ສະຫາຍ ນາງ ບຸດສະດີ ທະນະເມືອງ, ໄດ້ສະແດງຄວາມຂອບໃຈຕໍ່ການ ຕ້ອນຮັບຢ່າງອົບອຸ່ນ ສະຫາຍ ຫວາງ ຮູນິງ ແລະ ໄດ້ກ່າວວ່າ: ຄວາມສໍາພັນລາວ-ຈີນ ເປັນຄວາມສໍາພັນມິດຕະພາບອັນຍາວນານ, ເປັນມູນມໍລະດົກອັນລໍ້າຄ່າຂອງປະຊາຊົນສອງຊາດ, ການພົບປະສອງຝ່າຍໃນມື້ນີ້ ມີຄວາມໝາຍສຳຄັນຍິ່ງ, ເຊິ່ງເປັນການເສີມຂະຫຍາຍສາຍພົວພັນຮ່ວມມືລະຫວ່າງສອງພັກ, ສອງລັດ ເວົ້າລວມ, ເວົ້າສະເພາະ ສາຍພົວພັນຮ່ວມມືລະຫວ່າງສູນກາງແນວລາວສ້າງຊາດ ແລະ ສະພາທີ່ປຶກສາການເມືອງທົ່ວປະເທດຈີນ. ເປັນການທົບທວນຄືນການຈັດຕັ້ງປະຕິບັດຜົນການຮ່ວມມືທີ່ຜ່ານມາ, ພ້ອມທັງຈະໄດ້ຮ່ວມກັນປຶກສາຫາລື ແລະ ກໍານົດທິດທາງການຮ່ວມມືອັນໃໝ່ ເພື່ອສືບຕໍ່ ຜັນຂະຫຍາຍ ແນວທາງການພົວພັນແບບຄູ່ຮ່ວມຊາຕາກຳ ລາວ-ຈີນ ໃຫ້ແຕກດອກອອກຜົນຍິ່ງໆຂຶ້ນ ຕາມແຜນແມ່ບົດວ່າດ້ວຍການກໍ່ສ້າງຄູ່ຮ່ວມຊາຕາກຳ ລາວ-ຈີນ ທີ່ການນຳຂັ້ນສູງສອງພັກ, ສອງລັດ ໄດ້ວາງໄວ້.