ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ເປັນກຽດເຂົ້າຮ່ວມ ພິທີເປີດສູນຝຶກອົບຮົມວິຊາຊີບ ເມືອງປາກງື່ມ ນະຄອນຫຼວງວຽງຈັນ, ມີ ທ່ານ ກອງມີ ສີສະໝຸດ ຮອງເຈົ້າເມືອງໆປາກງື່ມ, ທ່ານ ຈາວເວິນຢູ່ ທີ່ປຶກສາດ້ານການຄ້າ ສະຖານເອກອັກຄະລັດຖະທູດແຫ່ງ ສປ ຈີນ ປະຈໍາລາວ, ພ້ອມດ້ວຍການນຳພັກ-ລັດ ຂັ້ນສູນກາງ, ນະຄອນຫຼວງວຽງຈັນ, ເມືອງ, ທະຫານ, ຕໍາຫຼວດ ນັກທຸລະກິດ ພ້ອມດ້ວຍຄູອາຈານ ນັກຮຽນ ຕະຫຼອດຮອດພໍ່ແມ່ປະຊາຊົນເຂົ້າຮ່ວມ ທີ່ສູນຝຶກອົບຮົມວິຊາຊີບ ບ້ານພ້າວ ເມືອງປາກງື່ມ ນະຄອນຫຼວງວຽງຈັນ, ວັນທີ 1 ມີຖຸນາ 2024;
ໂຄງການກໍ່ສ້າງສູນຝຶກອົບຮົມວິຊາຊີບນີ້ແມ່ນສ້າງເພື່ອຜູ້ດ້ອຍໂອກາດ ເຊິ່ງຕັ້ງຢູ່ບ້ານພ້າວ, ເມືອງປາກງື່ມ, ນະຄອນຫຼວງວຽງຈັນ ໄດ້ດໍາເນີນການກໍ່ສ້າງອາຄານໂຮງຮຽນ ມາແຕ່ປີ 2021 ແລະ ຮອດທ້າຍປີ 2023 ແມ່ນໄດ້ສໍາເລັດສ່ວນໃຫຍ່, ສູນດັ່ງກ່າວໂດຍໄດ້ຮັບທຶນອຸປະຖຳຫຼັກ ຈາກຄອບຄົວ ຄຸດໄພທູນ ແລະ ຍາດຕິພີນ້ອງ, ຮ່ວມກັບບັນດານັກທຸລະກິດທາງພາຍໃນ ແລະ ຕ່າງປະເທດ ເຊີ່ງເປັນອາຄານຊັ້ນດຽວ ປະກອບມີຫ້ອງຮຽນ ຈໍານວນ 7 ຫ້ອງ, ຫ້ອງການ 1 ຫ້ອງ, ຫ້ອງປະຊຸມ 1 ຫ້ອງ, ຫ້ອງພັກພະນັກງານ 2 ຫ້ອງ, ໂຮງອາຫານ 1 ຫຼັງ, ຫໍພັກຄູ-ນັກຮຽນຈໍານວນ 10 ຫ້ອງ ແລະ ຫ້ອງນໍ້າຊາຍ 2 ຫ້ອງ, ຫ້ອງນ້ຳຍິງ 2 ຫ້ອງ. ໄດ້ນໍາໃຊ້ລະບົບໄຟຟ້າແສງຕາເວັນ ( Solar Panel ) ຈຳນວນ 102 ແຜ່ນ, ສຳຮອງໄວ້ 2 ແຜ່ນ, ກຳລັງໄຟຟ້າປະມານ 45.000 W ສຳລັບຄ່າອອກແບບ, ການປະກອບເຟີນິເຈີ, ອຸປະກອບຮັບໃຊ້, ຄອມພິວເຕີ, ແລະ ສິ່ງອຳນວຍຄວາມສະດວກອື່ນໆ ແມ່ນໄດ້ຮັບການອຸປະຖຳຈາກຫຼາຍພາກສ່ວນ ທີ່ເປັນບຸກຄົນ, ນິຕິບຸກຄົນ ທັງພາກລັດ, ເອກະຊົນ.
ຈຸດປະສົງຕົ້ນຕໍຂອງໂຄງການ ເພື່ອດືງເອົາ ຄູອາຈານ, ຊ່ຽວຊານພາຍໃນປະເທດ ແລະ ຕ່າງປະເທດ ເຂົ້າມາສິດສອນວິຊາຄວາມຮູ້ໃຫ້ຜູ້ດ້ອຍໂອກາດ, ພໍ່ແມ່ ປະຊາຊົນ ແລະ ຜູ້ທີ່ຢາກສຶກສາຮ່ຳຮຽນຍົກລະດັບຄວາມຮູ້, ແຕ່ລະວິຊາຕ່າງໆເຊັ່ນ: ດ້ານກະສິກຳ, ຫັດຖະກຳ, ພາສາ, ຄອມພິວເຕີ ແລະ ອື່ນໆ. ເພື່ອໃຫ້ມີສີມືແຮງງານທີ່ຜ່ານການຝຶກອົບຮົມສາມາດສ້າງອາຊີບດ້ວຍໂຕເອງໄດ້ ແລະ ໄປຍົກລະດັບອາຊີບຂອງຕົນເອງໃຫ້ດີຂື້ນກ່ວາເກົ່າ. ຢາກໃຫ້ພໍ່ແມ່ປະຊາຊົນ ແລະ ລູກຫຼານຜູ້ທີ່ວ່າງງານໄດ້ມາສຶກສາຮຽນຮູ້ ແລ້ວໄປສ້າງເປັນອາຊີບໃຫ້ຕົນເອງ, ຄອບຄົວ ເພື່ອສ້າງ ລາຍຮັບເປັນຂອງຕົນເອງ, ຫຼິກລ້ຽາການໄປເຮັດວຽກເປັນແຮງງານຮັບຈ້າງຕ່າງປະເທດ ອີກຢ່າງຫນຶ່ງກໍ່ເພື່ອສົ່ງເສີມ ການຜະລິດສິນຄ້າ ດ້ານກະສິກຳ ແລະ ຫັດຖະກຳພາຍໃນປະເທດໃຫ້ດີຂື້ນ ສ້າງເສດຖະກິດເອກະລາດ ເປັນເຈົ້າຕົນເອງເທື່ອລະກ້າວ. ໃນພິທີດັ່ງກ່າວໄດ້ຈັດພິທີມອບ-ຮັບໃບກຽດຕິຄຸນ, ໃບຍ້ອງຍໍ ໃຫ້ແກ່ບັນດາບໍລິສັດ, ບຸກຄົນ, ນິຕິບຸກຄົນທີ່ໄດ້ປະກອບສ່ວນຊ່ວຍເຫຼືອສ້າງສູນຝຶກອົບຮົມຫຼັງດັ່ງກ່າວ. ຫຼັງຈາກນັ້ນ, ທ່ານ ປະທານ ສນຊ ພ້ອມດ້ວຍຄະນະທັງໝົດໄດ້ພ້ອມກັນປຸກຕົ້ນໄມ້ເນື່ອງໃນໂອກາດ ວັນປູກຕົ້ນໄມ້ແຫ່ງຊາດຄົບຮອບ 44 ປີ ຊື່ງມີທັງປະເພດໄມ້ໃຫ້ໝາກ ແລະ ປະເພດໄມ້ອຸດສະຫະກໍາ ຢູ່ບໍລິເວນອ້ອມຮອບສູນຝຶກອົບຮົມດັ່ງກ່າວ.
ບກ: ພ.ບຸບຜາ
ຂ່າວ+ພາບ: ລີ