ໃນວັນທີ 1 ພຶດສະພາ 2024 ນີ້ທີ່ປະຕູໄຊ ນະຄອນຫລວງວຽງຈັນ ສູນກາງສະຫະພັນກຳມະບານລາວ ໄດ້ຈັດພິທີຍ່າງເພື່ອສຸຂະພາບ ເນື່ອງໃນໂອກາດສະເຫລີມສະຫລອງວັນກຳມະກອນສາກົນ ຄົບຮອບ 138 ປີ (ວັນທີ 1 ພຶດສະພາ 1886 – 1 ພຶດສະພາ 2024) ພາຍໃຕ້ຫົວຂໍ້: “ຄວາມຍຸຕິທໍາໃນສັງຄົມ ແລະ ວຽກທີ່ມີຄຸນຄ່າເປັນທໍາສໍາລັບທຸກຄົນ”, ເປັນກຽດເຂົ້າຮ່ວມມີ ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍພັນລະຍາ; ມີບັນດາທ່ານການນໍາພັກ-ລັດທຸກພາກສ່ວນ, ຜູ້ຕາງໜ້າຈາກອົງການຈັດຕັ້ງສາກົນຕ່າງໆ ປະຈໍາລາວ, ພະນັກງານ-ລັດຖະກອນ, ສະມາຊິກກໍາມະບານ, ກໍາມະກອນ ແລະ ມວນຊົນຊາວນະຄອນຫຼວງວຽງຈັນ ເຂົ້າຮ່ວມຢ່າງມີບັນຍາກາດຟົດຟື້ນ.
ທ່ານ ພອນສານ ວິໄລເມັ້ງ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ ໄດ້ຫວນຄືນປະຫວັດແຫ່ງການກໍາເນີດເຕີບໃຫຍ່ຂອງວັນກໍາມະກອນສາກົນ ຄົບຮອບ 138 ປີ ເຊິ່ງໄດ້ຍົກໃຫ້ເຫັນວ່າໃນສັດຕະວັດທີ XVIII-XIX ພາຍໃຕ້ການປົກຄອງຂອງພວກນາຍທຶນ ຊົນຊັ້ນກໍາມະກອນຖືກກົດຂີ່ຂູດຮີດຢ່າງໜັກໜ່ວງ, ຊີວິດການເປັນຢູ່ ນັບມື້ນັບທຸກຍາກ, ລຳບາກ ພວກນາຍທຶນໄດ້ບັງຄັບ ໃຫ້ກຳມະກອນອອກແຮງງານ 14-15 ຊົ່ວໂມງຕໍ່ມື້ ອອກແຮງງານໜັກແຕ່ໄດ້ຄ່າແຮງງານຕໍ່າ, ການປ້ອງກັນສຸຂະພາບ, ຄວາມປອດໄພບໍ່ດີ ແລະ ບໍ່ເອົາໃຈໃສ່ຕໍ່ຊີວິດການເປັນຢູ່ ຈິ່ງພາໃຫ້ເກີດມີຂໍ້ຂັດແຍ່ງນັບມື້ນັບຮຸນແຮງຂື້ນ; ມາຮອດວັນທີ 1 ພຶດສະພາ 1886 ເປັນຄັ້ງທໍາອິດທີ່ຊົນຊັ້ນກໍາມະກອນ ແລະ ຊາວຜູ້ອອກແຮງງານ ໄດ້ມີການຕໍ່ສູ້ຖືເອົາເນື້ອໃນຂອງຖະແຫຼ່ງການຮຽກຮ້ອງໃຫ້ພວກນາຍທຶນຕ້ອງປະຕິບັດຕາມການສະເໜີຂອງກໍາມະກອນວ່າ: ແຕ່ນີ້ຕໍ່ໄປບໍ່ໃຫ້ກໍາມະກອນ ເຮັດວຽກເກີນ 8 ຊົ່ວໂມງຕໍ່ມື້ ແລະ ໄດ້ກາຍເປັນວັນບຸນປາງໃຫຍ່ ທີ່ມີຄວາມໝາຍສຳຄັນຢ່າງຍິ່ງຂອງຊົນຊັ້ນກຳມະກອນ ແລະ ຜູ້ອອກແຮງງານໃນທົ່ວໂລກ, ເປັນວັນແຫ່ງມະຫາສາມັກຄີຂອງຊົນຊັ້ນກຳມະກອນທົ່ວໂລກ ທີ່ໄດ້ສະແດງພະລັງແຮງທີ່ເຂັ້ມແຂງຂອງຕົນ ແລະ ມີການສະເຫຼີມສະຫຼອງຢ່າງຄຶກຄື້ນ ໃນແຕ່ລະປີ ຢູ່ຫຼາຍປະເທດໃນທົ່ວໂລກ.
ພ້ອມກັນນັ້ນ, ທ່ານຍັງໄດ້ຮຽກຮ້ອງໃຫ້ການຈັດຕັ້ງພັກ-ລັດ, ການຈັດຕັ້ງກໍາມະບານແຕ່ລະຂັ້ນ ຈົ່ງເພິ່ມທະວີຕໍ່ກັບການໂຄສະນາສຶກສາອົບຮົມການເມືອງ-ແນວຄິດ, ຊ່ວຍເຫຼືອ, ກໍ່ສ້າງ, ພັດທະນາກໍາມະກອນ ແລະ ຜູ້ອອກແຮງງານລາວ ໃຫ້ເຕີບໃຫຍ່ເຂັ້ມແຂງທາງດ້ານສີມືແຮງງານ, ການຮັບຮູ້ຂໍ້ມູນຂ່າວສານ ແລະ ມີລະບຽບວິໄນໃນການອອກແຮງງານໃຫ້ໄດ້ທັງດ້ານປະລິມານ ແລະ ຄຸນນະພາບ ສົມຄູ່ກັບຄວາມຮຽກຮ້ອງຕ້ອງການໃນການເຊື່ອມໂຍງເຂົ້າກັບສາກົນໃນໄລຍະໃໝ່, ພວກເຮົາ ຈົ່ງພ້ອມກັນ ເຫັນຄຸນຄ່າຂອງແຮງງານກໍາມະກອນ, ຜູ້ອອກແຮງງານລາວ ແລະ ເພີ່ມທະວີໃນການປົກປ້ອງສິດຜົນປະໂຫຍດອັນຊອບທໍາໃຫ້ມີຄວາມສະເໜີພາບ, ມີລາຍຮັບທີ່ເປັນທຳ, ການອອກແຮງງານທີ່ປອດໄພ ແລະ ກາຍເປັນກໍາລັງຫຼັກແຫຼ່ງ ໃນພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຍືນຍົງ ແລະ ໝັ້ນຄົງ, ຈາກນັ້ນ ທ່ານປະທານ ສນຊ ໄດ້ເປັນກຽດຕັດແຖບຜ້າ-ປ່ອຍປູມເປົ້າ ແລະ ນໍາພາຂະບວນການຍ່າງເພື່ອສຸຂະພາບ ແຕ່ປະຕູໄຊ-ຫໍຄໍາ-ປະຕູໄຊ;ໃນໂອກາດນີ້ ມວນຊົນທີ່ເຂົ້າຮ່ວມຍັງໄດ້ຮັບຊົມການສະແດງສິລະປະ-ວັດທະນະທໍາ ແລະ ເຂົ້າຮ່ວມການຖາມ-ຕອບຄວາມຮູ້ ເອົາລາງວັນຕື່ມອີກ.
ຂ່າວ-ຮູບ: ເຢ້
ບ.ກ: ພ ບຸບຜາ
