ນັບແຕ່ປີ 2017 ຮອດປັດຈຸບັນ ໂຄງການກອງທຶນສາມັກຄີ ແລະ ພັດທະນາແນວລາວສ້າງຊາດ ໄດ້ມຸ່ງໝັ້ນຊ່ວຍເຫຼືອປະຊາຊົນ ສ້າງເສດຖະກິດຄອບຄົວໃຫ້ເຕີບໃຫຍ່ຂະຫຍາຍຕົວ ແລະ ຫຼຸດພົ້ນຈາກຄວາມທຸກຍາກ ໂດຍການດໍາເນີນນະໂຍບາຍສົ່ງເສີມຊ່ວຍເຫຼືອປະຊາຊົນດ້ວຍ 3 ມາດຕະການຢ່າງເປັນຮູບປະທໍາ ເຊັ່ນ: ດໍາເນີນນະໂຍບາຍສະໜອງທຶນດອກເບ້ຍຕໍ່າໃຫ້ກອງທຶນບ້ານ, ໃຫ້ການຊ່ວຍເຫຼືອດ້ານວິຊາການດ້ວຍການຝຶກອົບຮົມແນະນໍາດ້ານເຕັກນິກວິຊາການດ້ານການບໍລິຫານກອງທຶນ, ດ້ານການຜະລິດກະສິກໍາເປັນສິນຄ້າ ແລະ ການນໍາໃຊ້ເຕັກໂນໂລຊີທັນສະໄໝ ເຂົ້າໃນການຜະລິດຂອງສະມາຊິກກອງທຶນ, ຊ່ວຍດ້ານການຕະຫຼາດ ການເກັບຊືື້ຜົນຜະລິດຈາກກອງທຶນ ເພື່ອສະໜອງໃຫ້ຕະຫຼາດ; ໂຄງການສ້າງຕັ້ງກອງທຶນສາມັກຄີ ແລະ ພັດທະນາ ແນວລາວສ້າງຊາດ ມີ 44 ບ້ານ 28 ເມືອງ ໃນ 11 ແຂວງ ລວມທັງນະຄອນຫຼວງວຽງຈັນ ໃນນີ້ຢູ່ແຂວງຫົວພັນ 5 ກອງທຶນ, ແຂວງໄຊຍະບູລີ 3 ກອງທຶນ, ໄຊສົມບູນ 1 ກອງທຶນ ແລະ ນະຄອນຫຼວງວຽງຈັນ 1 ກອງທຶນ ບໍລິຄໍາໄຊ 1 ກອງທຶນ, ຄໍາມ່ວນ 2 ກອງທຶນ, ສະຫວັນນະເຂດ 20 ກອງທຶນ, ສາລະວັນ 3 ກອງທຶນ ,ຈໍາປາສັກ 5 ກອງທຶນ, ເຊກອງ 2 ກອງທຶນ ແລະ ແຂວງອັດຕະປື 1 ກອງທຶນ. ບັນດາຄະນະຮັບຜິດຊອບກອງທຶນໄດ້ລາຍງານການເຕີບໃຫຍ່ຂະຫຍາຍຕົວ ແລະ ການເຄື່ອນໄຫວບໍລິການສະໜອງສິນເຊື່ອໄລຍະສັ້ນ, ກາງ ແລະ ໄລຍະຍາວ ດອກເບ້ຍຕ່ຳໃຫ້ປະຊາຊົນຢ່າງກວ້າງຂວາງ, ໄດ້ສະໜອງສິນເຊື່ອຈັດຊື້ພາຫະນະ ,ສະໜອງປຸ໋ຍ, ແນວພັນພືດ, ຢາປາບສັດຕູພືດ, ລະບົບນໍ້າຢອດແບບໂອໂຕມາຕິກ, ມີສູນກະສິກໍາຕົວແບບ 8 ແຫ່ງ, ໄດ້ສົ່ງເສີມປະຊາຊົນດໍາເນີນໂຄງການປິ່ນອ້ອມ ອັນພົ້ນເດັ່ນແມ່ນໂຄງການຕ້ານແລ້ງ-ຕ້ານຖ້ວມ ທີ່ສົ່ງເສີມປະຊາຊົນລ້ຽງປາເປັນອາຊີບ ຂຸດໜອງປາ 38 ບໍ່ ແລະ ສະໜອງລູກປາໃຫ້ສະມາຊິກ 213.380 ໂຕ; ໂຄງການນາໄຮ່ໃຫຍ່ມີເນື້ອທີ່ການຜະລິດ 600 ກວ່າເຮັກຕາ ສໍາເລັດການບຸກເບີກ 300 ເຮັກຕາ, ສົ່ງເສີມຊາວນາຜະລິດເຂົ້າເປັນສິນຄ້າ ແລະ ສ້າງເປັນຕົວແບບໃຫ້ແຂວງອື່ນ; ໂຄງການກໍ່ສ້າງ-ສ້ອມແປງຊົນລະປະທານ 7 ແຫ່ງຢູ່ແຂວງສະຫວັນນະເຂດ ມູນຄ່າ 1,65 ຕື້ກີບ; ສົ່ງເສີມຜູ້ປະກອບການລ້ຽງສັດ ເຊັ່ນ: ຟາມໝູແຂວງໄຊຍະບູລີ 5,862 ໂຕ, ແຂວງຈໍາປາສັກ 6,650 ໂຕ ແລະ ກຸ່ມລ້ຽງໄກ່ແຂວງສະຫວັນນະເຂດ ມີ 1 ພັນກວ່າໂຕ; ສົ່ງເສີມການເຮັດສວນກາເຟ ໂດຍກອງທຶນບ້ານສາມັກຄີແນວລາວສ້າງຊາດ ບ້ານພູໂອຍ ເມືອງປາກຊ່ອງ ແຂວງຈໍາປາສັກ ໄດ້ເກັບຊື້ເມັດກາເຟນໍາປະຊາຊົນມາແປຮູບ ແລະ ສົ່ງອອກເປັນຄູ່ຄ້າ-ຂາຍໃຫ້ຕ່າງປະເທດ. ພ້ອມກັນນີ້, ສູນກາງແນວລາວສ້າງຊາດ ກັບກຸ່ມບໍລິສັດພົງສະຫວັນ ກໍ່ໄດ້ເຊັນບົດບັນທຶກຊ່ວຍຈຳ ກ່ຽວກັບການສືບຕໍ່ຮ່ວມມືດຳເນີນໂຄງການກອງທຶນສາມັກຄີ ແລະ ພັດທະນາ ຂອງແນວລາວສ້າງຊາດ ແຕ່ປີ2024 ຫາ ປີ 2028.

       ໃນໂອກາດທີ່ມີຄວາມໝາຍສຳຄັນນີ້ ທ່ານ ປະທານສູນກາງແນວລາວສ້າງຊາດ ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄະນະຮັບຜິດຊອບໂຄງການ ໃນໄລຍະຜ່ານມາ ແລະ ທ່ານໄດ້ເນັ້ນຕໍ່ກອງປະຊຸມຕື່ມວ່າ: ໃຫ້ທັງສອງຝ່າຍສືບຕໍ່ຈັດຕັ້ງປະຕິບັດບັນດາກິດຈະກຳ ທີ່ໄດ້ລົງນາມຮ່ວມກັນໃນຄັ້ງນີ້ລົງສູ່ວຽກງານຕົວຈີງໃຫ້ເກີດດອກອອກຜົນ; ສຶບຕໍ່ສົ່ງເສີມ ແລະ ສ້າງຄວາມເຂັ້ມແຂງໃຫ້ກອງທຶນ ໂດຍສະເພາະແມ່ນຈັດຕັ້ງປະຕິບັດວຽກງານຕິດພັນກັບ 4 ການເສີມສ້າງຂອງແນວລາວສ້າງຊາດ ເພື່ອເຮັດໃຫ້ໂຄງການມີຄວາມຍືນຍົງ ແລະ ມີການເຕີບໃຫຍ່ຂະຫຍາຍຕົວຂຶ້ນເລື້ອຍໆ; ສືບຕໍ່ຊຸກຍູ້ໃຫ້ປະຊາຊົນ ແລະ ຜູ້ປະກອບການທີ່ມາຮັບໃຊ້ການບໍລິການກອງທຶນ ເຮັດການຜະລິດເປັນກຸ່ມ ເພື່ອເຮັດໃຫ້ສາມາດກາຍເປັນສິນຄ້າສົ່ງອອກທາງພາຍໃນ ແລະ ຕ່າງປະເທດ ແກ້ໄຂເສດຖະກິດຄອບຄົວ ແລະ ຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນເປັນກ້າວໆ.

ຂ່າວ+ພາບ: ເຢ

ບກ: ກົງແກ້ວ