຮືອງສີວິໄລຮອບດ້ານ” ເພື່ອສົ່ງເສີມການປືກສາຫາລື ແລະ ແລກປ່ຽນວັດທະນາທຳລະຫວ່າງກັນ ໂດຍການເປັນເຈົ້າພາບຮ່ວມຂອງ ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ, ສູນກາງແນວລາວສ້າງຊາດ ແລະ ພາກສ່ວນທີ່ກ່ຽວຂ້ອງຂອງ ສປປ ລາວ ຮ່ວມກັບສະມາຄົມພຸດທະສາສະໜານະຄອນເຊີນເຈີນ ແລະ ວັດຫົງຟ້າ ຂອງ ສປ ຈີນ, ກອງປະຊຸມຈັດຂຶ້ນໃນທ່າມກາງບັນຍາກາດສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຈີນ, ຈີນ-ລາວ ຄົບຮອບ 65 ປີ ແລະ ເປັນປີທີ່ສອງປະເທດຍົກລະດັບສາຍພົວພັນເປັນຄູ່ຮ່ວມຊາຕາກໍາລາວ-ຈີນ ທີ່ເຂັ້ມແຂງ ໜຽວແໜ້ນໃນທຸກສະພາບການຂອງຍຸກໃໝ່”ລະຫວ່າງສອງພັກ, ທັງເປັນປີແຫ່ງມິດຕະພາບລາວ-ຈີນ, ທັງເປັນປີທ່ອງທ່ຽວລາວ-ຈີນ ແລະ ໃນບັນຍາກາດຊາວພຸດທະສາສະໜາ ໄດ້ຈັດງານບຸນປະເພນີອອກພັນສາປະວໍຣະນາ.

ຈຸດປະສົງຂອງກອງປະຊຸມ:

1. ເພື່ອສືບຕໍ່ຈັດຕັ້ງປະຕິບັດຖະແຫຼງການ ກອງປະຊຸມໂຕະມົນພຸດທະສາສະໜາໜານໄຫ່ ຄັ້ງທີ X ໃຫ້ມີຜົນເປັນຮູບປະທໍາ;

2. ເພື່ອຮ່ວມກັນຈັດກອງປະຊຸມ ພາຍໃຕ້ຫົວຂໍ້: “ຕົ້ນກຳເນີດອັນດຽວກັນ, ຮ່ວມປະນິທານດຽວກັນ, ສູ່ຄວາມຮຸ່ງເຮືອງສີວິໄລຮອບດ້ານ”;

3. ເພື່ອແລກປ່ຽນບົດຮຽນການຈັດຕັ້ງປະຕິບັດຫຼັກທໍາຄໍາສອນຂອງພຸດທະສາສະໜາ, ສົ່ງເສີມຄວາມສາມັກຄີ, ຮັກສາ ແລະ ເສີມຂະຫຍາຍຄວາມຫຼາກຫຼາຍທາງວັດທະນະທໍາ, ພ້ອມທັງສົ່ງເສີມສັນຕິພາບ ແລະ ການພັດທະນາຮ່ວມກັນຢ່າງຍືນຍົງ.

      ສະພາບການຂອງໂລກໃນປັດຈຸບັນໄດ້ປ່ຽນແປງໄປຢ່າງໄວວາ, ສະຫຼັບສັບຊ້ອນ ແລະ ຄາດຄະເນໄດ້ຍາກ, ແຕ່ ກອງປະຊຸມພຸດທະສາສະໜາໜານໄຫ່ ໃນຄັ້ງນີ້ໄດ້ເປັນເວທີສາກົນໜຶ່ງທີ່ສຳຄັນທາງພຸດທະສາສະໜາ ແລະ ສ້າງຄວາມເຂົ້າອົກເຂົ້າໃຈ ລະຫວ່າງ ພຸດທະສາສະໜາດ້ວຍກັນ ແລະ ພະສົງ ເພື່ອຄົ້ນຄວ້າພະທຳຄຳສອນ ແລະ ຕິດພັນກັບການສ້າງຄວາມເຂົ້າໃຈ ໃຫ້ພຸດທະສາສະນິກະຊົນໃຫ້ຮູ້ຈັກ ແລະ ປະຕິບັດຕາມພະທຳຄຳສອນຂອງພະພຸດທະສາສະໜາ ທັງເປັນການສືບທອດມໍລະດົກທາງດ້ານສາສະໜາ ແລະ ວັດທະນະທຳໃຫ້ເລິກເຊິ່ງ ເປັນຮູບປະທຳ ເປັນຕົ້ນ: ເວທີສົນທະນາດ້ານການສຶກສາ, ການແລກປ່ຽນຂອງພະໜຸ່ມ ແລະ ໂຄງການການກຸສົນຕ່າງໆ. ສິ່ງເຫຼົ່ານີ້ ໄດ້ເປັນສ່ວນ ໜຶ່ງທີ່ສຳຄັນຕາມຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ເຊື່ອມໂຍງ-ເຊື່ອມຈອດ ລະຫວ່າງ ສປປ ລາວ – ສປ ຈີນ ເພື່ອ ສົ່ງເສີມເສັ້ນທາງແຫ່ງສັນຕິພາບມິດຕະພາບ, ສ້າງຄວາມຈະເລີນຮຸ່ງເຮືອງ, ປົກປັກຮັກສາວັດທະນະທຳ, ອາລິຍະທຳ ແລະ ຮີດຄອງປະເພນີອັນດີງາມ ໃຫ້ແກ່ຄົນຮຸ່ນຫຼັງສືບຕໍ່ຕະຫຼອດໄປ.

       ໃນໂອກາດນີ້ ທ່ານປະທານສູນກາງແນວລາວສ້າງຊາດ ໄດ້ເນັ້ນໃຫ້ພວກເຮົາຮ່ວມໃຈ ແລະ ຮ່ວມຄວາມມຸ້ງຫວັງ, ກ້າວເດີນໄປໃນເສັ້ນທາງດຽວກັນ ເພື່ອແລກປ່ຽນຄວາມເມດຕາ ແລະ ປັນຍາແຫ່ງພຣະທຳ ໃຫ້ກາຍເປັນພະລັງອັນຍິ່ງໃຫຍ່ເພື່ອປົກປັກຮັກສາສັນຕິພາບ ແລະ ການຢູ່ຮ່ວມກັນໂດຍສັນຕິ ຕາມຫົວຂໍ້ຂອງກອງປະຊຸມໂຕະມົນຂອງພະພຸດທະສາສະໜາໜານໄຫ່ໃນຄັ້ງນີ້ທີ່ວ່າ: ”ຕົ້ນກໍາເນີດອັນດຽວກັນ, ຮ່ວມປະນິທານດຽວກັນ, ສູ່ຄວາມຮຸ່ງເຮືອງສີວິໄລຮອບດ້ານ”

ຜະລິດຂ່າວໂດຍ: ກົມໂຄສະນາ ສູນກາງແນວລາວສ້າງຊາດ