ເພື່ອຈັດຕັ້ງຜັນຂະຫຍາຍ ບົດບັນທຶກການຮ່ວມມື ລະຫວ່າງ ຄະນະພັກສູນກາງແນວລາວສ້າງຊາດ ແລະ ຄະ ນະພັກກະຊວງການເງິນ ສະບັບລົງວັນທີ 12 ມັງກອນ 2023 ເຂົ້າສູ່ພາກປະຕິບັດຕົວຈິງໃຫ້ມີຜົນສໍາເລັດຕາມຈຸດ ປະ ສົງ ແລະ ຄາດໝາຍທີ່ວາງໄວ້ ໂດຍສະເພາະແມ່ນການປຸກລະດົມຂົນຂວາຍພະນັກງານລັດຖະກອນ, ທະຫານ-ຕຳຫຼວດ, ປະຊາຊົນລາວບັນດາເຜົ່າ, ຜູ້ປະກອບການ, ນັກທຸລະກິດ-ຊາວຄ້າຂາຍ ໃຫ້ເຂົ້າຮ່ວມການປະຕິບັດພັນທະເສຍພາສີ-ອາ ກອນໃຫ້ລັດຕາມລະບຽບກົດໝາຍ, ທັງແກ້ໄຂບັນຫາການຮົ່ວໄຫຼ, ການລັກລອບພາສີ-ອາກອນ ຫຼິກລ້ຽງການປະຕິບັດພັນທະເສຍພາສີ-ອາກອນ. ໃນວັນທີ 14 ພຶດສະພາ 2024 ນີ້, ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະໄດ້ລົງໂຄສະນາປຸກລະດົມການປະຕິບັດພັນທະເສຍພາສີ ແລະ ອາກອນໃຫ້ລັດ ທີ່ຫ້ອງປະຊຸມອົງການປົກຄອງແຂວງຫຼວງນໍ້າທາ. ເປັນກຽດເຂົ້າຮ່ວມມີ ທ່ານ ບຸນປີ ໄລປະເສີດ ກຳມະການພັກແຂວງ, ປະທານແນວລາວສ້າງຊາດແຂວງຫຼວງນໍ້າທາ, ທ່ານ ບຸນມີ ໄຊຍະສານ ຮອງຫົວໜ້າພະແນກການເງິນແຂວງ, ບັນດາທ່ານພະນັກງານປະຕິວັັດອາວຸໂສບຳນານ, ພະນັກງານ-ລັດຖະກອນ, ທະຫານ-ຕຳຫຼວດ, ນັກທຸລະກິດ, ຜູ້ປະກອບການ, ການເງິນ, ພາສີ-ອາກອນແຂວງ ແລະ ເມືອງ, ແນວລາວສ້າງຊາດ ແລະ ການເງິນເມືອງພູຄາ, ນາແລ ແລະ ຫຼວງນໍ້າທາ, ການເຜີຍແຜ່ຄັ້ງນີ້, ປະກອບມີ 3 ເອກະສານສໍາຄັນຄື: ປະເທດລາວ ຄົນລາວເປັນເຈົ້າຂອງ, ວຽກງານພາສີ ແລະ ວຽກງານອາກອນ. ພ້ອມກັນນັ້ນ, ຜູ້ເຂົ້າຮ່ວມກອງປະຊຸມໄດ້ປະກອບຄໍາຄິດຄໍາເຫັນຢ່າງກົງໄປກົງມາຕໍ່ ວຽກງານພາສີ ແລະ ອາກອນຢ່າງເລິກເຊິ່ງ.

          ທ່ານຮອງປະທານ ສນຊ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນໍາ ຂອງແຂວງຍາມໃດກະໄດ້ເອົາໃຈໃສ່ໃນການສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີເປັນແຜ່ນປຶກຂອງປະຊາຊົນລາວບັນດາເຜົ່າ ພ້ອມກັນນີ້, ທ່ານໄດ້ຍົກໃຫ້ເຫັນເຖິງຈຸດປະສົງ ແລະ ຄວາມໝາຍ ຄວາມສຳຄັນຂອງການປະຕິບັດພັນທະເສຍພາສີ-ອາກອນ ເພື່ອສ້າງຄວາມຮັບຮູ້, ເປັນເອກະພາບກັນ ຂອງຄະນະຮັບຜິດຊອບຂັ້ນສູນກາງ ແລະ ຂັ້ນທ້ອງຖິ່ນ ໃນການປຸກລະດົມຂົນຂວາຍປະຊາຊົນລາວບັນດາເຜົ່າ, ຜູ້ປະກອບການ, ນັກທຸລະກິດ-ຊາວຄ້າຂາຍ ໃຫ້ເຂົ້າຮ່ວມຕື່ນຕົວປະຕິບັດພັນທະເສຍພາສີ-ອາກອນ ປະເພດຕ່າງໆຄົບຖ້ວນ ໃຫ້ລັດຕາມລະບຽບກົດໝາຍ, ແນໃສ່ແກ້ໄຂບັນຫາຮົ່ວໄຫລ, ການລັກລອບພາສີ-ອາກອນ. ພາຍຫຼັງສໍາເລັດກອງປະຊຸມຄັ້ງນີ້ແລ້ວ ມອບໃຫ້ແນວລາວສ້າງຊາດແຂວງ ແລະ ພະແນກການເງິນແຂວງ ສືບຕໍ່ນໍາເອົາເນື້ອໃນຈິດໃຈຄັ້ງນີ້ໄປເຜີຍແຜ່ໃຫ້ຂັ້ນເມືອງ ແລະ ຂັ້ນບ້ານ ໃຫ້ພໍ່ແມ່ປະຊາຊົນລາວບັນດາເຜົ່າໃນ ທົ່ວແຂວງ ໃຫ້ມີຄວາມຕື່ນຕົວໃນການປະຕິບັດພັນທະເສຍພາສີ ແລະ ອາກອນໃຫ້ລັດເພີ່ມຂຶ້ນ ແລະ ທ່ານຍັງໄດ້ຮຽກຮ້ອງໃຫ້ຫົວໜ່ວຍທຸລະກິດ, ນັກທຸລະກິດ, ຊາວຄ້າ-ຂາຍ ຜູ້ປະກອບການ ຕະຫຼອດຮອດພໍ່ແມ່ປະຊາຊົນລາວ ບັນດາເຜົ່າ ຈົ່ງໃຫ້ຄວາມຮ່ວມມືປະຕິບັດພັນທະເສຍພາສີ-ອາກອນ ຢ່າງເປັນຂະບວນການອັນຟົດຟຶ້ນ.